1 Samuel 14
14
Conatan canatërinsoꞌ
1-2Aꞌna tahuëri Conatansoꞌ, catahuarinso sontaronën itapon:
—Huëquë paꞌa. Motopi paꞌtatë huiristino sontaroꞌsa aquëtëran nisapisoꞌ, ahuëcontaꞌa, itërin. Conatanso ina pochin yonquiaponahuëꞌ, co paꞌpin shaꞌhuitërinhuëꞌ. Inasoꞌ, sontaronënpitarë chachin Quipia ninano naniconinquë nëꞌmëtë pëinëna ótënatona yaꞌhuëapi. Saonosoꞌ cranata narasoquë nisarin. Inaquë chachin trico toꞌnoroꞌsanta sacatapi. Saota pasa sontaroꞌsari Saono caꞌtanpi. 3Corto huaꞌan Aiasi itopisonta Saonorë nisarin. Inachintërin niꞌton, ipoto itopisoꞌ aꞌmorahuaton Yosë marëꞌ Siroquë sacatërin. Aiasisoꞌ, Aitopo huiꞌnin. Inanta Huinisi huiꞌnin. Huinisënta Iri huiꞌnin. Icapotintaꞌ, Aiasi apin.
Conatan catahuarinsoarë ahuëtapona paꞌpisoꞌ, co aꞌnapita Israiro sontaroꞌsasoꞌ nitotopihuëꞌ. 4-5Conatanso catahuarinsoarë chachin, huiristinoꞌsa yaꞌhuëapiquë yaꞌcontacaiso marëꞌ parisi paꞌtapi. Inaquë nincantacaiso marëꞌ motopi pëntontacaiso yaꞌhuërin. Cato panca natëtëroꞌsa huáncana iraso paꞌnin. Miquimasi notënanquë norti parti quëran aꞌnaso natëtë yaꞌhuërin. Inasoꞌ, Posisi itopi. Yaꞌhuërëꞌ aꞌnantaꞌ, Quipia notënanquë sor parti quëran yaꞌhuërin. Inanta Sini itopi. 6Papon pochin Conatansoꞌ, catahuarinso itapon:
—Huiristino sontaroꞌsasoꞌ motopi aquëtëran yaꞌhuëapi. Inapitasoꞌ co canpoa pochin Yosë chinotopihuëꞌ. Huëquë inatohua paꞌa. Tapona Sinioro catahuarinpo inapita minsërëꞌ. Ina topachina caraíchinta nipirinahuëꞌ, inimicoroꞌsa minsëpi. Naꞌanta nipachina ina nohuanton minsëtopi, itërin. 7Napotohuachina, catahuarinsoari itapon:
—Maꞌsona yanipatan niquëꞌ. Carinquën catahuainquën, itërin.
8—Niꞌquëꞌ. Huiꞌristinoꞌsa quënanainposo marëꞌ apira motopi pëntontaꞌa. 9-10“Inaquë ninatacoi, paꞌmariꞌi,” topachinasoꞌ, co huachi inahua nisapiquë pantarihuëꞌ. Isëquëranchin quëparitaꞌa. Yaꞌhuërëꞌ: “Huëntarico nipachin,” itohuachinposoꞌ, Sinioro nohuanton inapita minsëcaso niꞌton, pantari.
11Napoatona pantarapi. Pantasoi huiristinoꞌsari quënanpi. Quënanatonaꞌ, tëhuacaiso marëꞌ napotopi: “Maꞌtana iprioroꞌsa motopi naninoꞌsaquë naꞌpipi quëran pipirantapi,” topi. 12Napoatonaꞌ:
—¡Nanpëintarico nipachin ahuëtamaso aꞌchinchinquëmaꞌ! itopi chiníquën nontatonaꞌ. Naporoꞌ Conatani catahuarinsoꞌ itapon:
—Huëquë imaco paꞌa. Sinioro catahuararinpo niꞌton, huiristinoꞌsa minsëari, itërin.
13Napotahuaton pantarapi. Sacai niꞌton, matatona matatona pantarapi. Cantontarahuatona huiristinoꞌsa ahuëontapi. Conatani atatohuachina, catahuarinsoari tëpachanin. 14Naporo Conatansoꞌ, catahuarinsorë chachin cato shonca pochin inimicoroꞌsa tëpapi. Co panca roꞌchaquëhuë nipirinhuëꞌ, napopi.
