1 Corintios 7

Yasaꞌarinsopita pënëninsoꞌ

1Iꞌhua chachin ninshitatomaco, nisha nisha natanamaco niꞌton, shaꞌhuichinquëmaꞌ. Quëmapi co yasaꞌapachinhuëꞌ, noya inaora yaꞌhuëcasoꞌ, tënahuë. 2Napoaponahuëꞌ, naꞌa piyapiꞌsaꞌ monshihuanapi niꞌton, naꞌcon naꞌcon quëmapiꞌsaꞌ saꞌainaꞌ. Ama monshihuanacaiso marëhuëꞌ saꞌainaꞌ. Quëmapiꞌsaꞌ saꞌinaráchin yonquiꞌinaꞌ. Inapochachin sanapiꞌsantaꞌ soꞌináchin yonquiꞌinaꞌ. 3Quëmapiꞌsaꞌ saꞌinaꞌ noya nosoroatonaꞌ, ichihuëꞌëinaꞌ. Inapochachin sanapiꞌsantaꞌ soꞌinaꞌ nosoroatonaꞌ, huëꞌëpainaꞌ. 4Sanapi nani soꞌyahuachina, co inaora nohuantërinsoꞌ yonquicasoꞌ yaꞌhuërinhuëꞌ. Soꞌin nohuantërinsontaꞌ yonquicasoꞌ yaꞌhuërin. Quëmapintaꞌ co inaora nohuantërinsoꞌ yonquicasoꞌ yaꞌhuërinhuëꞌ. Saꞌin nohuantërinsontaꞌ yonquicasoꞌ yaꞌhuërin. 5Ama niaꞌpoꞌinasohuëꞌ, niichihuëꞌëinaꞌ. Aꞌna tahuëriso nipirinhuëꞌ quëmapi saꞌinë chachin inahuara yonquinëna quëran nohuantohuachinaꞌ, naꞌcon naꞌcon Yosë nontacaiso marëꞌ nisha huëꞌëinaꞌ. Ina quëran naquëranchin nihuëꞌëpantaꞌinaꞌ ama nisha yonquicaiso marëhuëꞌ. Ama huaꞌquiꞌ nisha huëꞌëcosohuëꞌ, Satanasë minsëchinquëmaꞌ.

6Napoaton yasaꞌapatamaꞌ, saꞌacoꞌ, tënahuë. Co yasaꞌapatamahuëꞌ, noyatapon. Co Yosë ina pochin camaipirinpoahuëꞌ, ayonquirinco niꞌton, shaꞌhuitaranquëmaꞌ. 7Caso nipirinhuëꞌ co saꞌahuancohuëꞌ. Co mantaꞌ sanapi sëꞌhuarahuëꞌ. Yosë catahuarinco ahuantaꞌhuasoꞌ. Paꞌsápato, aꞌchinárahuë. Naꞌa quëmapiꞌsaꞌ ca pochin nipi naporini, noya niitonahuëꞌ, topirahuëꞌ. Co yaꞌipi nanitopihuëꞌ ca pochin nicacaisoꞌ. Yosë catahuarinpoaꞌ nisha nisha nicacasoꞌ. Aꞌnaquën ina nohuanton, saꞌarin. Aꞌnaquënso nipirinhuëꞌ ina nohuanton, noya inaora yaꞌhuërin.

8Co yasaꞌapatamahuëꞌ, noya nisaramaꞌ. Inapochachin quëyoronoꞌsaꞌ co yasoꞌyantahuachinahuëꞌ, noya nisapi. Cantaꞌ caora yaꞌhuarahuë. 9Napoaponahuëꞌ, sanapi nohuantohuatamaꞌ, macoꞌ. Noya saꞌacasoꞌ. Aꞌnaquën co saꞌapachinahuëꞌ, nisha nisha yonquipi. Sanapi sëꞌhuacaisoachin nohuantopi. Ina pochin cancantohuachinaꞌ, saꞌainaꞌ. Ina noya, tënahuë.

