1 Samuel 12
12
Samoirori israiroꞌsa nontërinsoꞌ
1Naporo tahuëri chachin Samoirori yaꞌipi israiroꞌsa inaquë nisapisoꞌ, itapon:
—Niꞌcoꞌ. Iꞌhua natanamacoso chachin nani acotëranquëmaꞌ. Nani copirno huaꞌanëntiinquëmaso acorahuë. 2Maꞌtana ipora quëran huarëꞌ copirno huaꞌanëntarinquëma nisapasoꞌ. Cantaꞌ, huiꞌnapitërahuë quëran huarëꞌ huaꞌanëntëranquëmaꞌ. Ina nipirinhuëꞌ, nani mashotërahuë. Mashotato acasáchin niconahuë. Huiꞌnahuëpitanta nohuitëramaꞌ. Inapitanta isëquë chachin nisapi. 3Iporasoꞌ, canpitarëꞌco onpo sacatërahuësosona shaꞌhuicoꞌ. Toronëmahuë nipon, moranëmahuë nipon matohuatënquëmaꞌ, noꞌtëquën shaꞌhuicoꞌ. Inquëma tëranta aparisitëranquëmaꞌ, maꞌsha onpotëranquëmaꞌ, napotohuatënquëmaꞌ, noꞌtëquën shaꞌhuicoꞌ. Insonquëma tëranta tëhuëpiramahuë pahuërëramaco niꞌton, co anaꞌintohuatënquëmahuëꞌ, shaꞌhuico antaꞌ. Sinioro nani nitotërin. Copirno acorinsonta natanarinpoa niꞌton, nihuihuatënquëmasoꞌ noꞌtëquën pahuërëaranquëmaꞌ, itërin. 4Napotohuachina, inahuarisoꞌ itaponaꞌ:
—Co onporonta ihuarancoihuëꞌ. Co aparisitërancoihuëꞌ. Co maꞌsha onpotërancoihuëꞌ. Co incoi tëranta pahuërëatëinquën anaꞌintancoiso chaꞌëtëraihuëꞌ, itopi.
5—Co maquë tëranta tëhuëtëranquëmasoꞌ nani shaꞌhuiramaꞌ. Siniorosoꞌ nani nataninquëmaꞌ. Copirno acorinsonta nani nataninquëmaꞌ, taantarin Samoiro.
—Naporin mini, taantapi israiroꞌsaꞌ.
6Ina quëran Samoirosoꞌ yaꞌipi israiroꞌsa itaantapon:
—Moisësë, Aaron, inapitari Iquipito quëran shimashonënpoapita ocoipi. Sinioro nohuanton napopi. 7Iporasoꞌ noya natanco: Sinioronta niꞌsárinco niꞌton, noꞌtëquën ayonquiꞌinquëmaꞌ: “Ina catahuaarinpoaꞌ,” taꞌtomaꞌ, co copirno natanamaso nipirinhuëꞌ. Ina natantatomaꞌ, oshahuanamaꞌ. Paꞌa carinquëma Sinioro nosoroatonpoa catahuarinpoasoꞌ, ayonquiꞌinquëmaꞌ. Shimashonënpoapitanta catahuarinsoꞌ ayonquiꞌinquëmaꞌ. 8Cacopo huiꞌninpita, shinpita, inapita iráca Iquipitoquë paꞌpi. Paꞌpachinara, iquipitoroꞌsari chiníquën aparisitopi. Inapotohuachinara shimashonënpoapitasoꞌ, Sinioro nontopi huachi. Inariso natanahuaton, Moisësë, Aaron, inapita acorin catahuacaiso marëꞌ. Inapitari Iquipito quëran ocoirahuatonaꞌ, shimashonënpoapitasoꞌ iso noꞌpaquë yaꞌhuëcaiso marëꞌ quëpi. 9Inapitaso napoaponahuëꞌ, Sinioronënpoa naniantopi. Inaso Yosënëna nipirinhuëꞌ, naniantopi. Napopiso marëꞌ ina nohuanton inimiconënapitari ahuërahuatona minsëipi. Capin copirnosoꞌ, Asoroquë huaꞌanëntërin. Sontaronënpita huaꞌanënsoꞌ, Sisara itopi. Inari minsëiton, huaꞌanëntërin. Huiristinoꞌsaꞌ, moaporoꞌsaꞌ, inapitarinta canarahuatona inapotopi. 10Inapotohuachinara, Sinioro aꞌpopiso yonquiantapi: “Sinioro, aꞌpoatëinquën nisha nisha mamanshiroꞌsa mosharaiso marëꞌ oshahuanai. Paaro, Asotariti, inapita mamanshiroꞌsa nonanpiso moshapiraihuëꞌ, ina aꞌpoarai. Ina aꞌpoatoi, quëmasáchin chinotarainquën. Nosoroatoncoi inimiconëhuëipita quëran nichaꞌëcoi,” itopi. 11Ina niꞌton, Siniorori Quiropaaro, Quipiti, inapitaꞌton nichaꞌëinquëmaso marëꞌ acorin. Ina piquëran cantaꞌ, ina marë chachin acorinco. Inapotërainquëma niꞌton, canpitaso naꞌa piꞌipi noya yaꞌhuëramaꞌ. 12Napoaponahuëꞌ, amonoꞌsa copirno Naasë itopiso yaahuërinquëmasoꞌ, natantëramaꞌ. Ina natantatomaꞌ, copirno acotaꞌhuanquëmaso natanamaco. Sinioro chachin copirnonënpoaso nipirinhuëꞌ, naporamaꞌ. Inaso Yosënënpoa chinotërëhuasoꞌ.
