1 Samuel 6
6
Yosë caposonën ayanpisoꞌ
1Sinioro caposonënsoꞌ, canchisë yoqui huiristinoꞌsa noꞌpanënaquë yaꞌhuërin. 2Napohuachina inahuasoꞌ, corto huaꞌanoꞌsaꞌ, pënotonoꞌsaꞌ, inapita ayontonpi. Huëꞌpachinara itaponaꞌ: ¿Onpotahuata Sinioro caposonën? ¿Onpo aꞌpamantaꞌahuataꞌ? itopi. 3Napotohuachinara, inapitari itaponaꞌ:
—Israiroꞌsa chinotërinso Yosë caposonën yaaꞌpaantahuatamaꞌ, ama topinamia aꞌpaantacosohuëꞌ. Ama aquëtë chachin noꞌhuirápainpoaso marëhuëꞌ, maꞌsona tëranta quëtocoꞌ. Inapotohuatamaꞌ, noyataantarihuaꞌ. Co huachi aquëtë anaꞌintiinpoaso yaꞌhuëarinhuëꞌ, itopi.
4—Noꞌhuirinpoasoꞌ acopitacaso marëꞌ: ¿Maꞌta nipachin aꞌnotahuaꞌ? taantahuachinara:
—Aꞌnatërápo huaꞌanoꞌsanënpoapita yaꞌhuëpi. Napoaton oro quëran nipinan, aꞌnatërápo piꞌpirëhuaso pochin nonanatëhuaꞌ, quëtahuaꞌ. Aꞌnaya aꞌnaya marëꞌ aꞌnara quëtahuaꞌ. Ina nápo chachin shoꞌminta nonanpinan quëtahuaꞌ. Inapitanta oro quëran chachin nipinan. Huaꞌanënpoapitarë chachin inapita quëran anaꞌintarinpoa niꞌton, inapotahuaꞌ. 5Napoaton oro quëran piꞌpirëhuasopita nonahuan. Naníquënpoa caniotëhua piꞌpi piꞌpi niconëhua niꞌton, napoaꞌahuaꞌ. Shoꞌmiroꞌsanta nonahuan. Inapitanta yaꞌhuërëhuaso noꞌpaꞌ tapiarin niꞌton, nonahuan. Ina quëran israiroꞌsa Yosë chinotopisoꞌ, noya nicatëhua quëtahuaꞌ. Tapona inapotërëhuaso marëꞌ anaꞌintërinpoasoꞌ, yatananpitápirinpoahuëꞌ. Mamanshinënpoaꞌ, noꞌpanënpoaꞌ, inapitanta yatananpitápirinhuëꞌ. 6Iráca iquipitoroꞌsa co natantochináchinhuëꞌ cancantopi. Copirnonënantaꞌ, ina pochachin cancantërin. Yosëri chiníquën aparisitaquë huarëꞌ israiroꞌsa aꞌpapi. Ama canpitaso inapita pochin cancantocosohuëꞌ. 7Aꞌnara toronan nicoꞌ. Ina quëran cato ohuacaꞌ huaꞌhuanshiron co noꞌpaꞌ ohuërëyátërarinsopitahuëꞌ, macoꞌ. Pomonënaquë nara oyoantahuatomaꞌ, toronanquë aꞌsonco quëpacaiso marëꞌ. Ama napoaponahuëꞌ, huaꞌhuinpitariso aꞌshina imainasohuëꞌ. Tënpaanaquëranchin quëparichinaꞌ. 8Ina quëran Yosë caposonën masahuatomaꞌ, toronanquë aꞌmitocoꞌ. Aꞌna caconquëntaꞌ, oro quëran nonanamasopita Sinioro aꞌnotamaso marëꞌ acocoꞌ. Ama huachi aquëtë chachin noꞌhuitonpoa anaꞌintiinpoaso marëhuëꞌ, ina quëran pahuërëtatë pochin nisarëhuaꞌ. Inantaꞌ, masahuatoma toronanquë aꞌmitocoꞌ. Nani aꞌmitëhuatamaꞌ, ohuacaroꞌsa toronanquë aꞌsontëramasoꞌ, aꞌpaco inahuara quëpaꞌinaꞌ. 9Napoaponahuëꞌ, insëchinsona ohuacaroꞌsa paꞌsapisoꞌ niꞌcoꞌ. Noꞌpanënpoa notënanquë Israiro ninano Piti-simisi itopiso yaꞌhuërin. Inaso ninanoꞌ, Sinioro caposonën noꞌpanënquë chachin yaꞌhuërin. Ina parti paꞌpachin, noꞌtëquën yonquiarihuaꞌ: “Tëhuënchachin Sinioro nohuanton maꞌsha onporëhuaꞌ,” tëcarihuaꞌ. Napoaponahuëꞌ, ohuacaroꞌsaso huaꞌhuina yonquiatonaꞌ, tënpaanquë paꞌpachinaꞌ: “Co Sinioro nohuanton maꞌsha onporëhuahuëꞌ, topinan naporëhuaꞌ,” tëcarihuaꞌ, itopi.
