2 Samuel 6
6
Siniororë anoyatopiso caposonën Tapiri yaquëparinsoꞌ
1Aꞌna tahuëri Tapisoꞌ sontaronënpita ayontoantarin. Yaꞌipi Israiro huëntonoꞌsa quëran huayonaton, cara shonca huaranca ayontonin. 2Inapitarë chachin Quirosarin quëran paꞌnin. Paꞌsahuatonaꞌ, Quiriato-quiarimoquë canconpi. Inaso ninanoꞌ, Paara itopi antaꞌ. Cota huënton noꞌpanënaquë yaꞌhuërin. Siniororë anoyatopiso caposonën macaton Quirosarinquë quëpacaso marëꞌ inatohua paꞌnin. (Israiroꞌsasoꞌ, Sinioro yaꞌipi nanitaparinsoꞌ chinotopi. Ina caposo aꞌtanamënquë, Sinioroso huaꞌanëntërinso shiranën yaꞌhuëtërin. Cato quiropinoꞌsa nonanpisoꞌ huáncana yaꞌhuërin.) Yaꞌhuërinso ninanoquë acocaso marëꞌ Tapiri yaquëparin.
3-4Apinatapo itopisosoꞌ, motopiaꞌhua huiꞌnimotënꞌpaꞌ pëinën yaꞌhuëtërin. Inaquë canconahuatonaꞌ, aꞌnaquëni Siniororë anoyatopiso caposonën ocoiconpi. Ina quëran nasha toronan nininquë aꞌmitëpi. Cato torori ina toronansoꞌ ohuarararin. Apinatapo huiꞌninpitari ótëërapi. Inapitasoꞌ Aiyo, Osa, inapita. Aiyosoꞌ, quëchitërarin. Osasoꞌ, piquëran paꞌsarin. 5Tapisoꞌ, aꞌnapitarë chachin imatatonaꞌ, cantararapi. Nansararapi. Yaꞌipi cancanëna quëran naporarapi. Aꞌnaquën nisha nisha nininsopita piꞌnirarapi: Arpa, nisha quitara, pantirita, pirinan, huaꞌna shari shari, inapita piꞌnirasoiꞌ, naporarapi.
6Nacon itopisoꞌ trico toꞌnorarinquë canquiasoi chachin tororoꞌsasoꞌ, iꞌpaconpi. Ina nicaton Osasoꞌ, Sinioro caposonën pitë pitëtëarin: “Anotarin,” taꞌton naporin. 7Siniororiso napoaponahuëꞌ, naporinso marëꞌ Osa paꞌpi noꞌhuirin. Noꞌhuiton inaquë chachin tëparin. Caposonën pirayan anotaton chiminin. 8Ina nicaton Tapinta paꞌpi noꞌhuitërin. Siniorori Osa tëparinso marëꞌ naporin. Napoaton ina roꞌtësoꞌ apoyatërin: “Pirisi-osa#6.8 Pirisi-osasoꞌ: Osa pëꞌsarapiquë tapon naporin.” itërin nohuitaton. Napoaton iso quirica ninshitasoco huarëntaꞌ, ina chachin ina noꞌpaꞌ nohuitapi. 9Naporo tahuëri Tapisoꞌ Sinioro paꞌpi tëꞌhuatërin. Tëꞌhuataton chiníquën nonin: “¡Siniororëꞌquënpoa anoyatërëhuaso caposonën co onporo quëpaꞌhuaso yaꞌhuërinhuëꞌ!” tënin. 10Co huachi quëpachináchinhuëꞌ cancantaton, piyapinënpita camairin: “Opito-itomo itopisoꞌ pëinënquëꞌpaꞌ acooncoꞌ,” itërin. Opito-itomosoꞌ, huiristino quëmapi. Cato ninanoquë yaꞌhuëpirinhuëꞌ, iporasoꞌ israiroꞌsa yacaparin.
11Tapi camaitohuachina, piyapinënpitaso ina inachachin nipi. Cara yoqui Opito-itomo pëinënquë Sinioro caposonën yaꞌhuërin. Inaquë yaꞌhuëhuachina, Siniorori saꞌin, huiꞌninpita, inapita catahuamiatërin.
