1 Corintios 2

Quisocristo nanamën shaꞌhuirinsoꞌ

1Canpitataquë paꞌpatëra, Yosë nanamën aꞌchintëranquëmaꞌ. Co iyaroꞌsaꞌ míso nonaꞌpi pochin nontëranquëmahuëꞌ. Co naꞌcon naꞌcon nitotërinso pochin aꞌchintëranquëmahuëꞌ. 2Coꞌhuara paꞌshatërapohuëꞌ, yonquirahuë. “Quisocristo naporinsoáchin aꞌchinarahuë. Corosëquë oshanënpoa marëꞌ chimininsoꞌ aꞌchinchi,” taꞌto, inaíchin shaꞌhuitëranquëmaꞌ. Inasáchin imacamaso marëꞌ. 3Canpitataquë yaꞌhuasoco, co chiníquën cancantërahuëꞌ. “Co caora nanitërahuëꞌ noya aꞌchinaꞌhuasoꞌ,” taꞌto, naporahuëꞌ. 4Co naꞌcon nitotonaꞌpi pochin nontëranquëmahuëꞌ. Ispirito Santo chachin catahuarinco nanamën nóya aꞌchinaꞌhuaso marëꞌ. Inasoꞌ yaꞌipi nanitaparin. Natanpatamaꞌ, “Yosë nanamën chachin aꞌchintërinpoaꞌ,” taꞌtomaꞌ, natëramaꞌ. 5Napoaton co piyapi yonquirinsoꞌ imaramahuëꞌ. “Yosëíchin yaꞌipi nanitaparin,” taꞌtomaꞌ, natëramaꞌ.

Yosë anitotërinpoasoꞌ

6Napoaponahuëꞌ, chinoton pochin cancantopisopita aꞌchintohuatoi, yaꞌipi Yosë yonquirinpoasoꞌ aꞌchintërai. Co piyapiꞌsaꞌ yonquipisoꞌ aꞌchinaihuëꞌ. Co huaꞌanoꞌsaꞌ yonquipiso tëranta aꞌchinaihuëꞌ. Inapitasoꞌ inahuara yonquipisoáchin yonquiatonaꞌ, co Yosë pochin yonquipihuëꞌ niꞌton, taꞌhuantapi. 7Co inapita pochin aꞌchinaihuëꞌ. Yosë yonquirinso chachin aꞌchinai. Iráca coꞌhuara isoroꞌpaꞌ yaꞌhuëyátërasohuëꞌ, Yosë ninotonpoaꞌ, yonquirinpoaꞌ anoyacancantinpoaso marëꞌ. Anoyacancantohuachinpoaꞌ, inarëꞌquënpoaꞌ yaꞌhuëmiatarihuaꞌ. Iráca co insontaꞌ nitotopirinahuëꞌ, iporaso huachi Yosë anitotërinpoaꞌ niꞌton, aꞌchintërainquëmaꞌ. 8Huaꞌanoꞌsasoꞌ co nitotopihuëꞌ. Nitotopi naporini, co Quisocristo tëpaꞌitonahuëꞌ. Inasoꞌ Yosë chachin. Noya noya nipirinhuëꞌ, tëpapi. 9Napoaponahuëꞌ, Yosë quiricanënquë naporin:

“Yosë nosorohuatëhuaꞌ, noya noya catahuarinpoaꞌ. Noya nininsopita nani tapatërinpoaꞌ.

Co inso tërantaꞌ ina pochin niꞌchininhuëꞌ. Co incari tërantaꞌ nataninhuëꞌ.

Yosë noya yonquirinpoasoꞌ, co insontaꞌ inaora nitotërinhuëꞌ,” tënin quiricanënquë.

10Imarëhuasopitaso nipirinhuëꞌ, nitotërëhuaꞌ. Yosë nohuanton, Ispirito Santo anitotërinpoaꞌ. Yaꞌipi Yosë yonquirinsopita Ispirito Santo nitotërin.

11Co insontaꞌ piyapi yonquirinsoꞌ nitotërinhuëꞌ. Ispiritonën tëhuënchinso nitotërin. Inapochachin Ispirito Santontaꞌ, Yosë ispiritonën niꞌton, yonquirinso chachin nitotërin. 12Imarëhuasopitasoꞌ co piyapi yonquipisoꞌ imarëhuahuëꞌ. Yosë nohuanton, Ispirito Santo yaꞌcoancantërinpoaꞌ. Aꞌchintinpoaso marëꞌ aꞌpatimarinpoaꞌ. Yaꞌcoancantohuachinpoara, Yosë yonquirinpoasoꞌ anitotërinpoaꞌ. 13Quiyantaꞌ ina nitotatoi, aꞌnapita aꞌchintarai. Co quiyaora yonquinëhuëi quëran aꞌchinaihuëꞌ. Ispirito Santo ayonquirincoi noya aꞌchinaꞌhuaiso marëꞌ. Chinoton pochin cancantopisopita aꞌchintohuatoira, maꞌsona tapon naporinsopita aꞌchintarai.

14Aꞌnaquënso nipirinhuëꞌ piyapi yonquirinsoráchin nitotatonaꞌ, co nohuantopihuëꞌ Yosë nanamën natanacaisoꞌ niꞌton, tëhuaconpi. Ispirito Santoráchin catahuarinpoaꞌ natëtacasoꞌ. Napoaton co imarinsopitasohuëꞌ natanaponaraihuëꞌ, co nanitopihuëꞌ noꞌtëquën yonquicaisoꞌ. 15Ispirito Santo catahuahuachinpoaꞌ, noꞌtëquën yonquiarihuaꞌ. Aꞌnapitasoꞌ co canpoa pochin yonquipihuëꞌ. Co nitotatonaraihuëꞌ: “¿Onpoatomataꞌ ina pochin yonquiramaꞌ?” itërinënpoaꞌ. 16Quiricanënquë naporin: “¡Co insontaꞌ Yosë yonquirinsoꞌ nitotërinhuëꞌ! ¡Co incari tërantaꞌ nanitërinhuëꞌ ina aꞌchintacasoꞌ!” tënin. Canpoaso nipirinhuëꞌ Quisocristo imapatëhuaꞌ, yonquirinso chachin ayonquiarinpoa huachi.

Currently Selected:

1 Corintios 2: cbt

Highlight

Copy

Compare