10Napotohuachinara, huiristinoꞌsasoꞌ ina inachachin nipi. Cato ohuaca huaꞌhuanshiron mapi. Huaꞌhuinpitasoꞌ, tënpaanaquë oncorapipi. Napotahuatonaꞌ, aꞌshinasoꞌ toronan ohuaracaiso marëꞌ aꞌsonpi. 11Sinioro caposonëonta masahuatonaꞌ, toronanquë aꞌmitëpi. Shoꞌmiroꞌsaꞌ, piꞌpiroꞌsaꞌ, inapita oro quëran nonanpisontaꞌ, caconquë poꞌmorahuatonaꞌ, toronanquë aꞌmitëpi. 12Nani aꞌmitëhuachinara, ohuacaroꞌsasoꞌ toronanë chachin aꞌpapi huachi. Aꞌpahuachinara, inapitasoꞌ Piti-simisi ira patatonaꞌ: “Maaa,” tërëꞌnachin noꞌtëquën paꞌsapi. Aꞌnatërápo huiristino huaꞌanoꞌsasoꞌ, Piti-simisiroꞌsa noꞌpanëna nanirinquë huarëꞌ imaquipi.
13Naporoꞌ aꞌnaquën Piti-simisi israiroꞌsaꞌ, motopianaquë trico masapi. Sinioro caposonën nicatonaꞌ, capa cancantopi. 14Aꞌnara yaꞌhuëhuan Cosoi itopisoꞌ iminënquë toronansoꞌ canquihuachina, inaquë chiniconin. Panca naꞌpi inaquë yaꞌhuërinso pirayan chiniconin. Naporoꞌ yaꞌhuëhuanoꞌsari, toronan pëꞌshatona ihuë atarantopi. Cato ohuacaroꞌsanta tëpapi. Inapotahuatona ina ihuëquë chachin Sinioro marëꞌ yaꞌipi ahuiquitopi. 15Coꞌhuara inapochátëraponahuëꞌ, Nihui huënton israiroꞌsari Yosë caposonën anohuarapi. Aꞌna cacontaꞌ, anohuarapi. Inaquësoꞌ, oro quëran nonanpisopita acopi. Inapita anohuararahuatonaꞌ, panca naꞌpi aipi acopi. Inapoatona yaꞌhuëhuanoꞌsasoꞌ, Sinioro chinotacaiso marëꞌ maꞌsharoꞌsa tëparahuatona aꞌnaquën yaꞌipi ahuiquitopi. Aꞌnaquëontaꞌ, piꞌpian ahuiquitopi. 16Napopiso nicatona aꞌnatërápo huiristino huaꞌanoꞌsasoꞌ, yaꞌhuëpiꞌpaꞌ paꞌmantapi. Naporo tahuëri chachin Icoronquë camapi.
17Huiristinoꞌsa aꞌnatërápo ninano yaꞌhuëtopi: Asototo, Casa, Asocaron, Cato, Icoron, inapita. Inapita ninanoroꞌsa huaꞌanënpitasoꞌ, aꞌnaya aꞌnaya pipipisopita oro quëran nonanpi. Nonanatonaꞌ, pahuërëtërëso pochin nitacaiso marëꞌ, Sinioro marëꞌ acopi. 18Oro quëran shoꞌmiroꞌsa nonanpisopitantaꞌ, nápo chachin acopi. Aꞌnatërápo yaꞌhuërin niꞌton, ina nápo acopi. Aꞌnaquën ninanoroꞌsasoꞌ, pairahuan nipi. Aꞌnaquën ninanoaꞌhuaroꞌsasoꞌ, co pairahuanhuëꞌ nipi. Panca naꞌpi aipi naporo Yosë caposonën acopi. Ina naꞌpisoꞌ, ipora iso quirica ninshitasoco huarënta yaꞌhuëárin. Piti-simisi ninano yaꞌcariꞌ, Cosoi iminënquë yaꞌhuëárin.
19Israiroꞌsa inaquë yaꞌhuëpisopitasoꞌ, capa cancantopirinahuëꞌ, tëhuëpi. Yosë caposonën iꞌsohuatatona niꞌpi. Ina niꞌpiso marëꞌ canchisë shonca yaꞌpi Siniorori tëparin. Ina marëꞌ panca sëtatona naꞌnëpi. Naꞌa niyacapapisopita chiminpi niꞌton, napopi. 20Naporoꞌ yonquiatona napopi: “Yosëso noyasáchin ninin. Napoaton tëhuërinsopitasoꞌ, inari anaꞌintëraꞌpiacaso yaꞌhuërin. ¿Intohuacha iporasoꞌ Siniororëꞌquënpoa anoyatërëhuaso caposonën aꞌpaꞌahua nicaya? Coꞌsoꞌ inapohuatëhuahuëꞌ, caposonën tëhuëtaantahuatëhuaꞌ, anaꞌintaantarinpoaꞌ,” topi.
21Ina yonquiatona Quiriato-quiarimo ninanoquë yaꞌhuëpisopita nanan aꞌpatopi: “Huiristinoꞌsa Sinioro caposonën ayantërinënpoaꞌ. Huëco canpitari isëran quëpacoꞌ,” itopi.
Currently Selected:
1 Samuel 6: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
