1 Corintios 5

Quisocristo imaponahuëꞌ, oshahuaninsoꞌ

1Aꞌnaquënsoꞌ co noyahuëꞌ nicaton, monshihuanin, topi natantërahuë. Inasoꞌ paꞌpin saꞌin monshitërin. Inapoaton, paꞌpi co noyahuëꞌ ninin. Co imapisopitahuë tërantaꞌ co onporontaꞌ ina pochin nipihuëꞌ. 2Canpitantaꞌ nitotapomarahuëꞌ, co ina marëꞌ tapanamahuëꞌ. Ina oshanën yonquiatomaꞌ sëtacamaso nipirinhuëꞌ, iporahuantaꞌ “Quiyasoꞌ nóya imarai,” toconamaꞌ. Nani ocoicaso nipirinhuëꞌ, co ocoiramahuëꞌ. 3Co canpitataquë yaꞌhuaporahuëꞌ, canpitataquë yaꞌhuëarahuëso pochin cancantato, yonquiranquëmaꞌ. Ina quëmapi noꞌtëquën anaꞌintacasoꞌ yaꞌhuërin, tënahuë. 4-5Quisocristo imaramaꞌ niꞌton, niyontoncoꞌ. Niyontonpatamaꞌ, ca pochin cancantatomaꞌ, ina quëmapi chiníquën pënëncoꞌ. “Sinioro Quisoso nanan quëtërincoi niꞌton, ama huachi Tata Yosë aꞌpainquënsohuëꞌ, tënai. Sopai natëran niꞌton, parisitamasoꞌ yaꞌhuërin,” itocoꞌ. Inapotohuatamaꞌ, aꞌna tahuëri yonquiapon nimara. “Co noyahuëꞌ yonquirahuësoꞌ naniantato, Yosë imantaꞌi,” tapon nimara. Napohuachin, Sinioro Quisoso oꞌmantahuachin, nichaꞌësarin huachi.

6Iporaso nipirinhuëꞌ “Nóya imarai,” topiramahuëꞌ, co yaꞌipinquëmaꞌ noya ninamahuëꞌ. Co noꞌtëquën yonquiramahuëꞌ. Niꞌcoꞌ. “Pan nipatëra, piꞌpian ahuëpocatërinsoꞌ acohuachina, yaꞌipi sëꞌcotërin,” topi. Nani ina nitotëramaꞌ. Inapochachin aꞌnayanquëma tërantaꞌ co noyahuëꞌ yonquihuatamaꞌ, yaꞌipinquëmaꞌ nitapicancanaramaꞌ. 7Iráca Pascoa cosharoꞌ caꞌpachinara, co piꞌpian tërantaꞌ ahuëpocatërinsoꞌ nohuantopihuëꞌ. Yaꞌipiya tëꞌyatopi. Pascoaquë carniroaꞌhua tëpapiso pochin Quisocristo nani chiminin canpoa marëꞌ. Ina imaramaꞌ niꞌton, nasha cancan quëtërinquëmaꞌ. 8Pascoa pita naꞌhuasoiꞌ, yaꞌipi ahuëpocatërinsoꞌ tëꞌyatopi. Inapochachin canpoantaꞌ yaꞌipi co noyahuëꞌ yonquirëhuasopita aꞌpoatëhuaꞌ, noyasáchin niahuaꞌ. Ama huachi co noyahuëꞌ niahuasohuëꞌ. Noyápiachin cancantatëhuaꞌ, noꞌtëquënáchin yonquiaꞌahuaꞌ.

9Iꞌhuantaꞌ nani ninshitëranquëmaꞌ. “Ama monshihuaninsopitarëꞌquëmaꞌ nipayacosohuëꞌ. Ama inapita noya niꞌcosohuëꞌ,” itëranquëmaꞌ. 10Naꞌa piyapiꞌsaꞌ co Yosë imatonahuëꞌ, monshihuanpi, apirapi, ihuatopi, mamanshi moshapi, inapopi. Huaꞌhuayatërahuëꞌ piyapi ina pochin nipi niꞌton, inapitasoꞌ nontacasoꞌ yaꞌhuërin. Co nontërëhuahuëꞌ naporini, co nanichitërihuahuëꞌ isoroꞌpaquë yaꞌhuëcasoꞌ. 11Aꞌnaquënso nipirinhuëꞌ. “Cantaꞌ imarahuë,” taponahuëꞌ, monshihuanárin. Aꞌnantaꞌ apirarin. Aꞌnaquëontaꞌ ipora huantaꞌ mamanshi moshararin. Aꞌnapitantaꞌ pinotapi, noꞌpirapi, ihuatapi, naporapi. Napoaponaraihuëꞌ: “Quiyantaꞌ imarai,” topi. Ama inapitarëꞌquëmaꞌ nipayacosohuëꞌ. Yosë nonpintapi niꞌton, ama inapitarëꞌquëmaꞌ coshatocosohuëꞌ. 12-13Co Yosë imapisopitasohuëꞌ co canpoari anaꞌintacasoꞌ yaꞌhuërinhuëꞌ. Tananpitahuaꞌ Yosëri anaꞌinchin. Imarëhua capiniso nipirinhuëꞌ nipënëahuanꞌ noya yonquicaso marëꞌ. Co noyahuëꞌ ninaꞌpi, niyontonama quëran ocoicoꞌ, tënahuë.

Currently Selected:

1 Corintios 5: cbt

Highlight

Copy

Compare