1 Reyes 10
10
Sapa noꞌpaꞌ copirnori, Saromon nicapon huëꞌninsoꞌ
1Sapa noꞌpaꞌ copirnosoꞌ, sanapi. “Saromon Yosëri catahuarin niꞌton, yonquínahuan,” topisoꞌ natantërin. Ina natantaton yatënirin: “Tëhuënchachin yonquínahuan nipachin, sacaiꞌ yonquicaso nininsopita natanpato, aꞌpaniponco,” taꞌton, Quirosarinquë huëꞌnin.
2Chini chiníquën nanantopisopita huaꞌanoꞌsari caꞌtanpi. Camiyonënpitaquë pimo huaꞌsairoꞌsaꞌ, oro, naꞌpiraꞌhua paꞌton nininsopita, inapita notohuaroꞌ quënin. Saromonquë canquihuachina, tënicaso marëꞌ maꞌpitaso yanataninsopita natanin. 3Natanpachina, inariso yaꞌipi noꞌtëquën aꞌpanirin. 4Yaꞌipi noꞌtëquënáchin aꞌpanitërinso natanaton: “Tëhuënchachin iso quëmapisoꞌ, yonqui yonquínahuan,” tënin. Huaꞌanëntërinso pëi anitërinsontaꞌ, niꞌnin. 5Misanënquë naꞌa noya cosharo capacaiso marëꞌ acopisoꞌ, huaꞌanoꞌsa yaꞌhuëcaiso marëꞌ noyápiachin patoanaroꞌsa acotërinsoꞌ, piyapinënpita, oꞌshinaꞌpi huaꞌanoꞌsanënpita, onpo sacatopisoꞌ, onpo aꞌmoanpisoꞌ, corto huaꞌanoꞌsanta Sinioro marëꞌ noya maꞌsharoꞌsa tëparahuatona yaꞌipi ahuiquitopisoꞌ, yaꞌipi inapita niꞌnin. Yaꞌipi inapita niꞌsahuaton, paꞌpi paꞌyantërin.
6Paꞌyanaton Saromon itapon: “Yaꞌhuërahuëso parti, yonquínahuan ninansoꞌ natantërahuë. Maꞌpitasona ninansopitantaꞌ, natantërahuë. Noꞌtëquën shaꞌhuitërinaco, tënahuë. 7Shaꞌhuitopirinacohuëꞌ, co natëtërahuëꞌ. Caora chachin huëcato niꞌcaꞌhuarëꞌ natëtërahuë huachi. Nitotëransopita, maꞌsha yaꞌhuëtërinquënsopita, inapita shaꞌhuitopirinacohuëꞌ, co nanirinso chachin shaꞌhuitërinacohuëꞌ, tënahuë. 8¡Saꞌanpita, yaꞌipi piyapinënpita, inapita nóya yaꞌhuëpi niꞌnahuë! Inapitasoꞌ nani tahuëri nonansoꞌ natanápatonaꞌ, capa cancantopi, tënahuë. 9Sinioroso Yosënën niꞌton, noya nicatënquën acorinquën israiroꞌsa huaꞌanëntamaso marëꞌ. Inasoꞌ, israiroꞌsa nosororinsoꞌ co onporonta nishatarinhuëꞌ. Napoaton, noꞌtëquën huaꞌanëntacaso marëꞌ acorinquën. ¡Ma noyacha Sinioroso paya!” itërin.
10Napotahuaton cara huaranca iscon pasa saota shonca quiro quëꞌninsoꞌ, oro quëtërin. Naꞌpiraꞌhua paꞌton nininsopita, pimo huaꞌsairoꞌsaꞌ, inapitanta notohuaroꞌ quëtërin. Co onporonta ina nápo pimo huaꞌsaiꞌ israiroꞌsa yaꞌhuëpiquë, quëchinpihuëꞌ. 11-13Saromoninta notohuaroꞌ maꞌsha nicanarin. Naporahuaton maꞌpitaso nataninsopita quëtërin. Ina piquëran Sapa copirnosoꞌ, caꞌtaninsopitarë chachin yaꞌhuërinꞌpaꞌ panantarin.
Naporahuaton Iran copirno nanchanënpitantaꞌ, paꞌanamarëꞌ paꞌpi quëran, oro quëpi. Opiro parti quëran quëpi. Notohuaroꞌ santaro nontëꞌ, naꞌpiraꞌhua paꞌton nininsopita, inapitanta quëpi. Ina santaro nontë quëran Yosë chinotacaso pëiquë nanpënanoꞌsa yaꞌhuërinsoꞌ, matatona nanpëcaisoꞌ acotëraꞌpiapi. Huaꞌanëntërinso pëiquëntaꞌ, inapotopi. Arparoꞌsaꞌ, quitara pochin nipisopita, inapitanta piꞌninaꞌpiroꞌsa marëꞌ ina nontë quëran chachin nitopi.
Saromon maꞌhuanaton nahuininsoꞌ
14-15Nani piꞌiquë maꞌsha paꞌanaꞌpiroꞌsasoꞌ, Israiro noꞌpaquë Saromon copirno pahuërëpi. Arapia parti copirnoroꞌsa yaꞌhuëpisopitarintaꞌ, ina pahuërërápi. Yaꞌipi Israiro huëntonoꞌsaquë chirinchiroꞌsa yaꞌhuëpisopitarintaꞌ, pahuërërápi. Inapitari pahuërëpisoꞌ aquëtë Saromonsoꞌ, cato shonca cato huaranca quiro oro quëꞌninsoꞌ nani piꞌiquë maꞌpatërin. 16Notohuaroꞌ oro yaꞌhuëtaton Saromonsoꞌ, cato pasa iscoto inaquëran anitërin. Pancaráchin anitërin. Aꞌnaya aꞌnaya saota quiro quëꞌninsoꞌ anitërin. 17Ina nápo anitahuaton, cara pasa iscotoaꞌhuanta oro quëran chachin anitaantarin. Aꞌnaya aꞌnaya quiro miria naꞌcon quëꞌninsoꞌ anitërin. Nani anitahuaton: “Nipano tanan pëiꞌ” itopiquë acorin.
