2 Tesalonicenses 2
2
Yosë inimiconën yaꞌnocasoꞌ yaꞌhuërinsoꞌ
1Apira iyaroꞌsaꞌ oꞌmantacasoꞌ tahuëri piꞌpian aꞌchinchinquëmaꞌ. Sinioro Quisocristo oꞌmantahuachin, nacapirahuatëhuaꞌ, pantarihuaꞌ. 2Aꞌnaquënso nipirinhuëꞌ co noꞌtëquën nitotopihuëꞌ. “Oꞌmantacasoꞌ tahuëri nani nanirin,” itohuachinquëmaꞌ, ama paꞌyancosohuëꞌ. Ama nisha nisha yonquicosohuëꞌ. Aꞌnaquën tapon: “Cari ninorahuë. Oꞌmantacasoꞌ tahuëri nani nanirin,” itohuachinquëmaꞌ, ama natëcosohuëꞌ. Aꞌnantaꞌ tapon: “Nanirin mini. Paono chachin naponinshitërincoi,” itopirinënquëmahuëꞌ, ama ina natëcosohuëꞌ. 3Niꞌcona nonpintochinënquëmaꞌ. Coꞌhuara Quisocristo oꞌmayátërasohuëꞌ, notohuaroꞌ piyapiꞌsaꞌ Yosë aꞌpoapi. Co piꞌpian tërantaꞌ yanatërapihuëꞌ. Naporoꞌ aꞌna quëmapi yaꞌhuapon. Yaꞌipi piyapiꞌsaꞌ nonpintarin ama Yosë imacaiso marëhuëꞌ. Paꞌpi co noyahuëꞌ nisarin. Sopairi noyá yaꞌcoancantërin niꞌton, chiníquën anaꞌintacasoꞌ yaꞌhuërin. Ayaroꞌ tahuëri Yosëri anaꞌintaton, parisitopiquë aꞌpararin. 4Inasoꞌ Yosë inimicotërin. “Ama Yosë chinotocosohuëꞌ. Ama mantaꞌ moshacosohuëꞌ. Casáchin natëco. Yosë yaꞌhuërëtarahuë,” tosarin. Yosë chinotopiso pëiquë chachin huënsëapon piyapiꞌsari chinotacaiso marëꞌ. Paꞌpi co noyahuëꞌ nisarin. Chiníquën nanantaton, yaꞌipi piyapiꞌsaꞌ yacamaiapon.
5Canpitataquë yaꞌhuapo, nani shaꞌhuitëranquëmaꞌ. ¿Ina naniantaramaꞌ ti? 6Tahuëri nanihuachin, ina quëmapi huëꞌsarin. Yosë inimiconën inasoꞌ. Yosë nohuanton, macarisona yaꞌcopiarin niꞌton, co iporasoꞌ huëꞌshatërarinhuëꞌ. Ina nitotëramaꞌ. 7Co Yosë inimiconën yaꞌnoyatëraponahuëꞌ, ipora chachin co incari tërantaꞌ nitotopirinahuëꞌ, nani sacatapi Yosë inimiconën huaꞌanëntacaso marëꞌ. Aꞌna tahuëriso nipirinhuëꞌ, Yosë nohuanton, yaꞌcopirinsoꞌ capa nipachin, Yosë inimiconën yaꞌnorarin. 8Yaꞌnohuachin, piyapiꞌsaꞌ aquë aquëtëꞌ co noyahuëꞌ cancantapi. Inari camaihuachin, notohuaroꞌ piyapiꞌsari natëapi. Ayaroꞌ tahuëriso nipirinhuëꞌ, Sinioro Quisosori anaꞌintarin. Huënaráchin huënaráchin oꞌmantahuachin, minsëarin. Topinan noncharapirinhuëꞌ, ataꞌhuantarin. Co huachi nanitarinhuëꞌ piyapiꞌsaꞌ nonpintacasoꞌ. 9Nipirinhuëꞌ, coꞌhuara ina oꞌmayatërasohuëꞌ, notohuaroꞌ piyapiꞌsaꞌ nonpintarin. Satanasëri catahuarin niꞌton, nani maꞌsha nanitapaarin nicacasoꞌ. Piyapi inaora co nanitërinhuëꞌ ina pochin nicacasoꞌ. Nonpintaton, nani maꞌsha sacaiꞌ nininsoꞌ aꞌnotohuachina, natërapi. Niꞌpachinaꞌ, paꞌyanapi. 10Co noyahuëꞌ nicaton, naꞌa piyapiꞌsaꞌ nonpintarin. Co noꞌtën nanan nohuantopihuëꞌ niꞌton, Yosë inimiconën natëapi, parisitopiquë paꞌsapi huachi. Yosë nanamën nohuantopi naporini, chaꞌëitonahuëꞌ. 11Napoaton, Yosëri tananpitarin nonpin nanan natëcaiso marëꞌ. Sopai nohuanton, natëapi. 12Co noꞌtëquën yonquiatonahuëꞌ, co noyahuëꞌ nicacaisoꞌ paꞌyatapi. Ina pochin cancantopi niꞌton, Yosëri anaꞌintarin.
Yosëri huayonin nichaꞌëcaso marëꞌ
13Canpitaso nipirinhuëꞌ iyaroꞌsaꞌ, imaramaꞌ. Sinioro nosororinquëmaꞌ. Iráca quëran huarëꞌ Yosë huayoninquëmaꞌ huëntonënquë yaꞌconacamaso marëꞌ. Noꞌtën nanan natëhuatamaꞌ, Ispirito Santo anoyacancantërinquëmaꞌ Yosë nohuantërinso chachin nicacamaso marëꞌ. Ina yonquiatoi, Yosë nontërai: “Ma noya Sinioro inapitasoꞌ nichaꞌëran niꞌton, ‘Yosparinquën,’ ” itërai, Yosë nontatoi. 14Yosë nanamën aꞌchintohuatëinquëmara, canpitantaꞌ imaramaꞌ. Yosë acorinquëmaꞌ Sinioro Quisocristo pochin nicacamasoꞌ. Aꞌna tahuëri oꞌmantahuachin, ina pochin yaꞌnoaramaꞌ.
15Napoaton iyaroꞌsaꞌ, chiníquën cancantatomaꞌ, yaꞌipi cancanëma quëran imacoꞌ. Canpitataquë yaꞌhuasocoi, noꞌtëquën aꞌchintërainquëmaꞌ. Ina quëran quirica aꞌpatëranquëmaꞌ naꞌcon naꞌcon nitotacamaso marëꞌ. Noꞌtën nanansáchin imamiatocoꞌ. 16Sinioro Quisocristo catahuainquëmaꞌ chiníquën cancantacamaso marëꞌ. Inaora nohuanton, Tata Yosëntaꞌ nosoroatonpoaꞌ, achinicancamiatërinpoaꞌ. Aꞌna tahuëri yaꞌhuërinquë chachin quëpantarinpoaꞌ. Shaꞌhuitërinpoaꞌ niꞌton, ina ninarëhuaꞌ. 17Ina yonquiatoi, canpita marëꞌ Yosë nontarai. “Nani tahuëriya Sinioro catahuaquëꞌ, chiníquën cancanchinaꞌ. Achinicancanquëꞌ noyasáchin niinaꞌ. Catahuaquëꞌ noyásha noinaꞌ,” itërai.
Currently Selected:
2 Tesalonicenses 2: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.