2 Corintios 6
6
1Yosë acorincoi nanamën aꞌchinaꞌhuaiso marëꞌ. Acoatoncoi, catahuarincoi aꞌchintaꞌhuainquëmaso marëꞌ. “Yosë nosoroatonpoaꞌ, yanichaꞌërinpoaꞌ,” itërainquëmaꞌ. Ama topinan quëran natancosohuëꞌ. Imaco huachi. 2Iráca quiricanën quëran Yosë naporin:
“Ipora chachin yacatahuaranquëmaꞌ. Nontohuatamaco, natanaranquëmaꞌ.
Yanichaꞌëranquëmaꞌ niꞌton, catahuaranquëmaꞌ chaꞌëcamaso marëꞌ,” tënin.
Ipora tahuëri chachin yacatahuarinpoaꞌ. Nontohuatëhuaꞌ, anoyacancantarinpoaꞌ, tënahuë.
3Napoaton noyasáchin ninai ama aꞌna piyapi tërantaꞌ nisha cancantacaso marëhuëꞌ. Co noyahuëꞌ ninai naporini, aꞌnapitantaꞌ nicatonacoi, co Yosë imaitonahuëꞌ. 4Maꞌsona tërantaꞌ nipatoira, Yosëíchin natërai piyapiꞌsaꞌ nicatonacoi ina yonquicaiso marëꞌ. Aparisitopirinacoihuëꞌ, co iꞌhuërëtëraihuëꞌ. Maꞌsha, cosharoꞌ, inapita pahuantopirincoihuëꞌ, ahuantatoi, chiníquën cancantërai. Maꞌsha onpoapoiraihuëꞌ, co paꞌyanaihuëꞌ. 5Aꞌchinaiso marëꞌ tëhuënchachin huihuirinacoi, tashinan pëiquë poꞌmorinacoi. Chiníquën noꞌhuitatonaꞌ, ahuërinacoi. Aꞌchinapoi paꞌsápatoi, co huachi chiniraihuëꞌ. Naꞌa tashiꞌ Yosë marëꞌ sacatápatoi, huëꞌëiꞌ natanai. Aꞌna tahuërintaꞌ co coshatatoihuëꞌ, tana natanai. 6“Quisocristo imarai,” taꞌtoi, noyasáchin ninai. Yosë nanamën noya nitotërai. Maꞌsha onpotopirinacoihuëꞌ, co noꞌhuiraihuëꞌ, ahuantërai. Yaꞌipi piyapiꞌsaꞌ nóya nontatoi, catahuarai. Ispirito Santo yaꞌcoancantërincoi niꞌton, catahuarincoi noya nicaꞌhuaisoꞌ. Tëhuënchachin cancanëhuëi quëran huarëꞌ piyapiꞌsaꞌ nosororai. 7Noꞌtëquën aꞌchinai. Yosë naꞌcon catahuarincoi niꞌton, aꞌchinpatoira, naꞌa piyapiꞌsaꞌ natanatonaꞌ, imasapi. Niꞌcoꞌ. Inimicoroꞌsaꞌ huëꞌpachinara, sontaroꞌsaꞌ huaꞌna quëran aꞌmorin ama inimicori paquitacaso marëhuëꞌ. Inapochachin Yosë achinirincoi ama sopai minsëincoiso marëhuëꞌ. Yosë nohuanton, noyasáchin ninai. Noya catahuarincoi niꞌton, sopai minsëarai. 8Aꞌnaquën noya niꞌninacoi. Aꞌnaquënso nipirinhuëꞌ noꞌhuirinacoi. Aꞌna tahuëri: “Paono nóya aꞌchinin,” topi. Aꞌna tahuëriso nipirinhuëꞌ pinorinacoi. Noꞌtëquën aꞌchintopiraihuëꞌ: “Nonpiánpi,” topi aꞌnaquëntaꞌ. 9Naꞌa piyapiꞌsaꞌ nohuitopirinacoihuëꞌ, aꞌnaquënsoꞌ nisha pochin nicatonacoi, co yanataninacoihuëꞌ. Piꞌpianchin shichiminpiraihuëꞌ, nanpiárai. Chiníquën aparisitopirinacoihuëꞌ, co tëparinacoihuëꞌ. 10Sëtopiraihuëꞌ, Yosë yonquiatoi, noya cancantërai. Co naꞌcon maꞌsha yaꞌhuëtopirincoihuëꞌ, Yosë nanamën aꞌchintërai niꞌton, naꞌa piyapiꞌsaꞌ natëtonacoi, noya noya cancantapi. Co mantaꞌ yaꞌhuëtopirincoihuëꞌ, Yosë nohuitatoi, sano cancantërai. Co mantaꞌ noya nininsoꞌ pahuantërincoihuëꞌ.
