1 Samuel 15

Saono co noꞌtëquën natërinso marëhuëꞌ, Yosëri co noyahuëꞌ niꞌninsoꞌ

1Aꞌna tahuëri Samoirori Saono itapon:

—Israiroꞌsasoꞌ Sinioro piyapinënpita. Ina aꞌparinco niꞌton, inapita huaꞌanëntamaso marëꞌ acoranquën. Iporasoꞌ maꞌsona ina nohuantërinsoꞌ shaꞌhuitaranquën natëcaso marëꞌ. 2Siniorosoꞌ yaꞌipi nanitaparin. Ina chachin iso pochin nanan aꞌpatërinquën: “Quëmá quëran amaricoroꞌsa anaꞌintaꞌhuasoꞌ yonquirahuë. Iráca Iquipito quëran israiroꞌsa pipihuachinara, inapitari ahuëimapi. 3Napoaton sontaronënpitarëꞌquën paaparahuaton ahuëontaquëꞌ. Yaꞌipi maꞌsha yaꞌhuëtopisorë chachin ataꞌhuantocoꞌ: Quëmapiꞌsaꞌ, sanapiꞌsaꞌ, huaꞌhuaroꞌsaꞌ, inapita ataꞌhuantocoꞌ. Nasha huaꞌhuatopisopitantaꞌ, inapotocoꞌ. Tororoꞌsaꞌ, ohuicaroꞌsaꞌ, camiyoroꞌsaꞌ, moraroꞌsaꞌ, yaꞌipi inapitantaꞌ, ca marëꞌ tiquicoꞌ,” tënin Yosë, itërin.

4Napotohuachina, inaso sontaronënpita ayontonin. Tiraimo ninanoquë niyontonahuatona nipichipi. Nipichihuachinara, cato pasa huaranca sontaroꞌsa yaꞌhuëpi. Cota huënton quëranta shonca huaranca sontaroꞌsa yaꞌhuëpi.

5Ina quëran Saonosoꞌ sontaronënpita Amarico ninanoquë quëparin. Ina yaꞌcari aꞌnara iꞌsha yaꞌhuërin niꞌton, inaquë naꞌpicaiso marëꞌ camairin. Aꞌnanaya amaricoroꞌsa ahuëcaiso marëꞌ napopi. 6Naporo chachin quiniroꞌsanta nanan aꞌpatërin: “¡Amaricoroꞌsa patahuatoma pipicoꞌ! Canpitaso shimashonëhuëipita Iquipito quëran pipisoiꞌ, nosororamaꞌ. ¡Napoaton ama amaricoroꞌsarëꞌquëma taꞌhuantamaso marëhuëꞌ, pacoꞌ! tënin Saono,” itopi.

Napotohuachinara, inahuaso amaricoroꞌsa yaꞌhuëpi quëran pipipi. 7Naporoꞌ Saonosoꞌ, sontaronënpitarë chachin amaricoroꞌsa ahuërin. Nitaꞌatahuaton, Apira parti quëran imarinsoꞌ, Shor parti itopiquë huarëꞌ aꞌporin. Inasoꞌ noꞌpaꞌ, Iquipito noꞌparë nichinpitërin. Inaquë huarëꞌ ahuërahuaton canarin. 8Saonosoꞌ inapita canarahuaton copirnonënta manin. Inasoꞌ, Acaco itopi. Yaꞌhuërëꞌ sontaronënpitasoꞌ, yaꞌipi tiquipi. 9Napoaponahuëꞌ, Saonoso sontaronënpitarë chachin, Acaco co yatëpapihuëꞌ. Pëꞌtahuaroꞌsa noya noya nipisopitanta co tëpapihuëꞌ. Ohuicaroꞌsaꞌ, tororoꞌsaꞌ, toroaꞌhuaroꞌsa amoshin nipisopita, carniroroꞌsaꞌ, inapitanta co tëpapihuëꞌ. Naporahuaton maꞌsha paꞌton nipisopitanta co ataꞌhuantopihuëꞌ. Naponin nipisopitaráchin ataꞌhuantopi.

10-11Ina quëran Siniorori Samoiro itapon:

—Copirno nicacaso marëꞌ Saono acoato, sëtërahuë. Maꞌsona nicacaso camairahuësoꞌ, co noꞌtëquën natërincohuëꞌ, itërin. Napotohuachina Samoirosoꞌ, paꞌpi co noyahuëꞌ cancantërin. Napoaton yaꞌipi tashi Yosë nontochináchin tahuërianpitërin.