15Yaꞌipi huiristinoꞌsa yaꞌhuëapiquë panca paꞌyanpi. Aꞌnapita huëntonoꞌsa ahuëtacaiso marëꞌ paꞌpisopitanta napopi. Naporo chachin noꞌpanta nacontarin. Inapotaton Yosëri huiristinoꞌsa aꞌpayamiatërin. 16Saonosoꞌ sontaronënpita aꞌnaquën aꞌpaitacaiso marë acorin. Inapitarinta huistino sontaroꞌsa paꞌyanatona taꞌarapisoꞌ quënanpi. Saono shaꞌhuitohuachinara, inaso tapon: “¿Aꞌnaquën sontaronëhuëpitari ahuërapi niꞌton, taꞌaramarai ti?” tënin. 17Napoaton sontaronënpita camairin:
—Insosona pahuaninsoꞌ nitotacaso marëꞌ yaꞌipinquëma niyontonatoma nipichico, itërin. Napotohuachina nipichipi. Napohuachinara Conatan catahuarinsoarë chachin nohuanpi. 18Naporo tahuëri corto huaꞌan inaquë nisarin. Napoaton, Saonosoꞌ coꞌhuara ahuëchátëraponhuëꞌ, Yosë yanatanin. Corto huaꞌani ipoto aꞌmosahuaton natanacaso niꞌton, Aiasi corto huaꞌan përarin:
—Ipoto quëcaton Yosë natanquë nohuantërinsoꞌ anitochinpoaꞌ, itërin. 19Corto huaꞌan nontaton napotopirinhuëꞌ, huiristinoꞌsa yaꞌhuëapiquësoꞌ, aquë aquëtë paꞌyanapi. Huaꞌyantatonaꞌ, “yai,” tërëꞌnachin taꞌa taꞌarantapi. Ina nicaton Saonoso corto huaꞌan itapon:
—Ama huachi quëquësohuëꞌ. Apiramiachin ahuëta marëꞌ pacacaso yaꞌhuërin, itërin.
20Saonosoꞌ sontaronënpitarë chachin aꞌnaroáchin niyontoantapi. Niyontonatonaꞌ, ahuëtacaiso marëꞌ pashica topi. Huiristinoꞌsasoꞌ, aquë aquëtë huaꞌyantopi. Huaꞌyantatonaꞌ, inahuara capini nitahuërëtopi quëran nitëparapi huachi. 21Naporahuaton naꞌa Israiro sontaroꞌsanta huaꞌqui huiristinoꞌsa catahuapirinahuëꞌ, Israiro sontaroꞌsa chachin catahuaantapi. Saono, Conatan, inapita sontaronënpita catahuaantapi. 22Iprain huënton israiroꞌsa noꞌpanëna motopiroꞌsaquë, aꞌnaquën naꞌpipi. Naꞌpirápirinahuëꞌ, huiristinoꞌsa taꞌarapisoꞌ natantopi. Ina natantatonaꞌ, inahuarinta ahuëcaiso marëꞌ imapi. 23Naporoꞌ niahuëpisoꞌ, ahuëtërëꞌnaichin Piti-apinquë huarëꞌ nincanpi. Ina pochin naporo tahuëri Siniorori israiroꞌsa nichaꞌërin.
Saono Yoscoarëꞌ tëninsoꞌ
24Naporo tahuëri israiroꞌsari huiristinoꞌsa canapi. Napoaponahuëꞌ, coꞌhuara ahuëchátërasoihuëꞌ, Saonoso piyapinënpita camairin: “Ipora tahuëri inimiconëhuëpita iꞌhuërëtaꞌhuaso yaꞌhuërin. Coꞌhuara inapochátërasohuëꞌ insosona coshatohuachin, Yosëri anaꞌinchin. Yoscoarëꞌ inapochin,” tënin. Ina tëꞌhuatatona Israiro sontaroꞌsasoꞌ, co coshatopihuëꞌ. Inapo ahuëtatonaꞌ, paꞌpi canotopi.
25-26Inimicoroꞌsa imasápatona Israiro sontaroꞌsasoꞌ, aꞌna tananaꞌhuayaquë canconpi. Inaquë ninoiꞌ noꞌpaquë anpoiárin quënanpi. Yaꞌhuërin quëran huiꞌshirápaton naporin. Nicaponaraihuëꞌ co insoari tëranta yapiꞌnirinhuëꞌ. Saono Yoscoarëꞌ tëninsoꞌ tëꞌhuatatona napopi. 27Conatanso nipirinhuëꞌ, paꞌpin naporinso co nataninhuëꞌ. Co nitotatonhuëꞌ huaranën quëran ninoiꞌ yaꞌhuërinquë pacomaitërin. Inapotaton irorin. Ina iroaton aꞌnaroáchin chiníquën cancantiintarin. 28Naporoꞌ aꞌna Israiro sontarori itapon:
—¡Maꞌhuantacha quëmasoꞌ ninan paya! Coꞌta quiyasoꞌ tata Yoscoarëꞌ taꞌton ama cosharo piꞌniaꞌhuaiso marëhuëꞌ shaꞌhuitërincoi: “Insosona cosharo piꞌnihuachin Yosëri anaꞌinchin,” tënin. Napoaton quiyasoꞌ yaꞌipicoi co huachi manta chiniraihuëꞌ, itërin. 29Napotohuachina, Conatani itapon:
—Tatahuë yaꞌipi israiroꞌsanpoa tëhuëtërinpoaꞌ. Niꞌquëꞌ, caso ninoiꞌ iroato chiníquën cancantërahuë. 30Cosharo inimicoroꞌsa osërëtërëhuasoꞌ caꞌnama naporini, yaꞌipinquëma chiníquën cancanchitomahuëꞌ. ¡Inapoatoma naꞌcon naꞌcon huiristinoꞌsa aꞌnaroáchin tëpaꞌitomahuëꞌ! itërin. 31Inapochin israiroꞌsari huiristinoꞌsa canapi. Miquimasi quëran ahuëtopisoꞌ, Aiaron ninano itopiquë huarëꞌ napotopi.