11Corintoquë yaꞌhuëramasopita, naꞌcon ninshitarainquëmaꞌ. Nani yaꞌipi yonquiraisoꞌ, iyaroꞌsaꞌ, shaꞌhuitërainquëmaꞌ. Naꞌcon nosororainquëmaꞌ. 12Quiyasoꞌ yaꞌipi cancanëhuëi quëran nosoromiatërainquëmaꞌ. Noyasáchin yonquipirainquëmahuëꞌ, canpitasoꞌ co aꞌna nosororamacoihuëꞌ nimara, tënai. 13Huiꞌnahuëpita pochin niꞌnanquëmaꞌ niꞌton, inapochachin nosorocoi quiyantaꞌ, topiraihuëꞌ. Ina naꞌcon nohuantërai.
Nipayarëhuasopita
14Co Yosë imapisopitasohuëꞌ nipirinhuëꞌ, ama inapitarëꞌquëmaꞌ naꞌcon naꞌcon nipayacosohuëꞌ. Co canpita pochin cancantopihuëꞌ. Noya cancantohuatamaꞌ, co nohuantaramahuëꞌ oshahuanacamasoꞌ. Niꞌcoꞌ. Tahuëri, tashiꞌ co inachachinhuëꞌ. Nisha nisha yaꞌnopi. 15Quisocristo sopairëꞌ co napopináchin yonquipihuëꞌ. Naporahuaton, canpoasoꞌ Quisocristo imarëhuaꞌ niꞌton, co oshahuanoꞌsa pochin cancantërëhuahuëꞌ. 16Yosë chinotërëhuaquë noyasáchin nicacasoꞌ yaꞌhuërin. Co inaquësoꞌ mamanshi moshacasoꞌ yaꞌhuërinhuëꞌ. Inapochachin canpoantaꞌ Yosë imapatëhuaꞌ, yaꞌcoancantarinpoaꞌ niꞌton, ina pëinën pochin ninëhuaꞌ. Yosësoꞌ nanpiárin. Quiricanën quëran naporin:
“Imapatamaco, yaꞌcoancantaranquëmaꞌ. Canpitaroꞌco yaꞌhuarahuë.
Chinotohuatamaco, noya aꞌpaiaranquëmaꞌ.
Piyapinëhuëpita pochin niꞌsaranquëmaꞌ,” tënin.
17Ina quëran Siniorori itantarin:
“Aꞌnaquën co noyahuëꞌ cancantohuachinaꞌ, ama inapitarëꞌquëmaꞌ nipayacosohuëꞌ.
Co noyahuëꞌ yonquipisoꞌ tananpitocoꞌ.
Inapotohuatamaꞌ, noya niꞌsaranquëmaꞌ.
18Tataparinquëma pochachin noya nosoroaranquëmaꞌ.
Huiꞌnahuëpita pochin cancantëranquëmaꞌ,
itërinpoaꞌ Tata Yosë. Chini chiníquën nanantaton, yaꞌipiya huaꞌanëntërin,” tënin quiricanënquë.
Currently Selected:
2 Corintios 6: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