13Iporasoꞌ, copirno huayonamaso isëquë chachin nisarin. Copirno natanamasoꞌ, Sinioro acotërinquëma huachi. 14Sinioro noya nicatoma natëcoꞌ. Inasáchin chinotatomaꞌ, nohuantërinsoꞌ natancoꞌ. Camaitërinsopita noꞌtëquën natëtocoꞌ. Inapoatomaꞌ, copirnonëmarëꞌquëma chachin Sinioro nohuantërinso nicoꞌ. Inaso Yosënënpoa niꞌton, inapocoꞌ. Inapohuatamaꞌ, noya yaꞌhuaramaꞌ. 15Co natëtatomarahuëꞌ camaitërinsopita aꞌpohuatamasoꞌ, inasoꞌ anaꞌintarinquëmaꞌ. Copirnonëmarë chachin anaꞌintarinquëmaꞌ.
16Ama patacosohuëꞌ. Inaquëranchin ninacoꞌ. Sinioro huëhuëpiro nininsoꞌ aꞌnotarinquëmaꞌ. Chini chiníquën nanantërinsoꞌ anitotiinquëmaso marëꞌ aꞌnotarinquëmaꞌ. 17Ipora tahuëriꞌsa trico macacaso tahuëri niꞌton, ¿co oꞌnaninhuëꞌ paꞌ? Napopirinhuë Yosë nontohuato, ina nohuanton huira, oꞌnan, inapita anotarin. Inapohuachin, Sinioro yonquirapirinquëmasoꞌ, nitotaramaꞌ: “Copirno acotiinpoaso natanatëhuaꞌ, paꞌpi co noyahuëꞌ ninëhuaꞌ,” tosaramaꞌ, itërin. 18Ina tosahuaton Samoirosoꞌ Sinioro nontërin: Nontohuachina, naporo chachin ina nohuanton huira, oꞌnan, inapita anotërin. Naporoꞌ israiroꞌsasoꞌ, Sinioro paꞌpi tëꞌhuatopi. Samoironta tëꞌhuatopi.
19Napoaton yaꞌipiya quëran Samoiro itaponaꞌ:
—Sinioroso Yosënën niꞌton, ina nontëquë quiya marëꞌ. Quiyasoꞌ quëma piyapinënpitacoi ninai. Ama anaꞌintatoncoi tëpaincoiso marëhuëꞌ ina nontëquëꞌ. Paꞌpi co noyahuëꞌ nicatoi oshahuanapiraihuëꞌ, copirno acotiincoiso natanatoi, naꞌcon naꞌcon tëhuërai, itopi.
20Napotohuachinara, Samoirorisoꞌ itapon:
—Ama paꞌyancosohuëꞌ. Tëhuënchachin mini copirno acotiinquëmaso natanatomaꞌ, paꞌpi co noyahuëꞌ ninamaꞌ. Napopiramahuëꞌ, ama Sinioro aꞌpocosohuëꞌ. Yaꞌipi cancanëma quëran inasáchin chinotocoꞌ. 21Ama mamanshiroꞌsa moshacosohuëꞌ. Inapitasoꞌ, co catahuainpoaso nanitopihuëꞌ. Co nichaꞌëinpoasoꞌ nanitopihuëꞌ. Nonpin yosëroꞌsa niꞌton, co nanitopihuëꞌ. 22Sinioronënpoasoꞌ Yosë chachin. Inaora nohuanton israiroꞌsanpoa huayoninpoaꞌ. Inasoꞌ, nani shaꞌhuitërinpoa aꞌpainpoasoꞌ. Co inasoꞌ aꞌpoarinpoahuëꞌ. Yaꞌipi shaꞌhuitërinpoasoꞌ acotarinpoaꞌ. Yaꞌipi isoroꞌpaquë yaꞌhuëpisopita noya nicatonaꞌ: “Ma noyacha inaso paya,” taꞌcaiso marëꞌ napotarinpoaꞌ. 23Caso nipirinhuëꞌ, canpita marëꞌ orarahuësoꞌ, co tananpitapohuëꞌ. Tananpitohuatosoꞌ, Sinioro co natëtohuëꞌ oshahuanarahuë. Naporahuaton carima aꞌchintáponquëma noya nicatoma noꞌtëquën ina imacamaso marëꞌ. 24Yosëso tëhuënchachin nosoroatonpoa naꞌcon catahuarinpoaꞌ. Ina yonquiatoma canpitasoꞌ, inaíchin noya nicatoma natëcamaso yaꞌhuërin. Yaꞌipi cancanëma quëran noꞌtëquën ina chinotamaso yaꞌhuërin. 25Napotopiranquëmahuëꞌ, canpitasoꞌ co noyahuëꞌ nicacamasoráchin cancantohuatamaꞌ, inimicoroꞌsa minsëarinquëmaꞌ. Sinioro nohuanton minsërahuatënënquëma yaꞌhuërama quëran ocoiarinquëmaꞌ. Copirnonëmarë chachin asacatiimaso marëꞌ yaꞌhuëpiꞌpaꞌ quëpaponënquëmaꞌ, itërin.
Currently Selected:
1 Samuel 12: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
