1 Juan 5
5
Onporahuatësona Yosë imamiatacasoꞌ
1Yaꞌipi Quisocristo imarëhuasopita aꞌna huënton pochin ninëhuaꞌ. “Quisocristo Yosë huiꞌnin chachin,” tënëhuaꞌ niꞌton, huëntonënquë yaꞌconëhuaꞌ. Huiꞌninpita pochin niꞌninpoaꞌ. Niꞌcoꞌ. “Quëmapi tëhuënchachin nosorohuatëra, huiꞌninpitantaꞌ nosororëꞌ,” topi. 2Napoaton Yosë nosorohuatëhuaꞌ, pënëninpoasoꞌ noya natëhuatëhuaꞌ, tëhuënchachin huiꞌninpitantaꞌ nosoroarihuaꞌ, tënahuë. 3Yosë nosorohuatëhuaꞌ, pënëninpoasoꞌ noꞌtëquën natëarihuaꞌ. Catahuahuachinpoaꞌ, nanitaparëhuaꞌ. 4Canpoasoꞌ Yosë huiꞌninpitanpoaꞌ niꞌton, nanitaparëhuaꞌ sopai minsëcasoꞌ. “Quisocristo catahuarinpoaꞌ,” topatëhuaꞌ, co noyahuëꞌ yonquirëhuasopita naniantarihuaꞌ. Isoroꞌpaquë naꞌa maꞌsha, piyapi, inapita yaꞌhuërin anishacancantinpoaso marëꞌ. Nipirinhuëꞌ, Quisocristo yonquihuatëhuaꞌ, catahuarinpoaꞌ imamiatacasoꞌ. 5“Quisocristo Yosë huiꞌnin chachin,” topatëhuaꞌ, achinicancaninpoaꞌ sopai minsëcaso marëꞌ. Aꞌnapitarisoꞌ co nanitopihuëꞌ sopai minsëcaisoꞌ.
Yosë anitotërinpoasoꞌ
6Quisocristo isoroꞌpaquë chachin oꞌmarin. Oꞌmahuachina, Yosë nohuanton, iꞌquë aporihuanin. Nani yaꞌipi shaꞌhuitërinsoꞌ tiquiaton, corosëquë chiminpachina, huënainën paꞌnin. Co topinan aporihuaninhuëꞌ. Oshanënpoaꞌ inquitinpoaso marëꞌ chiminin. Naporahuaton, Ispirito Santontaꞌ cancanënpoa quëran anitotërinpoaꞌ. Inasoꞌ noꞌtëquën shaꞌhuitërinpoaꞌ. “Quisososoꞌ Yosë huiꞌnin chachin,” itërinpoaꞌ. 7-8Tata Yosë noya anitotërinpoaꞌ huiꞌnin natëcasoꞌ. Niꞌcoꞌ. “Carayaꞌpi inachachin shaꞌhuihuachina, naporo huarëꞌ natëtërëꞌ,” topi. Inapochachin cancanënpoaquë Ispirito Santo shaꞌhuitërinpoaꞌ. Quisocristontaꞌ iꞌquë aporihuanpachina, yaꞌipiya Yosë natërin. Naporahuaton, canpoa marëꞌ chiminpachina, huënainën paꞌnin. Cara chachin napopináchin anitotërinpoaꞌ. 9Piyapiꞌsaꞌ inachachin shaꞌhuihuachinaꞌ, natëtërëhuaꞌ. Yosëso nipirinhuëꞌ noya noya niꞌton, noꞌtëquënáchin nontërinpoaꞌ. Napoaton ina shaꞌhuitohuachinpoaꞌ, naꞌcon naꞌcon natëtacasoꞌ yaꞌhuërin. Nani Yosë shaꞌhuitërinpoaꞌ niꞌton, “Quisocristosoꞌ Yosë huiꞌnin chachin. Ina nichaꞌërinpoaꞌ,” tënëhuaꞌ. 10Yosë nani shaꞌhuitërinpoaꞌ niꞌton, imarëhuasopita nitotërëhuaꞌ. Cancanënpoa quëran anitotërinpoaꞌ. Aꞌnapitaso nipirinhuëꞌ, co Yosë natëpihuëꞌ. “Quisoso co Yosë huiꞌninhuëꞌ. Co nichaꞌësarinpoahuëꞌ,” taꞌtonaꞌ, Yosëri nonpintërinso pochin cancantopi. Noꞌtëquën shaꞌhuitopirinpoahuëꞌ, co natëpihuëꞌ. 11Yosësoꞌ huëntonënquë ayaꞌconinpoaꞌ ina pochin nanpicaso marëꞌ. Huiꞌnin chachin anoyacancantërinpoaꞌ nanpimiatacaso marëꞌ, tënëhuaꞌ. 12Yosë huiꞌnin yaꞌcoancantohuachinpoaꞌ, nanpimiatarihuaꞌ. Coꞌsoꞌ ina imapatëhuahuëꞌ, co nanpimiatarihuahuëꞌ.