10Nani sanapi mapatamaꞌ, inarëꞌquëmáchin yaꞌhuëcoꞌ, tënahuë. Co casáchin naporahuëꞌ. Quisocristo shaꞌhuitërinpoaꞌ niꞌton, natëcasoꞌ yaꞌhuërin. Sanapiꞌsantaꞌ soꞌyahuachinaꞌ, soꞌinaꞌ chinpitomiatacasoꞌ yaꞌhuërin. 11Nipirinhuëꞌ, co chinpitohuachinhuëꞌ, ama huachi aꞌna quëmapi soꞌyachinsohuëꞌ. Soꞌin chachin chinpitantahuachin, noya nisarin. Quëmapiꞌsantaꞌ saꞌapachinaꞌ, ama saꞌinaꞌ tëꞌyachinasohuëꞌ.

12Isontaꞌ pënëantaranquëmaꞌ. Quisocristo isoroꞌpaquë nipon, co napopirinhuëꞌ, noya pënënaranquëmaꞌ, tënahuë. Aꞌnaquëmaꞌ coꞌhuara Quisocristo imashatërapomahuëꞌ, saꞌaramaꞌ. Iporasoꞌ imapiramahuëꞌ, saꞌamasoꞌ co yaimarinhuëꞌ. Noya yacapahuachinquëmaꞌ, ama tëꞌyatocosohuëꞌ. 13Canpitantaꞌ, imoyaroꞌsaꞌ, aꞌnaquëmaꞌ imapomarahuëꞌ, co soꞌyamasoꞌ yaimarinhuëꞌ. Co yatëꞌyatohuachinquëmahuëꞌ, ama taꞌananpicosohuëꞌ. Noya yacahuatomaꞌ, chinpitocoꞌ. 14Aꞌnaíchin imaponahuëꞌ, noya ichiyaꞌhuëꞌin. Saꞌin imapachina, soꞌiontaꞌ Yosëri noya yonquiarin. Oshaquëran imapon nimara. Inapochachin quëmapi imanaꞌpi nipachina, saꞌiontaꞌ Yosëri noya yonquiarin. Huiꞌninpitantaꞌ noya yonquiarin. Co ichiyaꞌhuëhuachinhuëꞌ, huiꞌninpita co onporontaꞌ Yosë imaponahuëꞌ nimara. 15Nichinpitacasoꞌ noya noya nipirinhuëꞌ, quëmapihuëꞌ nipon, co imatonhuëꞌ yapaꞌpachin, noya paꞌin. Sanapintaꞌ co imatonhuëꞌ yapaꞌpachin, noya inantaꞌ paꞌin. “Noya niniꞌtomaꞌ, yaꞌhuëcoꞌ,” itërinpoaꞌ Yosë. 16Sanapi noya imaponahuëꞌ, soꞌinsoꞌ co onporontaꞌ imaponhuëꞌ nimara. Quëmapintaꞌ noya imaponahuëꞌ, saꞌinsoꞌ co imaponhuëꞌ nimara. Co nitotërëhuahuëꞌ.

