2 Reyes 7
7
1Napotiihuachina, Irisiori itapon:
—Sinioro naporinso shaꞌhuichinquën natanquëꞌ: “Tashiraya ipora pochin co huachi cosharo paꞌtarinhuëꞌ. Cara quiro tricoroꞌmo, sipataroꞌmonta saota quiro nipirinhuëꞌ, aꞌnaíchin coriqui prata quëran nininsoꞌ paꞌtapon. Iso ninano yaꞌcoanaquë ina nápo marëꞌ nipaꞌantaramaꞌ,” tënin, itërin. 2Napohuachina, copirno catahuarinso huaꞌani, Irisio aꞌpaniton itapon:
—Sinioro inápaquë huintanaroꞌsa iꞌsoatopirinhuë tërantaꞌ, co naporanso chachin nisarinhuëꞌ, itërin. Napopirinhuëꞌ, Irisiori shaꞌhuitërin: “Quëmanta mini niꞌsaran. Napoaponahuëꞌ, co ina caꞌsaranhuëꞌ,” itërin.
3Catapini chana caniori maninsopita yaꞌcoana pirayan aipiran quëran yaꞌhuëpi. Inapitasoꞌ ninontatonaꞌ:
—Capa capacasoꞌ yaꞌhuëtërinpoahuëꞌ. Co isëranchin chimirin ninacaso yaꞌhuërinhuëꞌ. 4Acoana yaꞌconpatëhuaꞌ, inaquënta tanari piyapiꞌsa quëtarin. Isëranchinta ninapatëhuaꞌ, tana tëpaonpoaꞌ. Huëco paꞌahua nipachin siriaroꞌsa yaꞌhuëapiꞌpaꞌ niꞌcontaꞌahuaꞌ. Nosorohuachinënpoasoꞌ, nanpiarëhuaꞌ. Tëpahuachinënpoanta maꞌta pini. Copitochanꞌahua huachi, niitopi.
5Ninapotatonaꞌ, siriaroꞌsa yaꞌhuëapiquë yatashirahuaso paꞌsapi. Yaꞌcariconpachinara tanahuantápi quënanconpi. 6Sinioro nohuanton Siria sontaroꞌsasoꞌ, notohuaroꞌ sontaroꞌsa toronanoꞌsaquë, cahuarioroꞌsaquë, inaquëpita huëꞌsapiso pochin natanpi. Ina natanatonaꞌ: “Israiro copirnosoꞌ, Iquipito copirno, Iti copirno, inapita copirnoroꞌsa sontaronënpitarë chachin pahuërërin. Napoaton inapita ahuëaponpoa huëcapaiarinënpoaꞌ,” topi. 7Ina taꞌtona tashiroꞌporahuaso taꞌamiatopi. Nëꞌmëtë pëinëna ótënpiquëranchin patopi. Cahuarionënapita, moranënapita, inapitanta chaꞌëcaiso marëꞌ patopi.
8Chana caniohuanoꞌsaso canconahuatonaꞌ, aꞌna nëꞌmëtë pëiquë yaꞌconpi. Inaquë coshatopi, oꞌopi, napopi. Naporahuatonaꞌ, prata, oro, aꞌmocaisoꞌ, inapita mapi. Ina quëran mapisoꞌ, aquëmiachin poꞌoconpi. Naquëranchin huënantarahuatonaꞌ, aꞌna nëꞌmëtë piëquë yaꞌhuërëꞌ yacoantarahuatona inapoantapi. 9Naporápi quëran inahua capini:
—Canpoa marëáchin maꞌsha macatëhuaꞌ, canpoasoꞌ co noyahuëꞌ nisarëhuaꞌ. Iporasoꞌ noya nanan shaꞌhuicasoꞌ yaꞌhuëpirinhuëꞌ, co shaꞌhuirëhuahuëꞌ. Tahuëri huarëꞌ shaꞌhuihuatëhuasoꞌ, anaꞌintaponënpoaꞌ. Ipora chachin paꞌsahuatëhua copirno pëinënquë siriaroꞌsa taꞌapisoꞌ shaꞌhuicontaꞌahuaꞌ, niitopi.