Israiro sontaroꞌsasoꞌ co huachi nanitopihuëꞌ. 32Napoinquëran inahuasoꞌ, inimicoroꞌsa osërëtopiso mapi. Ohuicaroꞌsaꞌ, ohuacaroꞌsaꞌ, toroaꞌhuaroꞌsaꞌ, inapita masahuatona tëpapi. Noꞌpaquë tëparahuatonaꞌ, co huënainën inquitaponaraihuëꞌ caꞌpi.
33Inapo caꞌsapirinahuëꞌ, aꞌnaquëni Saono shaꞌhuitapona paꞌpi:
—Sinioro pënëntërinsoꞌ co natëtonaraihuëꞌ, sontaroꞌsa oshahuanapi. Maꞌsharoꞌsa tëpatona co huënainën inquitaponaraihuëꞌ caꞌsapi, itopi. Napotohuachinara, sontaronënpita itapon:
—Sinioro camaitërinsoꞌ, co canpitaso natëramahuëꞌ. Aꞌnara pancaraꞌpi piꞌnapirahuatoma quëshico. 34Naporahuaton aꞌnapita sontaroꞌsanta shaꞌhuitoco ohuicanëna quëcacaisoꞌ. Toronënahuë nipon quëshiinaco iso pancaraꞌpi aipi tëpaꞌinaꞌ. Huënainën noquitacaso marëꞌ inapochinaꞌ. Inapotohuatamaꞌ, co Sinioro tëhuëtatoma oshahuanapomahuëꞌ, itërin.
Naporo tashi chachin aꞌnaya aꞌnaya toronëna quëcatonaꞌ, pancaraꞌpi aipi tëpapi. 35Saononta Sinioro chinotacaso marëꞌ aꞌnara artaro ninin. Ina artarosoꞌ, Saono yaꞌnan nininsoꞌ. 36Ina quëran Saono taantarin:
—Huëco paꞌmatëhua huiristinoꞌsa imaantaꞌahuaꞌ. Yaꞌipi maꞌshanëna matahuaꞌ. Tahuëriquë huarëꞌ ama aꞌnaya tëranta nichaꞌëahuasohuëꞌ, tënin. Napohuachina yaꞌipiya quëran napotopi:
—Quëma topatan, paꞌa imahuaꞌ, itopi.
Napopirinahuë Aiasi corto huaꞌansoꞌ tapon:
—Coꞌhuara paꞌshátërasëhuahuëꞌ, Yosëꞌton natahuan, tënin. 37Napohuachina Saonosoꞌ Yosë natanin:
—¿Huiristinoꞌsa taꞌarapisopita imaꞌi? ¿Catahuaponcoi inapita minsëaꞌhuaiso to? itërin. Napotopirinhuëꞌ, Siniorori naporo co manta aꞌpanirinhuëꞌ. 38Napoaton Saono yonquirin: “Inso tëranta ipora oshahuanin,” tënin. Inapo yonquiaton sontaro huaꞌanoꞌsa itapon:
—Yaꞌipinquëma sontaro huaꞌanoꞌsanquëma yaꞌcaritocoꞌ. Insosona tëhuëaton oshahuaninsoꞌ natantocoꞌ. 39Siniorosoꞌ nichaꞌërinpoaꞌ. Ina niꞌsárinco niꞌton, noꞌtëquën shaꞌhuitaranquëmaꞌ. Huiꞌnahuë tëranta tëhuërin nipachin, chiminarin, itërin. Napotopirinhuëꞌ, co insoari tëranta aꞌpanirinhuëꞌ. 40Napoaton Saonori yaꞌipi israiroꞌsa itapon:
—Yaꞌipinquëma canpitasoꞌ, pasëran huanicoꞌ. Caso huiꞌnahuëroꞌco isëran huaniarahuë, tënin. Napohuachina sontaronënpitari itaponaꞌ:
—Inta nipachin, itopi. 41Naporoꞌ Saonosoꞌ chiníquën Yosë nontërin:
—Sinioro quëmasoꞌ yaꞌipi israiroꞌsacoi chinotërainquën. Ipora tahuëri anitotancoiso marëꞌ natanpiranquënhuëꞌ, co aꞌpanirancohuëꞌ. Ca huiꞌnahuëroꞌco tëhuërahuë nipachin, nicanapiso pochin nipatoi Orin pipiarin. Yaꞌhuërëꞌ aꞌnapita israiroꞌsa tëhuëhuachinaꞌ, Tomin pipiarin, itërin. Napotohuachina Yosë nohuanton Conatan, Saono, inapita marëꞌ nininsoꞌ pipirin. Aꞌnapita israiroꞌsasoꞌ, co manta naꞌinpihuëꞌ.
