2 Reyes 5
5
Namano chana canio quëran noyatërinsoꞌ
1Siria copirno sontaronënpita huaꞌanën, Namano itopi. Inasoꞌ, Copirnori nóya niꞌnin. Siniorori ina huaꞌan quëran siriaroꞌsa catahuarin inimiconënpita minsëpi. Napoaton nóya niꞌnin. Napoaponahuëꞌ, inaso chana caniori manin.
2Iꞌhua chachin siriaroꞌsasoꞌ, israiroꞌsarë niahuëpi. Naporoꞌ siriaroꞌsasoꞌ, aꞌnara Israiro sanapiaꞌhua mapi. Siria parti quëpahuachinara, Namano saꞌini camaicaso marëꞌ manin. 3Aꞌna tahuëri inasoꞌ, patronanën itapon:
—Samariaquë aꞌnara pënëntonaꞌpi yaꞌhuërin. Ina nicapon huaꞌanëhuë paꞌnin naporini, chana canio yaꞌhuëtërin quëran noyachitonhuëꞌ, itërin.
4Ina natanaton, sanapisoꞌ, soꞌin shaꞌhuitërin. Inasoꞌ, paꞌsahuaton ina chachin copirno shaꞌhuitoonin. 5Ina natanahuaton copirnosoꞌ:
—Noyapaꞌ. Paquë inatohua nipachin. Cari ninshitahuato ina pochin Israiro copirno quirica aꞌpatarahuë, itërin.
Napotohuachina, Namanoso inatohua pacacaso marëꞌ tapatarin. Cara shonca huaranca coriqui prata quëran nininsopita manin. Saota huaranca coriqui oro quëran nininsopitanta manin. Aꞌmocaisontaꞌ, shonca manin. Yaꞌipi inapitasoꞌ, anoyatohuachina quëtacaso marëꞌ quëpatapon. 6Quiricanta copirnori ninshitërinsoꞌ, masahuaton israiroꞌsa yaꞌhuëpiso parti huëꞌnin. Canquirahuaton Israiro copirno quirica aꞌnotiirin. Inaquë ninshitaton naporin: “Iso quirica nontohuatan, carinquën Namano aꞌpataranquënso nitotaran. Inasoꞌ, sontaronëhuëpita huaꞌanën. Chana caniori manin quëran anoyatamaso marëꞌ aꞌpataranquën,” tënin. 7Nontohuachina, inaso paꞌyanin. Inapoaton aꞌmorinso osharin. Inaporahuaton piyapinënpita natantonënquë tapon:
—¡Co caso Yosëcohuëꞌ! Inacha tëhuënchinsoꞌ nohuantërinsopita ananpirin. Nohuantërinsopitasoꞌ, chiminpi. Siria copirnosoꞌ, co chana caniori maninso anoyataꞌhuaso marëꞌ aꞌpatiincoso yaꞌhuërinhuëꞌ. Inta yonquirico canpitantaꞌ. Ahuëinënpoaso yonquiaton napotarinco inasoꞌ tënahuë, tënin.
8“Quirica aꞌpatopiso nontaton copirnonënpoasoꞌ, aꞌmorinso osharin,” topisoꞌ, Irisio natantërin. Ina natanaton, iso pochin nanan aꞌpatërin: “¿Onpoatonta aꞌmoranso osharan? Quëmapi huëꞌninsoꞌ, shaꞌhuitëquë niꞌquiinco. Niꞌpachinco, tëhuënchachin Israiro noꞌpaquë pënëntonaꞌpi yaꞌhuërinsoꞌ, nitotarin,” taꞌcaso nanan aꞌpatërin.
9Namanoso ina nitotaton, toronanënquë paꞌnin Irisio nicapon. Pëinën yaꞌcoanaquë huarëꞌ canconahuaton, chiniconin. 10Inaquë nipachina, Irisiori aꞌnara comision camairin shaꞌhuitacasoꞌ: “Naporin pënëntonaꞌpi: ‘Paaton cortaniiꞌpaꞌ canchisëro yaꞌcoitëquëꞌ. Inapohuatan, chana canio maninquënso inquiaran,’ tënin,” itoonin. 11Ina natanaton, Namanoso noꞌhuitërin:
—Sëëshi. Pipirahuaton taꞌma Sinioro nontapon. Ina quëran chanatërahuëquë sëꞌhuarahuaton, inquitarinco, topirahuë. 12Tamascoquënta iiroꞌsa yaꞌhuërin. Apana, Huara huara, inapita. Ina iiroꞌsasoꞌ, yaꞌipi Israiro iiroꞌsa quëran noya noya. ¡Inaquënta paato yaꞌcoitërahuë naporini, noyachitohuë nimara! tënin. Napoaton noꞌhuitërachinin paꞌnin. 13Paꞌsapirinhuëꞌ, piyapinënpitari yaꞌcarirahuatonaꞌ:
—Sinioro. Sacai nininsonta pënëntonaꞌpi shaꞌhuitërinquën naporini, aꞌnaroáchin natëitonhuëꞌ. Aquëtë huarëꞌ iporasoꞌ, co sacaiyátërahuëꞌ camairinquën. Yaꞌcoitohuatan noyataran, itopi. 14Napotohuachinara, paꞌsahuaton Irisiori camairinso chachin ninin. Canchisëro Cortaniiquë yaꞌcoitërin. Napohuachina noyataton huiꞌnapiraꞌhua pochin shaꞌhuëtëtërin.