10Ninapotatonaꞌ, Samariaꞌpaꞌ paantapi. Cancontarahuatonaꞌ, aꞌpaito sontaroꞌsa shaꞌhuitoonpi:
—Siriaroꞌsa yaꞌhuëapiquë paꞌpiraihuëꞌ, co manta yaꞌhuëpihuëꞌ. Cahuarioroꞌsaꞌ, moraroꞌsantaꞌ, aꞌsonpiquëranchin yaꞌhuëapi. Nëꞌmëtë pëiroꞌsanta ótënpiquëranchin nisapi, itopi. 11Ina natanatonaꞌ, inahuaso Copirno pëinën aꞌpaipisopita përatona shaꞌhuitopi. 12Copirnonta natantahuaton, tashi nipirinhuëꞌ huënsërin. Ina quëran huaꞌanoꞌsa ayontonahuaton itapon:
—Maꞌsona siriaroꞌsa yaonpotërinpoasoꞌ, carima shaꞌhuichinquëmaꞌ. Tana quëtárinpoasoꞌ nani nitotatonaꞌ, yamonarinënpoaꞌ: “Yaꞌhuëarëhuaso patatëhuaꞌ, naꞌpiahuaꞌ. Inapohuatëhua israiroꞌsasoꞌ, yaꞌhuëpi quëran pipirahuatona huëꞌsapi. Inapohuachina ama tëparihuarahuëꞌ camaicaso marëꞌ maahuaꞌ,” nitopi ipora. Ina pochin yonquiatona naporapi, itërin. 13Aꞌna huaꞌanso napoaponahuëꞌ, tapon:
—Aꞌnatërapoíchin cahuario quëparitërin. Napoaton inaquë yaꞌmitëatonaꞌ, niꞌcontacaiso marëꞌ sontaroꞌsa paꞌinaꞌ. Nanpihuachinaꞌ, noyatapon. Chiminpachinantaꞌ, noyatapon chachin. Canpoanta isëquë co noya yaꞌhuëáparihuahuëꞌ, tënin.
14Napohuachina, cato toronanquë cahuarioroꞌsa aꞌsontahuatonaꞌ, sontaroꞌsa ina marëꞌ aꞌpapi. 15Inapitasoꞌ paꞌsahuatonaꞌ, cortaniiꞌpaꞌ huarëꞌ taꞌapiso imapi. Yaꞌipi ira nani chachin nëꞌmëtë, maꞌsha, inapita otapisoꞌ niraapi. Ina quëran huënantarahuatonaꞌ, niꞌpiso copirno shaꞌhuitiintapi. 16-18Ina natanahuatonaꞌ, siriaroꞌsa yaꞌhuëapiquë paꞌpi. Yaꞌipiya quëran paꞌsahuatona maꞌsha mamiatopi. Napoaton Siniorori Irisio quëran shaꞌhuirinso chachin cara quiro tricoroꞌmo, sipataroꞌmonta saota quiro, nipirinhuëꞌ, aꞌnaíchin coriqui prata quëran nininquë nipaꞌantopi. Samaria ninano yaꞌcoanaquë napopi. Copirnosoꞌ, catahuarinsoꞌ huaꞌan ninano yaꞌcoana aꞌpaicaso marëꞌ acorin. Acopirinhuëꞌ, huaꞌhuayátërahuë piyapiꞌsa pipitona yaꞌtaatopi. Inapotatona toꞌpi toꞌpitopi niꞌton, chiminin. Irisiori shaꞌhuitërinso chachin nitopi. 19Irisiori co huachi cosharo paꞌtacasoꞌ shaꞌhuihuachina, inaso co natëtonhuëꞌ: “Sinioro inápaquë huintanaroꞌsa iꞌsoatopirinhuë tërantaꞌ, co naporanso chachin nisarinhuëꞌ,” itërin. Napopirinhuëꞌ, Irisiori naporo shaꞌhuitërin: “Quëmanta mini niꞌsaran. Napoaponahuëꞌ, co ina caꞌsaranhuëꞌ,” itërin. 20Napotërinso chachin ninin. Piyapiꞌsari ninano yaꞌcoanaquë toꞌpi toꞌpitahuatona tëpapi.
Currently Selected:
2 Reyes 7: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