18Huaꞌanëntacaso shiranëntaꞌ, huiri pomon quëran anitërin. Nani tënihuachinara, oro quëran yaꞌipi pashitopi. 19Ina shirasoꞌ, nanpënan yaꞌhuëtërin. Saota achinahuan. Pisanamëntaꞌ, tahuishin miachin. Huënsërinsoꞌ, panca naꞌhuëtërin. Tanpaquën yaꞌnanacaso marëntaꞌ, cato tëranchin yaꞌhuëtërin. Inapita pirayan, aꞌnatëran, aꞌnatëran paꞌpiniꞌ nonanpisoꞌ huaniárin acopi. 20Aꞌnaya aꞌnaya achinanoꞌsaquëntaꞌ, cato cato paꞌpiniꞌ nonanpisoꞌ acoraꞌpiapi. Aꞌnatëran aꞌnatëran aꞌnara acopi. Yaꞌipiya quëran shonca cato yaꞌhuërin. ¡Co onporonta aꞌna parti ina shira pochin nichinpihuëꞌ!
21Oꞌorinquë minëroꞌsantaꞌ, oro quëransáchin nipi. “Nipano tanan” itopiso pëiquënta coshatacaiso marëꞌ ohuarapisopitasoꞌ, inanpi quëransáchin nipi. Co manta prata quëranso yaꞌhuërinhuëꞌ. Naporo tahuëriꞌsasoꞌ, naꞌcon naꞌcon oro yaꞌhuërin niꞌton, pratasoꞌ, co aquëtë paꞌtërinhuëꞌ. 22Tarsis ninano itopiquë Saromonsoꞌ nancharoꞌsa anitërin. Inapitaquë piyapinënpitari nani cara piꞌipi quëran oro quëshipi. Prata, huiri pomon, tanpahuanoꞌsaꞌ, nisha huaro huaroroꞌsaꞌ, inapita quëshipi. Iran copirno nanchanënpitarë chachin paꞌsahuatona quëshipi. 23Saromon copirnosoꞌ, yaꞌipi isoroꞌpaquë copirnoroꞌsa naꞌhuëtërin. Maꞌhuanin quëran naꞌhuëtahuaton, yonquínahuan ninin quëraontaꞌ, naꞌhuëtëraꞌpiarin. 24Napoaton naní quëran yaniꞌpi. Noninsonta yanatanpi. Yosëri yonquínahuan acorin niꞌton, yanatanpi. 25Naporahuaton nani piꞌiquë maꞌsha tëranta quëpatopi nicanacaiso marëꞌ. Prata quëran nipisoꞌ, oro quëran nipisoꞌ, aꞌmocaiso nipisopita, ahuëtacaiso marëꞌ ohuarapisopita, cosharo apimotacaso marëꞌ yaꞌhuërinsopita, cahuarioroꞌsaꞌ, moraroꞌsaꞌ, inapita quëpatopi.
Saromon toronanoꞌsaꞌ, cahuarioroꞌsaꞌ, inapita paꞌaninsoꞌ
26Saromon toronanoꞌsa paꞌanahuaton, cahuarioquë paꞌnapiroꞌsanta camairin. Huaranca catapini pasa toronanoꞌsa yaꞌhuëtërin. Cahuarioquë paꞌnapiroꞌsanta shonca cato huaranca camairin. Inapitasoꞌ nisha nisha ninanoroꞌsaquë acorin. Ahuëtacaiso toronanoꞌsa acorinquë, acoraꞌpiarin. Napopinchin Quirosarinquë aꞌpaito sontaroꞌsa yaꞌhuërinquënta acorin. 27Paꞌpi notohuaroꞌ prata Quirosarinquë ayontonin. Naꞌpiroꞌsa pochin anaꞌatërin. Nonarantaꞌ, anaꞌatërin. Canonquë tanan iquiraroꞌsa naꞌarinso nápo anaꞌatërin. 28-29Cahuarioroꞌsasoꞌ, copirno marëꞌ maꞌsha paꞌanpisopitari Iquipitoquë paꞌanpi. Sisiria partinta paꞌanpi. Inaquëpita noya noya cahuarioroꞌsa yaꞌhuërin niꞌton, napopi. Paꞌanatona copirno nanchanënpitaquë, israiroꞌsa yaꞌhuëpiquë aꞌpaintapi. Iquipitoquë toronan paꞌanpachinara, saota pasatëꞌ coriqui marëꞌ paꞌanpi. Ina coriquisoꞌ, prata quëran ninin. Yaꞌhuërëꞌ aꞌnara cahuarioso paꞌanpachinara, pasa aꞌnatërápo shoncatë marëꞌ paꞌanpi. Iti copirnoroꞌsaꞌ, Siria copirnoroꞌsaꞌ, inapitanta huëꞌsahuatonaꞌ, ina cahuarioroꞌsaꞌ, toronanoꞌsaꞌ, inapita paꞌanquipi. Copirno marëꞌ maꞌsha paꞌanpisopitari paꞌantopi.
Currently Selected:
1 Reyes 10: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
