1 Corintios 10

Ama mamanshi moshacaiso marëhuëꞌ pënëninsoꞌ

1Iráca napopisopita iyaroꞌsaꞌ, yonquicoꞌ. Iráca cotio mashocoroꞌsaꞌ Iquipito quëran pipirahuatonaꞌ, Moisësë imapi. Yosë nohuanton, chitoroꞌ yaꞌnorin imacaiso marëꞌ. Naporahuatonaꞌ, Quëhuaiꞌ marë pëntonahuatonaꞌ, yaꞌipiya chaꞌëpi. 2Marë quëran chaꞌërahuatonaꞌ, Moisësë imapi. Chitorontaꞌ quëchitërarin. (Inapochachin iporasoꞌ Quisocristo natërëhuaꞌ niꞌton, aporihuanatëhuaꞌ, imarëhuaꞌ.) 3Iráca inotëro parti paꞌpachinara, Yosë nohuanton, nani tahuëri noꞌpaquë cosharoꞌ yaꞌnohuachina, yaꞌipiya coshatopi. 4Inaquësoꞌ co iꞌsha yaꞌhuëpirinhuëꞌ, Yosë nohuanton, naꞌpi quëran pipirin, yaꞌipiya oꞌopi. Quisocristosoꞌ ina naꞌpi pochin ninin. Paꞌpachinara, co quënanpirinahuëꞌ, inari naꞌcon catahuarin chaꞌëcaiso marëꞌ. 5Inapotopirinhuëꞌ, cotioroꞌsasoꞌ co noyahuëꞌ cancantopi. Naꞌcon naꞌcon co natëpihuëꞌ niꞌton, Yosëri co noyahuëꞌ nicaton, anaꞌintërin. Ina nohuanton, inaquë chachin chiminpi.

6Pënëinpoaso marëꞌ iráca ina ninshitërin. Inapitasoꞌ co noyahuëꞌ yonquipi. Nani maꞌsha noyapatopi. Ama inapita nonahuansohuëꞌ. 7Inapitasoꞌ mamanshi moshapi. “Moshatacaiso marëꞌ pita nipi. Huënsërahuatonaꞌ, coshatopi, oꞌopi. Ina quëran nansarahuatonaꞌ, capa cancantopi,” tënin Yosë quiricanënquë. Canpitaso nipirinhuëꞌ ama inapita pochin nicosohuëꞌ. 8Ina quëran aꞌnapita monshihuanpi. Ina marëꞌ Yosëri anaꞌintërin. Ina nohuanton, cato shonca cara huaranca piyapiꞌsaꞌ chiminpi. Aꞌna tahuëriíchin nipirinhuëꞌ, inanapo chiminpi. Ina yonquiatomaꞌ, ama mantaꞌ monshihuanacamasoꞌ yonquicosohuëꞌ. 9Naporahuatonaꞌ Sinioronta tënipi: “Co nimara anaꞌintarinpoahuëꞌ,” taꞌtonaꞌ, co noyahuëꞌ nipi. Ina marëꞌ yaꞌhuanatonaꞌ, naꞌa chiminpi. 10Ama Yosë noꞌhuitëhuaꞌ tarëtahuasohuëꞌ. “Co Yosë noya catahuarinpoahuëꞌ,” topi aꞌnaquën. Napoaton Yosëri anquëni aꞌpaimarin inapita tëpacaso marëꞌ.