Chiníquën cancantatëhuaꞌ, imamiatahuaꞌ
13Canpitasoꞌ Quisocristo natëramaꞌ. “Inasoꞌ Yosë huiꞌnin niꞌton, imasarahuë,” topatamaꞌ, huëntonënquë nani ayaꞌconinquëmaꞌ. Ina nohuitatomaꞌ, nanpimiatarama. Ina nitotacamaso marëꞌ ninshitaranquëmaꞌ. 14Yosë nontohuatëhuaꞌ, natanarinpoaꞌ. Ina nohuantërinso chachin natanpatëhuaꞌ, noya nataninpoaꞌ. 15“Noya nataninpoaꞌ,” taꞌtëhuaꞌ, ina ninahuaꞌ nohuantërinso chachin quëchinpoaꞌ. “Co onporontaꞌ nonpintarinpoahuëꞌ, acotarinpoaꞌ,” taꞌtëhuaꞌ, noya cancantarihuaꞌ.
16Aꞌnaquën Yosë imamiataponahuëꞌ, co noyahuëꞌ ninin. Co Yosë aꞌpoaponahuëꞌ, oshahuanin. Inapita marëꞌ Yosë nontahuaꞌ anoyacancanchin. Aꞌnaquënso nipirinhuëꞌ imapirinhuëꞌ, co noyahuëꞌ yonquiaton, Quisocristo chachin aꞌpomiatërin. Aꞌpomiatohuachina, chiminpi pochin cancantantapi. Co inapita marëꞌ Yosë nontacasoꞌ yaꞌhuërinhuëꞌ. 17Co noyahuëꞌ nipachinaꞌ, oshahuanpi. Nipirinhuëꞌ, co Yosë aꞌpomiatohuachinahuëꞌ, chaꞌësapi.
18Yosëri imarinsopita huëntonënquë ayaꞌconin. Noyasáchin nicacasoꞌ yaꞌhuërin. Yosë huiꞌnini chachin aꞌpaiarin. Sopairi yanonpintopirinhuëꞌ, Quisocristori catahuarin niꞌton, co sopairi minsëarinhuëꞌ.
19Imarëhuasopitasoꞌ Yosë huiꞌninpitanpoaꞌ ninëhuaꞌ. Aꞌnapitaso nipirinhuëꞌ co imapihuëꞌ niꞌton, sopairi huaꞌanëntërin. Camaihuachina, ina natëpi. Ina nitotërëhuaꞌ.
20Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ. 21Apiaꞌhuaroꞌsaꞌ. Mamanshiroꞌsasoꞌ, co moshacasoꞌ yaꞌhuërinhuëꞌ. Yosëíchin chinotahuaꞌ. Nani huachi.
Coansha
Currently Selected:
1 Juan 5: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.