1 Samuel 5
5
Huiristinoꞌsa yaꞌhuëpiquë Yosë caposonën naporinsoꞌ
1Ipini-sëriquë Yosë caposonën macatona huiristinoꞌsasoꞌ, Asototo ninano itopiquë quëpapi. 2Inaquë nipachina, Tacon itopisoꞌ mamanshi moshacaiso pëiquë poꞌmoonpi. Ina nonanpisoꞌ pirayan acopi. 3Tahuëririnquë tashíramiachin moshatopiso pëiquë paꞌpachinara, mamanshinënasoꞌ anotërin niꞌconpi. Sinioro caposonën notënanquë chachin anotaton quëhuëánin niꞌconpi. Napohuachina panca paꞌyanpi. Ahuanirahuatonaꞌ, acopiquë chachin acoantapi. 4Tahuëririnquë paantahuachinara mamanshinëna anotaantarin niꞌcoantapi. Siniororë anoyatopiso caposonën notënanquë tantoncha quëhuëánin niꞌconpi. Motën, tanpaquën, inapitaso yaꞌquiatonaꞌ, yaꞌcoana conëranën aipi quëhuënantapi. Naporinso nicatonaꞌ, naꞌcon naꞌcon paꞌyanpi. 5(Napoaton iso quirica ninshitasoco huarëntaꞌ, Tacon moshapisoꞌ pëi yaꞌcoana conëranën, co iꞌnatopihuëꞌ. Asototo corto huaꞌanoꞌsa napopi.)
6Ina piquëran Siniorori Asototoquë yaꞌhuëpisopita anaꞌintaton paꞌpi aꞌpayanin. Inainpichin noꞌpaquë yaꞌhuëpisopitanta napotërin. Panca piꞌpiraꞌpiatona parisitápi. 7Parisitatona inahuasoꞌ: “Israiroꞌsa Yosë chinotopiso caposonën aꞌpaꞌahuaꞌ. Inaso chini chiníquën anaꞌintarinpoaꞌ. Mamanshinënpoa Tacon itërëhuasontaꞌ, chiníquën anaꞌintarin,” topi. 8Napoaton huaꞌanëni, aꞌnapita huiristino huaꞌanoꞌsa amatërin. Huëꞌpachinara itapon:
—Israiroꞌsa Yosë chinotopiso caposonën ¿maꞌta onpotahuaꞌ? itërin.
—Cato ninanoquë quëpacoꞌ, itopi inapitari.
Napohuachinara, aꞌnaquëni ina ninanoquë quëpapi. 9Quëpapirinahuëꞌ, Siniororiso ina ninanoquë yaꞌhuëpisopita yaꞌhuërëꞌ, chiníquën anaꞌintërin. Huaꞌhuaroꞌsa quëran mashoroꞌsaquë huarëꞌ panca piꞌpiraꞌpiapi. Inapoatona chiníquën parisitapi. Napoaton inahuanta panca paꞌyanpi.
10Naporoꞌ aꞌnaquëni, Icoron ninano itopiquë Yosë caposonën quëpaantapi. Inaquë quëꞌcanpachinara yaꞌipi ina ninanoquë yaꞌhuëpisopita chiníquën noncaropi: “¡Israiroꞌsa Yosë chinotopiso caposonën quëshiantërinënpoaꞌ! ¡Yaꞌipinpoa tiquiinpoaso marëꞌ napotarinënpoaꞌ!” topi. 11Siniorori inahuanta chiníquën aparisitarin. Paꞌpi parisitatonaꞌ: “Taquiarihua canpoasoꞌ,” topi. Ina tëꞌhuatatonaꞌ, huaꞌanëni aꞌnapita huiristino huaꞌanoꞌsa amatërin. Canquihuachinara itapon: “Israiroꞌsa Yosë chinotopiso caposonën, isëran quëpacoꞌ. Yaꞌhuërinquë chachin quëpanantacoꞌ. Ama yaꞌipinpoa tiquiinpoaso marëhuëꞌ inapotocoꞌ,” itërin. 12Yaꞌhuëhuanoꞌsaso chiníquën parisitatonaꞌ, mamanshinënari nichaꞌëcaso marëꞌ nontápi. Aꞌnaquënsoꞌ, chiminapi. Aꞌnaquëontaꞌ, panca piꞌpiraꞌpiapi. Napopi.
Currently Selected:
1 Samuel 5: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