17Yosë nohuanton, nisha nisha ninëhuaꞌ. Co napopináchin ninëhuahuëꞌ. Onpopinsona nicasëhuaꞌ Yosë imapatëhuaꞌ, inachachin niahuaꞌ. Yaꞌhuërëhuaquë chachin sano yonquiatëhuaꞌ, imahuaꞌ. Paato, yaꞌipi imapisopita inachachin pënënarahuë. 18Aꞌnaquëmaꞌ coꞌhuara imashatërapomahuëꞌ, marca acotërinënquëmaꞌ. Quisocristo imapatamaꞌ, ama ina marëꞌ tapancosohuëꞌ. Naporahuaton, co marca yaꞌhuëtohuachinquëmahuëꞌ, ama niacotocosohuëꞌ. 19Co marca yonquicasoꞌ yaꞌhuërinhuëꞌ. Yosë natëcasorachin yonquicoꞌ. 20Yaꞌnan Quisoso imapatamaꞌ, onpopinsona nicasëmaꞌ imapatamaꞌ, inachachin nisácoꞌ. Ama aꞌnaꞌ aꞌnaꞌ pochin yonquicosohuëꞌ. 21Aꞌnaquëmaꞌ patron marërachin sacatohuatamaꞌ, ama ina marëꞌ sëtocosohuëꞌ. Nipirinhuëꞌ nanitohuatamaꞌ, pipimiatatomaꞌ, canpitaora marëꞌ sacatocoꞌ. 22Patron marëꞌ sacatapomarahuëꞌ, Yosë huayonpachinquëmaꞌ, oshanëmaꞌ inquitatënquëmaꞌ, nichaꞌërinquëmaꞌ. Ina yonquiatomaꞌ, co huachi sëtacasoꞌ yaꞌhuërinhuëꞌ. Inapochachin aꞌnaquëmaꞌ co patron asacatopirinquëmahuëꞌ. Yosë nichaꞌërinquëmaꞌ niꞌton, ina naꞌcon naꞌcon natëcamasoꞌ yaꞌhuërin. Yosë piyapinënpita ninamaꞌ. 23Quisocristo chiminaton, nichaꞌërinquëmaꞌ. Inasáchin natëtomaꞌ, yonquicoꞌ. Ama piyapiꞌsa marëáchin sacatatomaꞌ, Yosë naniantocosohuëꞌ. 24Napoaton iyaroꞌsaꞌ yaꞌnan imapatamaꞌ, onpopinsona nicasëmaꞌ imaramaso chachin nisácoꞌ. Yosë niꞌsarinquëmaꞌ.

25Iporasoꞌ co saꞌarinsopitahuëꞌ, co soꞌyarinsopitahuëꞌ, inapita maꞌsona onpocasoꞌ shaꞌhuichinquëmaꞌ. Quisocristo isoroꞌpaquë nipon, co ina aꞌchinpirinhuëꞌ, catahuarinco noꞌtëquën pënënaꞌhuasoꞌ. Nosoroatonco, acorinco nanamën aꞌchinaꞌhuaso marëꞌ. Napoaton nanitëramaꞌ natëamacosoꞌ, tënahuë. 26Ipora tahuëriꞌsaꞌ sacaiꞌ imacasoꞌ, naꞌcon aparisitarinënpoaꞌ. Napoaton onporamasona yaꞌhuapomaꞌ, inachachin yaꞌhuëcoꞌ. 27Saꞌahuanpatamaꞌ, ama tëꞌyatocosohuëꞌ. Co saꞌahuanpatamahuëꞌ, noya canpitaora yaꞌhuëcoꞌ. 28Napoaponahuëꞌ, sanapi nohuantohuatamaꞌ, macoꞌ. Noya saꞌacasoꞌ. Inapochachin nanoꞌsantaꞌ yasoꞌyahuachinaꞌ, noya nisapi. Co ina marëꞌ oshahuanapihuëꞌ. Nipirinhuëꞌ, saꞌahuanoꞌsaꞌ, soꞌyahuanoꞌsaꞌ inapitasoꞌ saca sacaiꞌ yaꞌhuaponaꞌ. Co nohuantërahuëꞌ canpitasoꞌ ina pochin nicacamasoꞌ.

29Niꞌcoꞌ, iyaroꞌsaꞌ. Yosë nohuanton, co huaꞌquiꞌ isoroꞌpaquë yaꞌhuarihuahuëꞌ. Napoaton saꞌahuanpatamaꞌ, ama saꞌamachin yonquicosohuëꞌ. Yosë naꞌcon naꞌcon yonquicoꞌ. 30Aꞌna tahuëri sëtapomarahuëꞌ, ama sëtacamasorachin yonquicosohuëꞌ. Yosë yonquiatomaꞌ, noya cancantocoꞌ. Aꞌna tahuërintaꞌ capa cancantapomarahuëꞌ, ama inasáchin yonquicosohuëꞌ. Maꞌsha paꞌanacasontaꞌ yaꞌhuëtopirinquëmahuëꞌ, ama inasáchin yonquicosohuëꞌ. 31Yaꞌipi maꞌsha isoroꞌpaquë yaꞌhuërinsopita aꞌna tahuëri taꞌhuantarin. Napoaton maꞌsha yaꞌhuëtopirinquëmahuëꞌ, ama inapita naꞌcon naꞌcon yonquicosohuëꞌ.

