2 Corintios 5

1Niꞌcoꞌ. Pëiꞌ nëꞌmëtë quëran nipachinara, co huaꞌquirinhuëꞌ. Inapochachin nonënpoantaꞌ co yaꞌhuëmiatarinhuëꞌ. Chiminpatëhuaꞌ, Yosëꞌpaꞌ paꞌpatëhuaꞌ, nasha nonënpoaꞌ Yosë quëtarinpoaꞌ. Noya noya nininsoꞌ quëtarinpoaꞌ. Inasoꞌ co onporontaꞌ chanatarinhuëꞌ. 2Iporasoꞌ parisitapirëhuahuëꞌ, aꞌna tahuëri nasha aꞌmorëhuaso pochin nasha nonënpoaꞌ yaꞌhuëtarinpoaꞌ. Ina naꞌcon nohuantërëhuaꞌ. 3Chiminpatëhuaꞌ, co huaꞌyanënpoarachin inápaquë yaꞌhuëmiatarinhuëꞌ. Nasha nonënpoaꞌ quëtarinpoaꞌ. 4Iporasoꞌ isoroꞌpaquë yaꞌhuatëhuaꞌ, co chinirëhuahuëꞌ, sëtërëhuaꞌ, naporëhuaꞌ. Napopirëhuahuëꞌ, co chiminacasoꞌ nohuantërëhuahuëꞌ. Nasha nonënpoaꞌ tëhuënchinsoꞌ naꞌcon nohuantërëhuaꞌ. Isoroꞌpaquë taꞌhuantopirëhuahuëꞌ, Yosëꞌpaꞌ noya noya nanpimiatarihuaꞌ. 5Yosë acorinpoaꞌ nasha nonënpoaꞌ yaꞌhuëtinpoaso marëꞌ. Tëhuënchachin inápaquë noya ananpitaantarinpoaꞌ, tënëhuaꞌ. Sichoquë marca acorëso pochin nani Ispirito Santo ayaꞌcoancantërinpoaꞌ niꞌton, nitotërëhuaꞌ.

6Napoaton chiníquën cancantërëhuaꞌ. “Aꞌna tahuëri Yosëꞌpaꞌ paꞌsarëhuaꞌ,” taꞌtëhuaꞌ, noya cancantarëhuaꞌ. Tëhuënchachin isoroꞌpaquë nanpihuatëhuaꞌ, co Quisocristo nirayarihuahuëꞌ. 7Co ipora quënanpirëhuahuëꞌ, “Yosë noꞌtëquën nontërinpoaꞌ,” taꞌtëhuaꞌ, natërëhuaꞌ. “Co onporontaꞌ nonpintarinpoahuëꞌ,” tënëhuaꞌ. 8Napoaton chiníquën cancantërëhuaꞌ. “Chiminpatëhuaꞌ, Quisocristorëꞌquënpoaꞌ yaꞌhuëcontarihuaꞌ. Inasoꞌ noya noya,” tënëhuaꞌ. 9Maꞌsona tërantaꞌ nipatëhuaꞌ, Yosëíchin natërëhuaꞌ noya nicainpoaso marëꞌ. Nanpihuatëhuaꞌ, chiminpatëhuantaꞌ, Sinioro nohuantërinsoáchin nohuantërëhuaꞌ. 10Aꞌna tahuëri Quisocristo oꞌmantahuachin, yaꞌipinpoaꞌ coisë pochin shaꞌhuitarinpoaꞌ. Yaꞌipi ninëhuasopita yonquiaton, aꞌnaya aꞌnayanpoaꞌ noꞌtëquën nontarinpoaꞌ. Co noya nipatëhuahuëꞌ, co Yosëꞌpaꞌ acanaarinpoahuëꞌ. Noya nipatëhuaꞌ, acanaarinpoa huachi.