12Tahuëririnquë Samoirosoꞌ anoachin Saono nicapon paꞌnin. Coꞌhuara quënayántëraponhuëꞌ aꞌnaquëni itapon: “Saonosoꞌ Carmiro ninanoquë paꞌnin. Inaquë aꞌnara panca raꞌpi ahuanirin. Ina nicatona piyapiꞌsari noya niꞌcaiso marëꞌ ahuanirin. Inaporahuaton Quiricaroquë paꞌmantacaso marëꞌ tahuimarin,” itërin.

13Napotohuachina Samoirosoꞌ, Saono yaꞌhuëarinquë canconin. Inari quënanahuaton itapon:

—Sinioro catahuainquën. Caso Sinioro camairincosoꞌ, yaꞌipi natërahuë, itërin. 14Napotopirinhuëꞌ, Samoirorisoꞌ itapon:

—Sinioro camairinquënso yaꞌipi natëran naporini, amaricoroꞌsa pëꞌtahuanëna yaꞌipi tëpaꞌitonhuëꞌ. ¡Coꞌ mini Yosë natëranhuë niꞌton, ohuicaroꞌsaꞌ, ohuacaroꞌsaꞌ, inapita noncarorapiso natanahuë! itërin.

15—Inapitasoꞌ amaricoroꞌsa yaꞌhuëpi quëran quëpisoꞌ. Sontaronëhuëpitari ohuicaroꞌsaꞌ, ohuacaroꞌsaꞌ, inapita noya noya nininsoꞌ mapi. Sinioro chinotacaso marëꞌ mapi. Inaso Yosë, quëmari chinotëransoꞌ. Aꞌnapitaso napoaponahuëꞌ, yaꞌipi tiquirai, itërin. 16Itapirinhuëꞌ, Samoirori itapon:

—¡Taꞌtëquëꞌ, achin tashi Sinioro anitotërincoso shaꞌhuichinquën! itërin

—Shaꞌhuitoco nipachin, tënin Saono.

17—Coꞌhuara copirno yaꞌconyántërasënquënhuëꞌ, noya cancantaton noya ninan. “Caora co nanitërahuëꞌ noya nicaꞌhuasoꞌ,” tënan. Sinioro chachin acorinquën yaꞌipi Israiro huëntonoꞌsa huaꞌanëntamaso marëꞌ. Napoaton inasáchin natëcamaso yaꞌhuërin. 18Amaricoroꞌsasoꞌ, co Yosë chinotatonaraihuëꞌ oshahuanpi. Inapita ataꞌhuantacaso marëꞌ Sinioro chachin camairinquën. 19Sinioro camaitërinso natëton, sontaronënpita pëtahuaroꞌsa mapisoꞌ, co quëitonhuëꞌ. ¡Quëmaso nipirinhuëꞌ, inapita quëcaton Sinioro co natëranhuëꞌ! itërin. 20Napotohuachina Saonori itaantapon:

—Sinioro camaitërinsoꞌ, caso natërahuëꞌ. Maꞌsona nicacasoꞌ shaꞌhuitërincosoꞌ natërahuëꞌ. Yaꞌipi amaricoroꞌsa ataꞌhuantërai. Ataꞌhuantahuatoi, copirnonëna manaisoꞌ quënahuë. Inasoꞌ, Acaco itopi. 21Sontaronëhuëpitaso nipirinhuëꞌ, ohuicaroꞌsaꞌ, ohuacaroꞌsaꞌ, inapita noya noya nininsoꞌ mapi. Inapitanta ataꞌhuantacaso nipirinhuëꞌ, mapi. Tëpatona Quiricaroquë Sinioro chinotacaiso marëꞌ mapi. Inasoꞌ Yosë quëmari chinotëransoꞌ, itërin.

22Napotohuachina Samoirori itapon: “Maꞌsha Sinioro marëꞌ tëpatona piꞌpian ahuiquitacaisoꞌ, noya. Yaꞌipi ahuiquitacaisontaꞌ, noya. Sinioro camaitërinso natëcasoso nipirinhuëꞌ, noya noya. Maꞌsha Sinioro marëꞌ tëpatona piꞌpian ahuiquitacaisoꞌ, noya. Carniro tomaquën ahuiquitasontaꞌ, noya. Camaitërinso noya natanatë natëcasoso nipirinhuëꞌ, noya noya. 23Pënotonquë aniꞌtohuatëra oshahuanëso pochachin, Yosë camaitërinsonta co natëhuatërahuëꞌ, oshahuanëꞌ. Mamanshi moshahuatëra oshahuanëso pochachin co Yosë natëchináchinhuëꞌ cancantohuatërantaꞌ, oshahuanëꞌ. Quëmasoꞌ Sinioro camairinquënsoꞌ, nocanan. Ina pochachin inantaꞌ, quëma copirno nisápasoꞌ nocaninquën,” itërin.