42-44Ina quëran Saono taantapon:
—Iporaso huiꞌnahuëroꞌco yaꞌhuërëꞌ, nicanariꞌi, taantarin. Napohuachina, Conatan marëꞌ nininsoꞌ pipirin. Napoaton Saonosoꞌ huiꞌnin itapon:
—Shaꞌhuitoco conpa: ¿Maꞌta onporan? itërin. Napotohuachina inari itapon:
—Huaranëhuë quëran ninoiꞌ yaꞌhuërinquë pacomaitahuato piꞌnirahuë pora. ¡Co inaya marëáchin tëpaancoso yaꞌhuërinhuëꞌ, tënahuë! itërin. Napotohuachina Saonori chiníquën itaantarin:
—¡Coꞌsoꞌ ipora chiminpatanhuëꞌ, Yosë chini chiníquën anaꞌinchinco! itërin. 45Inaso napopirinhuëꞌ, yaꞌipi Israiro sontaroꞌsari huanirahuatona itaponaꞌ:
—¡Co Conatan chiminacaso yaꞌhuërinhuëꞌ! ¡Ina caniaritërin niꞌton, inimiconënpoa minsërëhuaꞌ! ¡Co ina pochin nicacaso yaꞌhuërinhuëꞌ! ¡Sinioro nanpiárin nichinapon chachin co nohuantëraihuëꞌ Conatan maꞌsha onpocasoꞌ! Inari mini catahuarin niꞌton, naporinsoꞌ, itopi. Napotatonaꞌ, Conatan nichaꞌëpi. 46Saonosoꞌ huistino sontaroꞌsa tananpitërin. Tananpitohuachina, inahuaso yaꞌhuëpiꞌpaꞌ paantapi.
47Inapoaton Saono israiroꞌsa huaꞌanëntërin. Sontaronënpitarë chachin itohua itohua noꞌpanënaquë inimicoroꞌsa ahuërin. Inimiconënpitasoꞌ: Moaporoꞌsaꞌ, amonoꞌsaꞌ, itomoroꞌsaꞌ, inapita. Sopa copirno, huiristinoꞌsaꞌ, inapitarinta inimicotopi. Intohua tëranta Saono sontaronënpitarë ahuëtapona paꞌpachinara, canatëraꞌpiarin. 48Panca huënton sontaroꞌsa yontonahuaton, Saonosoꞌ amaricoroꞌsanta minsërin. Inapoaton, israiroꞌsa ihuatë huëntonoꞌsa quëran nichaꞌërin.
49Saono huiꞌninpitasoꞌ, isopita: Conatan, Isipi, Maraquisoa, inapita. Sanapiꞌsanta cato yaꞌhuëtërin: Paya payasoꞌ, Mirapo itopi. Huaꞌhua nininsosoꞌ, Micaro itopi. 50Saono saꞌinsoꞌ, Ainoama itopi. Inasoꞌ paꞌpin Aimasë itopi. Sontaronënpita huaꞌanëontaꞌ, Apiniro itopi. Inasoꞌ paꞌpin Niro itopi. Nironta Saono apin. 51Shaꞌhuitëranquëmaso chachin Saono paꞌpinsoꞌ Quisi itopi. Apiniro paꞌpionta Niro itopi. Quisi, Niro, inapitanta Apiiri huiꞌninpita.
52Saono huaꞌanëntapon, inaso sontaronënpitarë chachin huiristinoꞌsarëꞌ niahuërápi. Paꞌpi chiníquën ninoꞌhuitona niahuërápi. Napoaton Saonosoꞌ chiníquën nipisopita, chiníquën cancantopisopita, inapita huayonin. Yaꞌipi israiroꞌsa quëran huayonahuaton, sontaronënpita nicacaso marëꞌ acorin.
Currently Selected:
1 Samuel 14: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