Sinioro caposonën Quirosarinquë quëꞌcancontapisoꞌ
12Aꞌnaquën israiroꞌsari Tapi shaꞌhuitopi: “Sinioro caposonën Opito-itomo pëinënquë acoran niꞌton, Siniorori ina catahuamiatërin. Quëmopinënpita, maꞌshanënpita, inapita catahuamiatërin,” itopi. Ina natanaton, piyapinënpitarë chachin paꞌnin. Capa cancantaton Opito-itomo pëinën quëran ocoirin. Ocoirahuaton Quirosarinquë quëparin. 13Sinioro caposonën pitënpisopita paꞌsapi. Saota achiíchin paasoiꞌ, Tapiso aꞌnara toro Sinioro marëꞌ atëpatërin. Aꞌnara carnirontaꞌ, amoshin nininso ina marë chachin atëpatërin. 14Tapisoꞌ, aꞌnara ipoto rino piꞌshi quëran nipisoꞌ aꞌmorin. Ina aꞌmosahuaton yaꞌipi cancanën quëran Sinioro marëꞌ nansaraarin. 15Sinioro caposonën quëpapisopita caꞌtanpisopitasoꞌ, capa cancantatonaꞌ: “Yai, yai,” charapi. Tapinta napórarin. Aꞌnaquëontaꞌ, tronpitaroꞌsa pihuiraapi.
16Sinioro caposonën Quirosarinquë quëꞌcanconpi. Napohuachinara, Saonocoꞌ huiꞌnin Micaro itopisosoꞌ, huintananën quëran nocotiirin. Nocotopirinhuëꞌ, soꞌinsoꞌ nansaton pashi pashitëriarin. Sinioro chinotaton napóriapirinhuëꞌ, inarisoꞌ co yainyántërahuëꞌ, niꞌnin. 17Coꞌhuara Sinioro caposonën maconchátërasoihuëꞌ, Tapisoꞌ piyapinënpita camairin: “Sinioro caposonën acocaso marëꞌ nëꞌmëtë pëi nitatomaꞌ, ótëncoꞌ,” itërin. Napotohuachina piyapinënpitasoꞌ, ina inachachin nipi. Napoaton Sinioro caposonën pitënpi quëran canquihuachinara, inaquë acoonpi. Naporahuaton Tapisoꞌ Sinioro chinotacaso marëꞌ maꞌsharoꞌsa yoꞌnin. Corto huaꞌanoꞌsari tëpatona aꞌnaquën oshanën marëꞌ yaꞌipi ahuiquitopi. Aꞌnaquënso nipirinhuëꞌ, nanan anoyatopiso marëntaꞌ, tëpapi. 18Nani inapita Sinioro marëꞌ ahuíquitohuachinara, yaꞌipi israiroꞌsa itapon: “Siniorosoꞌ yaꞌipi nanitaparin. Inari chachin catahuaráponquëma niꞌton, nóya yaꞌhuëaramaꞌ,” itërin. 19Inapotahuaton aꞌnaya aꞌnaya pan quëtëraꞌpiarin: Aꞌnara pan mia. Aꞌnasoꞌ pan pochin tatiro#6.19 Tatirosoꞌ: Oꞌyapi pochin nininsoꞌ. quëran nipisoꞌ. Aꞌnantaꞌ, opa ayanitopi quëran nipisoꞌ. Quëmapiꞌsaꞌ, sanapiꞌsaꞌ, quëtëraꞌpiarin. Ina piquëran yaꞌipiya yaꞌhuëpiꞌpaꞌ panantapi.
20Tapinta pëinënquë paꞌsahuaton, saꞌinpita, huiꞌninpita, inapita nontoonin. Micaroriso nipirinhuëꞌ, nacapirahuaton itapon:
Quëmasoꞌ Israiro copirnonquën nipiranhuëꞌ, co taparohuanhuëꞌ ninan. Piyapinënpita quëmapiꞌsaꞌ, sanapiꞌsaꞌ, inapita niꞌtonënquë nansaton naporan, itërin. 21Saꞌini napotohuachina, inariso itapon:
—Tëhuënchachin mini nansarahuë. Napoaporahuë Sinioro chinotato naporahuë. Tataparin yaꞌhuërënamën israiroꞌsa huaꞌanëntaꞌhuaso marëꞌ ina huayoninco. Yaꞌipi quëmopinënpita yaꞌhuërënamën huayoninco. Napoaton ina chinotato caso nansarahuë. 22Iporasoꞌ piꞌpian nansarahuë. Aꞌna tahuëriso naꞌcon naꞌcon nansahuatontaꞌ, noyatapon. Inaporahuëso marëꞌ: “Co taparohuanhuëꞌ ninan,” itëranco. Napopiranhuë tërantaꞌ, piyapinëhuëpita sanapiꞌsa nipisopitasoꞌ, noya niꞌsarinaco, itërin. 23Naporinso marëꞌ Micarosoꞌ, co huaꞌhuanaꞌpihuëꞌ quëparitërin.
Currently Selected:
2 Samuel 6: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