24Napotohuachina, inariso itapon:

—Sontaronëhuëpita tëꞌhuatato maꞌsona nohuantopiso ninahuë. Inapoato Sinioro camaitërinsoꞌ, quëma shaꞌhuitërancosopita, inapita naniantërahuë. Inapoato oshahuanahuë. 25Inapopirahuëꞌ, co noyahuëꞌ ninahuëso naniantëquëꞌ. Ina naniantaton, carëꞌquën Sinioro chinotacaso marëꞌ panantaꞌa, itërin. 26Napotopirinhuëꞌ, Samoiroriso itaantarin:

—Co quëmaroꞌco panantapohuëꞌ. Sinioro camairinquënso nocananso marëꞌ, iporasoꞌ inantaꞌ, quëma Israiro copirno nisápamasoꞌ nocaninquën, itërin.

27Napotahuaton pacacaso marëꞌ tahuërëasoꞌ, Saonori aꞌmorinso huirotën matërin. Inapotërin niꞌton, oshatërin. 28Naporoꞌ Samoirori itapon:

—Aꞌmorahuëso osharanso pochin, Sinioronta ipora tahuëri huaꞌanëntëranso oshatatë pochin nitërinquën. Inapotatënquën, aꞌnara Israiro quëmapi ahuaꞌanëntarin. Quëmá quëran noya noya quëmapi inapotarin. 29Yosëso noya noya niꞌton, israiroꞌsanpoa chinotërëhuaꞌ. Co inaso nonpininhuëꞌ. Maꞌsona nicacaso yonquirinsoꞌ, noꞌtëquën nisarin. Inaso co piyapihuë niꞌton, co nisha nisha yonquirinhuëꞌ, itërin. 30Napotohuachina Saono taantarin:

—Caso oshahuanahuë. Napopirahuëꞌ, onpopiontaꞌ, ansianoꞌsaꞌ, aꞌnapita israiroꞌsaꞌ, inapita niꞌtonënquë noya niꞌcoꞌ. Noya nicatonco natëco. Napoaton carëꞌquën Sinioro chinotacaso marëꞌ panantaꞌa. Inasoꞌ Yosë quëmari chinotëransoꞌ, itërin.

31Napotohuachina, Samoirosoꞌ Saonorë chachin Quiricaro ninanoquë panantapi. Inaquë nipachinara, Saonosoꞌ Yosë chinotërin. 32Ina quëran Samoirosoꞌ camaitaton:

—Amarico copirno Acaco itopisoꞌ quëshico, tënin. Napohuachina quëshiipi. “Israiroꞌsa aparisitatonaco tëpainacoso yaꞌhuërin naporini, nani tëpaꞌitonacohuëꞌ,” tënin yonquinënquë. Ina yonquiaton co mácancayan quëranhuëꞌ huëꞌnin. 33Samoiroriso napoaponahuëꞌ, itapon:

—Sahuëninën quëran notohuaroꞌ piyapiꞌsa tiquiran. Napoatona aꞌshina saꞌahuapi. Inapita saꞌahuapiso pochin mamaparinta quëparitapon, itërin. Itahuaton, sahuëniquë tëparin. Sinioro camaitërinso chachin nitahuaton yaquirin. Quiricaroquë naporin.

34Ina piquëran Samoirosoꞌ Naama ninanoquë paꞌnin. Inaquë yaꞌhuërin niꞌton, inaquë paꞌnin. Yaꞌhuërëꞌ Saononta yaꞌhuërinquë paꞌnin. Shaꞌhuitëranquëmaso chachin Saonosoꞌ Quipiaquë yaꞌhuërin. 35Naporo quëran huarëꞌ Samoirosoꞌ nanpipon co huachi Saono quënanchininhuëꞌ. Siniorori Saono israiroꞌsa copirnonën nicacaso marëꞌ acorin. Napoaponahuëꞌ, co huachi ina marëꞌ nohuantërinhuëꞌ niꞌton, Samoiro sëtërin. Sëtaponahuëꞌ, co huachi niꞌchininhuëꞌ.

Currently Selected:

1 Samuel 15: cbt

Highlight

Copy

Compare