1 Corintios 4

Yosë marëꞌ sacatëraisoꞌ

1Huaꞌquiꞌ piyapiꞌsaꞌ co Yosë nanamën nitotopihuëꞌ niꞌton, Yosë aꞌparincoi nanamën aꞌchinaꞌhuaiso marëꞌ. Quisocristo inpriatonën pochin ninai. Ina yonquicoꞌ. 2Inpriatonpoꞌ nipatëra, huaꞌanënpoꞌ noꞌtëquën natëcasoꞌ yaꞌhuërin. Inapochachin Yosë huaꞌanëntërincoi niꞌton, inasáchin natëcasoꞌ yaꞌhuërin. 3Napoaton shaꞌhuirapihuatamaco, co ina yonquirahuëꞌ. Piyapi yonquirincosoꞌ co yonquirahuëꞌ. Co caora tërantaꞌ nishaꞌhuirapicaꞌhuasoꞌ yonquirahuëꞌ. 4Noya mini natërahuë, topirahuëꞌ, co casoꞌ Yosë pochin nitotërahuëꞌ. “Noyaco,” tënahuëso marëꞌ co Yosë noya niꞌsarincohuëꞌ. Inaíchin yaꞌipi nitotaton, noꞌtëquën shaꞌhuitarinpoaꞌ. 5Napoaton iporasoꞌ ama nishaꞌhuirapiahuasohuëꞌ. Aꞌna tahuëri Sinioro oꞌmantahuachin, yaꞌipi piyapinpoaꞌ tëniarinpoaꞌ. Yaꞌipi ninëhuasopita anitotarinpoaꞌ. Poꞌoana quëran ninëhuasopitantaꞌ aꞌninquëchin shaꞌhuitarinpoaꞌ. Yonquirëhuasopitantaꞌ nitotërin. Maꞌmarësona tërantaꞌ naporëhuasoꞌ anitotarinpoaꞌ. Naporoꞌ yaꞌipinpoaꞌ noꞌtëquën nontarinpoaꞌ. Noya nipatëhuaꞌ, noya niꞌsarinpoaꞌ.

6Aꞌchintohuatëinquëmara iyaroꞌsaꞌ, Yosëíchin yonquirai. Aporosërëꞌcoi aꞌchintërainquëmasoꞌ ninshitëranquëmaꞌ canpitantaꞌ quiya pochin yonquicamaso marëꞌ. Yosë quiricanënáchin natëcasoꞌ yaꞌhuërin. Aꞌna quëmapi noya noya aꞌchintohuachinquëmaꞌ, ama inasáchin paꞌyatocosohuëꞌ. 7Yosë nohuanton, nisha nisha nitotërëhuaꞌ. Co canpoara nohuanton, nitotërëhuahuëꞌ. Yosëíchin catahuarinpoaꞌ noya noya nicacasoꞌ. Co catahuarinpoahuëꞌ naporini, co mantaꞌ nitochitërihuahuëꞌ. Napoaton co nocantacasoꞌ yaꞌhuërinhuëꞌ.

