2 Tesalonicenses 3
3
Yosë nontacasoꞌ yaꞌhuërinsoꞌ
1Iporasoꞌ iyaroꞌsaꞌ, quiya marëntaꞌ Yosë nontocoꞌ nanamën noya aꞌchinaꞌhuaiso marëꞌ. Yaꞌipi parti nahuinacaso yaꞌhuërin. Canpitasoꞌ natanatomacoi, noya imaramaꞌ. Aꞌnapitantaꞌ aꞌchintohuatoi, noya nohuanchinaꞌ. Canpita pochachin noya imainaꞌ. Ina marëꞌ Yosë nontocoꞌ. 2Aꞌnaquënso nipirinhuëꞌ co yaimapihuëꞌ. Paꞌpi co noyahuëꞌ cancantopi. Noꞌhuitonacoi, yaahuërinacoi ama aꞌchinaꞌhuaiso marëhuëꞌ. Yosë nontocoꞌ inapita quëran nichaꞌëincoi. 3Tata Yosëso nipirinhuëꞌ co onporontaꞌ naniantërinpoahuëꞌ. Achinicancaninpoaꞌ. Sopai yaminsëpirinpoahuëꞌ, ina niꞌsarinpoaꞌ. Catahuarinpoaꞌ sopai minsëcasoꞌ. 4Pënënpatëinquëmara, noya natëramacoi. Co aꞌpoatomahuëꞌ, imamiataramaꞌ. Yosë catahuarinquëmaꞌ niꞌton, noya imasaramaꞌ, tënahuë. 5Yosë catahuainquëmaꞌ ina nosororinpoasoꞌ naꞌcon yonquicamaso marëꞌ. Parisitopiramahuëꞌ, achinicancainquëmaꞌ Quisocristo pochin ahuantacamaso marëꞌ.
Sacatacasontaꞌ yaꞌhuërinsoꞌ
6Sinioro Quisocristo nanan quëtërincoi niꞌton, noꞌtëquën iyaroꞌsaꞌ pënënainquëmaꞌ. Aꞌnaquëmasoꞌ imapomarahuëꞌ, co sacatatomahuëꞌ, nisha nisha yonquiramaꞌ. Yosë nanamën noꞌtëquën aꞌchintopirainquëmahuëꞌ, co natëramacoihuëꞌ. Insosona inapohuachin, ama inapitarëꞌquëmaꞌ nipayacosohuëꞌ. 7Nani nitotëramaꞌ noya nicacamasoꞌ. “Nonancoi,” itërainquëmaꞌ. Canpitataquë yaꞌhuasocoi, co quiyasoꞌ topinan yaꞌhuëraihuëꞌ. Co chiroraihuëꞌ. 8Co aꞌna piyapi cosharonën topinan maꞌparaihuëꞌ. Nani tahuëri chiníquën sacatërai. Tashirë chachin sacatërai ama topinan maꞌpataꞌhuaiso marëhuëꞌ. 9Huaꞌquiꞌ aꞌchintërainquëmaꞌ niꞌton, noya topinan maꞌpatacaso nipirinhuëꞌ, co topinan maꞌparainquëmahuëꞌ. Sacatatoi, maꞌsha paꞌanai. Noya sacatërai nonanamacoiso marëꞌ. 10Canpitataquë yaꞌhuasocoi, pënënainquëmaꞌ. “Insosona co yasacatohuachinhuëꞌ, ama coshachinsohuëꞌ,” itërainquëmaꞌ. 11Nanan nani natantërahuë. Aꞌnaquëmaꞌ co yasacatatomahuëꞌ, topinan paꞌsáramaꞌ. Naporahuaton, maꞌtoma maꞌtoma nonatomaꞌ, piyapiꞌsaꞌ chinotëramaꞌ, natantërahuë. 12Sinioro Quisocristo nanan quëtërinco niꞌton, pënënaranquëmaꞌ: Ama huachi iyaroꞌsaꞌ ina pochin cancantocosohuëꞌ, tënahuë. Sano yonquiatomaꞌ, noya sacatocoꞌ pahuantërinquëmasoꞌ paꞌanacaso marëꞌ.
13Naꞌaquëmaꞌ iyaroꞌsaꞌ noya nisaramaꞌ. Ama amiatomaꞌ, nisha cancantocosohuëꞌ. Nani tahuëri noya nicoꞌ. 14Nani ninshitatoi, pënënainquëmaꞌ. Inso tërantaꞌ co yanatëhuachincoihuëꞌ, pënëncoꞌ. Co natëtohuachinahuëꞌ, ama inapitarëꞌquëmaꞌ nipayacosohuëꞌ oshanëna marëꞌ tapainaꞌ. 15Napoaponahuëꞌ, ama inimico pochin nicatomaꞌ, noꞌhuicosohuëꞌ. Iyaparima pochin nicatomaꞌ, sanoanan quëran pënëncoꞌ.
Asanocancaninpoasoꞌ
16Sinioroíchin asanocancaninpoaꞌ. Ina catahuainquëmaꞌ sano cancantacamaso marëꞌ. Maꞌsona onpopiramahuëntaꞌ, nani tahuëri catahuainquëmaꞌ ama paꞌyanacamaso marëhuëꞌ. Nani tahuëri noya aꞌpainquëmaꞌ.
17Ca Paonoco caora imirahuë quëran piꞌpian ninshitaranquëmaꞌ saludos aꞌpataꞌhuanquëmaso marëꞌ. Nani quirica ninshitërahuëquë iso pochin ninshitërahuë. Ina nicatomaꞌ, nitotaramaꞌ: “Paono mini ninshitërinpoaꞌ,” tosaramaꞌ. 18Sinioro Quisocristo inaora nohuanton, nosoroatënquëmaꞌ, yaꞌipinquëmaꞌ catahuainquëmaꞌ. Nani ninshitëranquëma huachi.
Paono
Currently Selected:
2 Tesalonicenses 3: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.