15Nani noyatohuachina yaꞌipi caꞌtaninsopitarë chachin Irisio nicapona panantapi. Cantonahuaton:
—Yaꞌipi isoroꞌpaquë nisha nisha mamanshi moshapirinahuëꞌ, co inapitaso Yosëhuëꞌ. Isëquësáchin Yosëso yaꞌhuërin tënahuë. Ina nitotato, quëshiranquënsopita maquë topirahuë, itërin.
16—Yoscoarëꞌ co manta maꞌparanquënhuëꞌ, itërin Irisiori. Namanori apisápirinhuëꞌ, co nohuanchátërarinhuëꞌ maꞌpacasoꞌ. 17Napohuachina Namanori itapon:
—Co manta yamaꞌparancohuëꞌ niꞌquëhuarëꞌ, carin nipachin natainquën quëtoco. Cato mora pëꞌpërinsoꞌ noꞌpanëma masarahuë. Yaꞌhuërahuë roꞌtëquë canconpato, ina quëran Sinioro chinotaꞌhuaso marëꞌ artaro nisarahuë. Ipora quëran huarëꞌ caso, co huachi mamanshiroꞌsa marëꞌ maꞌsha tëpato chinotapohuëꞌ. Sinioroíchin marëꞌ maꞌsharoꞌsa tëpato, aꞌnaquën yaꞌipi ahuiquitapo. Aꞌnaquënsoꞌ, tomaquënsaꞌ ahuiquitapo. Inapohuato, canta Sinioroíchin chinotapo huachi. 18Napoaponahuëꞌ inaquë nipato, Nimon mamanshi moshacaiso pëiquë copirnonëhuë caꞌtanarahuë. Inaso moshatacaso marëꞌ matanparahuatonco isonpachin, canta isonarahuë. Ama ina marëꞌ Sinioro anaꞌinchincosohuëꞌ, tënahuë.
19—Co anaꞌintarinquënhuëꞌ. Noya paquëꞌ, itërin Irisiori. Napotohuachina, Namanoso paꞌsarin huachi.
Amasha paasoꞌ, 20Irisio piyapinënso yonquirin: “Huaꞌanëhuësoꞌ, Namano co manta maꞌpaponahuëꞌ aꞌparin. Yoscoarëꞌ cari imasarahuë. Tapona maꞌsha tëranta maꞌparahuë,” tënin.
21Inapo yonquiaton, taꞌarëꞌnachin imarin. Nincantoonpachina Namanori nohuitahuaton nohuararin:
—¿Maꞌta onporamaꞌ? itërin.
22—Co manta onpopiraihuëꞌ, huaꞌanëhuë aꞌparinco nontaꞌhuanquënso marëꞌ. Naporin: “Cato pënëntonaꞌpi huiꞌnapiꞌsaꞌ, Iprain huënton motopiroꞌsa quëran nicaponaco canquipi. Napoaton inapita quëtaꞌhuaso marëꞌ cara huaranca coriqui prata quëran nininsoꞌ, nohuantaparanquën. Ina nisahuaton cato aꞌmocasontaꞌ, nohuantërahuë,” tënin, itërin. 23Napotohuachina:
—Noyapaꞌ. Onpopionta saota huaranca maquëꞌ, itárin. Napotápachina, anohuantërin. Napoaton cato tanpanantëquë aꞌmocaisorë chachin coriqui poꞌmotërin. Inapotahuaton cato piyapinënpita camairin pëꞌpëtacaisoꞌ.
24Motopiaꞌhuaquë canconpachinara, tanpanantëroꞌsa maꞌparin. Ina quëran Namano piyapinënpitaso nontahuaton, huaꞌanënaꞌpaꞌ aꞌparin. Nani paꞌpachinara, maꞌpatërinso masahuaton, pëiquë noyá taparin.
25Inapotahuaton, huaꞌanën nicapon paꞌnin. Cantonpachina huaꞌanëni:
—¿Intohuaranta huëꞌsaran? itërin.
—Co caso intohua tëranta paꞌnahuëꞌ, itërin inarisoꞌ. 26Huaꞌanëniso napoaponahuëꞌ, chiníquën nontaton:
—Namano nontiinquënso marëꞌ toronanën quëran nohuararin. Inapoaso cantaꞌ, ninoto inaquë niꞌnanquën. Quëmasoꞌ: “Coriqui, aꞌmocasoꞌ, inapita maꞌpatacasoꞌ, noya. Oripororoꞌsaꞌ, oparoroꞌsaꞌ, ohuicaroꞌsaꞌ, tororoꞌsaꞌ, piyapinta camaicaso marëꞌ quëmapiꞌsaꞌ, sanapiꞌsaꞌ, inapitanta paꞌanacasoꞌ, noya antaꞌ,” tocomaranquën. ¡Co naporinhuëꞌ! ¡Co ina pochin nanpicaso tahuërihuëꞌ! 27Co ina pochin yonquiranso marëhuëꞌ, Namano chana canio inquirinsoꞌ, quëmaquë paꞌsarin. Quëmá quëran pipipisopitantaꞌ, inanpihuanaponaꞌ. Co onporonta inquiapihuëꞌ, itërin. Napotohuachina piyapinënsoꞌ paꞌnin. Paaso chachin chana caniori pipitohuachina, ocai pochin huirihuantërin paꞌnin huachi.
Currently Selected:
2 Reyes 5: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