Nanan anoyatërinpoasoꞌ

11Napoaton Yosë tëꞌhuatacasoꞌ yaꞌhuërin. Ina yonquiatoi, yaꞌipi piyapiꞌsaꞌ pënënárai. Co piꞌpian tërantaꞌ nonpintërainquëmahuëꞌ. Yosë niꞌsárincoi niꞌtoi, noꞌtëquën nontërainquëmaꞌ. Noya ninaisoꞌ canpitantaꞌ nitotëramaꞌ, topiraihuëꞌ. 12“Quiyasoꞌ noya noyacoi,” co tënaihuëꞌ. Co aꞌnapita nocanaihuëꞌ. Nisha nanan aꞌchinaꞌpiroꞌsaꞌ noya pochin yaꞌnoponaraihuëꞌ, co cancanëna quëran huarëꞌ imapihuëꞌ. Pinopachincoi, shaꞌhuitocoꞌ: “Paono tëhuënchachin noꞌtëquën nontërincoi. Yaꞌipi cancanën quëran huarëꞌ Quisocristo imarin,” itocoꞌ. Ina pochin aꞌpanicamaso marëꞌ shaꞌhuitaranquëmaꞌ. 13Aꞌnaquën naꞌcon pënënpatëira, “Huaꞌyantopi,” itërinacoi. Napopirinahuëꞌ, Yosë yonquiatoi, naporai. Aꞌna tahuërintaꞌ sanoanan quëran pënënainquëmaꞌ. Yosë yonquicamaso marëꞌ ina pochin nontërainquëmaꞌ. 14“Quisocristo naꞌcon nosororinpoaꞌ,” taꞌtoi, nanamën aꞌchinárai. Canpoa marëꞌ inasoꞌ chiminin. Ina imapatëhuaꞌ, canpoantaꞌ chiminëhuaso pochin niꞌninpoaꞌ. 15Tëhuënchachin canpoa marëꞌ chiminin noya noya cancantacaso marëꞌ. Co huachi canpoara costarëhuasoꞌ paꞌyatacasoꞌ yaꞌhuërinhuëꞌ. Inasáchin yonquicaso marëꞌ chiminin. Chiminaponahuëꞌ, nanpiantarin niꞌton, inasáchin yonquirëhuaꞌ. 16Iráca quiyaora yonquinëhuëi quëran yonquiatoi, aipi yaꞌnorinsoráchin yonquirai. Quisocristontaꞌ iráca co noꞌtëquën yonquirapiraihuëꞌ. “Co inasoꞌ Yosë huiꞌninhuëꞌ,” topiraihuëꞌ, iporasoꞌ noꞌtëquën yonquirai. 17Quisocristo imapatëhuaꞌ, Yosë anoyacancantarinpoaꞌ. Nasha cancan yaꞌhuëtarinpoa huachi. Iráca yonquirëhuasopita naniantërëhuaꞌ. Nashamiachin pochin cancantatëhuaꞌ, noya noya yonquiarihua huachi.

18Co canpoara noya cancantërëhuahuëꞌ. Yosëíchin anoyacancantërinpoaꞌ. Iráca oshahuanatëhuaꞌ, Yosë inimicotopirëhuahuëꞌ, inaora nohuanton, huiꞌnin isoroꞌpaquë aꞌpaimarin chiminaton nanan anoyatinpoaso marëꞌ. Ina quëran quiyantaꞌ acorincoi nanamën aꞌchinaꞌhuaiso marëꞌ. Insosona natëhuachin, nanan anoyatarin. 19Yosë nohuanton, huiꞌnin chiminin anoyacancantinpoaso marëꞌ. Anoyacancantohuachinpoaꞌ, co huachi oshanënpoaꞌ yonquirinhuëꞌ, inquitërinpoa huachi. Nani nanan anoyatohuachinpoara, quiyantaꞌ acorincoi paatoi aꞌnapita shaꞌhuitaꞌhuaiso marëꞌ. 20Quisocristo chachin acorincoi aꞌnapita anitotaꞌhuaiso marëꞌ. Ina yaꞌhuërënamën pochin shaꞌhuitarainquëmaꞌ. “Yosë nontocoꞌ nanan anoyachinquëmaꞌ,” itárainquëmaꞌ. 21Iráca Quisocristo co mantaꞌ oshahuanaponahuëꞌ, Yosë nohuanton, yaꞌhuërëtërinpoaꞌ. Oshahuan pochin nicaton, Yosëri chiníquën anaꞌintërin. Canpoa marëꞌ chiminin niꞌton, co huachi oshahuan pochin niꞌninpoahuëꞌ. Quisocristo imapatëhuaꞌ, Yosë nóya niꞌsarinpoaꞌ.

Currently Selected:

2 Corintios 5: cbt

Highlight

Copy

Compare