32Nani maꞌsha yonquihuatëra, sacaiꞌ Yosë marëꞌ sacatacasoꞌ. Co nohuantërahuëꞌ canpitasoꞌ nisha nisha yonquiatomaꞌ, napion cancantamasoꞌ. Quëmapi co saꞌin yaꞌhuëtohuachinhuëꞌ, co nani maꞌsha yonquicasoꞌ yaꞌhuërinhuëꞌ. Nanitërin Sinioroáchin yonquicasoꞌ. 33Saꞌahuanoꞌsaso nipirinhuëꞌ nani maꞌsha yonquicaisoꞌ yaꞌhuërin. Saꞌinaꞌ noya yaꞌhuëcaiso marëꞌ naꞌcon yonquiapi. 34Co nanitopihuëꞌ Yosëáchin yonquicaisoꞌ. Inapochachin sanapiꞌsantaꞌ co soꞌyahuachinahuëꞌ, nanitopi yaꞌipi cancanëna quëran Yosëíchin yonquicaisoꞌ. Inasáchin yonquihuachinaꞌ, naꞌcon Yosë marëꞌ sacatapi. Soꞌyahuanoꞌsaso nipirinhuëꞌ, naꞌcon maꞌsha yonquicaisoꞌ yaꞌhuërin. Soꞌinaꞌ, huaꞌhuinpita, inapita noya nocomacaisoꞌ yaꞌhuërin.

35Ina pochin aꞌchintëranquëmaꞌ yonquicamaso marëꞌ. Co casoꞌ camairanquëmahuëꞌ. Noya yonquicoꞌ Yosë nohuantërinsoꞌ ayonquiꞌinquëmaꞌ. Noyasáchin nicacasoꞌ yaꞌhuërin. Yosë naꞌcon naꞌcon yonquiatomaꞌ, ina marëꞌ sacatocoꞌ.

36Huiꞌnamaꞌ nani nanontohuachin, quëmapiri nohuantohuachin, ama apiratocosohuëꞌ. Noya macacasoꞌ nipachinaꞌ, “Maquëꞌ,” itocoꞌ. Noya soꞌyain. Co ina marëꞌ oshahuaninhuëꞌ. 37Nipirinhuëꞌ, co quëtacasoꞌ nohuantohuatamahuëꞌ, noya inantaꞌ. Huiꞌnaontaꞌ co yasoꞌyahuachinhuëꞌ, quëma pëinënquë chachin yaꞌhuëꞌin. Yasoꞌyahuachin, acoantocoꞌ. 38Nanon asoꞌyacasoꞌ noya. Coꞌsoꞌ nohuantohuachinahuëꞌ, inantaꞌ noya. Co soꞌyahuachinhuëꞌ, noya noya, topirahuëꞌ.

39Sanapi soꞌyahuachin, soꞌin chinpitacasoꞌ yaꞌhuërin. Napoaponahuëꞌ, soꞌini ayananpihuachin, yasoꞌyantahuachin, noya soꞌyantaꞌin. Yosë imanaꞌpi soꞌyachin. 40Co huachi soꞌyantahuachinhuëꞌ, noya inantaꞌ. Noya noya cancantarin, topirahuëꞌ. Ispirito Santo catahuarinco noꞌtëquën pënëntaꞌhuasoꞌ tënahuë.

Currently Selected:

1 Corintios 7: cbt

Highlight

Copy

Compare