8Canpitasoꞌ naporamaꞌ: “Nani yaꞌipi nitotërai. Co mantaꞌ pahuantërincoihuëꞌ noya cancantaꞌhuaiso marëꞌ. Quiyaora noya nitotatoi, huaꞌan pochin chiníquën nanantërai,” topiramahuëꞌ. ¡Tëhuënchachin chiníquën nanantëramaꞌ naporini, quiyantaꞌ isoroꞌpaquë chachin chiníquën nananchitoihuëꞌ! 9Co ina tahuëri naniyatërarinhuëꞌ. Yosë nohuanton, co piyapiꞌsaꞌ noya niꞌninacoihuëꞌ. Nanamën aꞌchinaꞌhuaiso marëꞌ aꞌpapirincoihuëꞌ, naꞌa piyapiꞌsaꞌ co nohuantopihuëꞌ. Apiroꞌsa pochin niꞌninacoi. Chimirin quihuitërinacoi. Aꞌninquëchin aparisitërinacoi niꞌton, anquëniroꞌsantaꞌ nicatonaꞌ, paꞌyanpi. 10Quisocristo natëtoi, nanamën aꞌchinarai. Ina marëꞌ quiyasoꞌ tëhuarinacoi. Canpitaso nipirinhuëꞌ noya nitotonaꞌpiroꞌsa pochin nicatënënquëmaꞌ, co tëhuarinënquëmahuëꞌ. Quiyasoꞌ co chiníquën nanantëraihuëꞌ. Canpitaso nipirinhuëꞌ chiníquën nanantëramaꞌ. Piyapiꞌsaꞌ noya niꞌpirinënquëmahuëꞌ, quiyasoꞌ co noyahuëꞌ niꞌninacoi. 11Iporahuantaꞌ parisitarai. Aꞌna tahuëri tana natanai. Yamororai. Aꞌmocaꞌhuaisontaꞌ pahuantërincoi. Ahuërinacoi. Paꞌsápatoi, co huachi yaꞌhuëmiatëraihuëꞌ. 12Chiníquën sacatatoi, canotërai. Noꞌhuipirinacoihuëntaꞌ, noya nontërai. Aparisitohuachinacoirantaꞌ, co noꞌhuiraihuëꞌ. Ahuantërai. 13Pinopachinacoirantaꞌ, sanoanan quëran nontërai. “Nanan anoyachi,” taꞌtoi, noya nontërai. Noꞌhuitonacoi, iporahuantaꞌ co quëꞌyarinacoihuëꞌ. Amoro pochin niꞌninacoi.

14Co noꞌhuiranquëmahuëꞌ. Nosororanquëmaꞌ. Co nohuantërahuëꞌ atapanaꞌhuanquëmasoꞌ. Pënënaꞌhuanquëmaso marëꞌ ninshitaranquëmaꞌ. Huiꞌnahuëpita pochin nicatënquëmaꞌ, napotaranquëmaꞌ noya yonquicamaso marëꞌ. 15Notohuaroꞌ piyapiꞌsaꞌ Quisocristo nanamën aꞌchintopirinënquëmahuëꞌ, carimaꞌton pënënanquëmaꞌ niꞌton, imaramaꞌ. Quisocristo nanamën shaꞌhuitohuatënquëmara, natëramaꞌ. Napoaton tataparima pochin niꞌco. 16Ina pochin cancantatomaco, nonanco, tënahuë.

17Ina marëꞌ Timotio aꞌpatëranquëmaꞌ. Inasoꞌ noya niꞌnahuë. Aꞌchintohuatëra, Quisocristo imarin niꞌton, huiꞌnahuë pochin niꞌnahuë. Nóya Sinioro imarin. Yaꞌipi naporahuësoꞌ ayonquiarinquëmaꞌ noya noya imacamaso marëꞌ. Insëquësona paꞌpatëra, Quisocristo nanamënsáchin aꞌchinahuë. Imapisopita niyontonpachinara, aꞌchintërahuë. 18Aꞌnaquëmaso nipirinhuëꞌ nocanatomaco, “Quiyasoꞌ Paono quëran naꞌcon naꞌcon nitotërai. Napoaton co huachi yahuëꞌninhuëꞌ,” topiramahuëꞌ. 19Tëhuënchachin nicaponquëmaꞌ yapaꞌsarahuë. Yosë nohuanton, co huaꞌquiya quëranhuëꞌ paꞌsarahuë. Naporoꞌ nocaninacosopita niꞌsarahuë. Naꞌcon nonpirinahuëꞌ, co nimara nanitapapihuëꞌ Yosë marëꞌ noya sacatacaisoꞌ. 20Co topinan quëran nonacasoꞌ yaꞌhuërinhuëꞌ. Yosë huaꞌanëntohuachinpoaꞌ, piyapiꞌsaꞌ catahuarëhuaꞌ noya noya imacaisoꞌ. 21Nosororanquëmaꞌ niꞌton, sanoanan quëran yapënënpiranquëmahuëꞌ. Co Yosë natëhuatamahuëꞌ, paꞌpato anaꞌintaꞌhuanquëmasoꞌ yaꞌhuërin. Canconpato, ¿maꞌcha onpochinquëma nicaya? tënahuë.

Currently Selected:

1 Corintios 4: cbt

Highlight

Copy

Compare