11Yosë nohuanton, iráca napopisopita quiricanënquë ninshitopi pënëinpoaso marëꞌ. Inapita pochin nipatëhuaꞌ, anaꞌintarinpoaꞌ canpoantaꞌ. Nani anaꞌintacasoꞌ tahuëri naniriarin. 12Aꞌnaya aꞌnayanquëmaꞌ niꞌcona oshahuantamaꞌ. “Casoꞌ noya piyapico. Co onporontaꞌ Yosë aꞌpoarahuëꞌ,” ama tocosohuëꞌ. 13Sopai yaꞌipi piyapinpoaꞌ shaꞌhuitërinpoaꞌ co noyahuëꞌ nicacaso marëꞌ. Yosëso nipirinhuëꞌ catahuarinpoaꞌ. Aꞌnaya aꞌnayanpoaꞌ co nanitërëhuasohuëꞌ nitotaton, niꞌsarinpoaꞌ. “Tananpitëquëꞌ,” itohuachina, co sopai nanitërinhuëꞌ aquëtëꞌ tëniinpoasoꞌ. Cancanënpoa quëran huarëꞌ Yosë natëhuatëhuaꞌ, co sopai minsëarinpoahuëꞌ. Maꞌsha onpopirëhuahuëntaꞌ, Yosë ananitarinpoaꞌ ahuantacasoꞌ. Yosë chachin catahuarinpoaꞌ sopai minsëcaso marëꞌ.

14Napoaton iyaroꞌsaꞌ ama piꞌpisha tërantaꞌ mamanshi moshacosohuëꞌ. Nosororanquëmaꞌ niꞌton, pënënaranquëmaꞌ. 15Canpitasoꞌ nitoyonquiramaꞌ. Shaꞌhuitëranquëmasoꞌ yonquicoꞌ noꞌtëquën nitotacamaso marëꞌ. 16Niyontonpatëhuara, Quisocristo chimininsoꞌ yonquirëhuaꞌ. “Quiya marëꞌ Sinioro huënainën paꞌnin niꞌton, ‘Yosparinquën’ tënai,” itatëhuaꞌ, huënainën pochin nininsoꞌ oꞌorëhuaꞌ. Cancanënpoa quëran huarëꞌ yonquiatëhuaꞌ, oꞌopatëhuaꞌ, huënainën napopináchin yonquirëhuaꞌ. Ina quëran cosharoꞌ ina nonën pochin nininsoꞌ sëꞌpanahuatëhuaꞌ, caꞌnëhuaꞌ. “Tëhuënchachin canpoa marëꞌ Quisocristo nonën ohuanpi,” taꞌtëhuaꞌ, napopináchin yonquirëhuaꞌ. 17Quisocristo yonquiatëhuaꞌ, ina cosharoꞌ caꞌnëhuaꞌ. Naꞌaquënpoaꞌ nirihuarahuëꞌ, Quisocristo imarëhuaꞌ niꞌton, aꞌna huëntona pochin ninëhuaꞌ. Napopináchin yonquirëhuaꞌ.

18Israiroꞌsaꞌ napopisontaꞌ yonquicoꞌ. Maꞌsha Yosë chinotacaso marëꞌ tëparahuatonaꞌ, ahuiquitopi. Piꞌpian nosha acopisoꞌ caꞌpi. Yosë yonquiatonaꞌ, coshatopi. Inapoatonaꞌ, Yosë chinotopi. 19Mamanshisoꞌ co nanpirinhuëꞌ. Co chinotacasohuëꞌ nipirinhuëꞌ, aꞌnaquëni moshapi. Maꞌsha inapita chinotacaso marëꞌ tëpahuachinara, topinan quëran napopirinahuëꞌ, co mamanshiri niꞌninhuëꞌ, co nataninhuëꞌ. 20Nisha piyapiꞌsaso nipirinhuëꞌ mamanshi moshacaiso marëꞌ maꞌsha tëpahuachinara, co Yosë yonquipihuëꞌ. Sopairoꞌsaꞌ yonquipi. Co casoꞌ nohuantërahuëꞌ canpitantaꞌ sopairoꞌsaꞌ yonquicamasoꞌ. 21Aꞌnaquën mamanshi moshacaiso marëꞌ pita nipi. Sopairoꞌsaꞌ yonquiatonaꞌ, napopi. Sinioro yonquihuatamaꞌ, co sopairoꞌsaꞌ yonquicamasoꞌ yaꞌhuërinhuëꞌ. Napoaton amatohuachinënquëmaꞌ, ama pacosohuëꞌ. Quisocristo chimininsoꞌ yonquiatomaꞌ, coshatëramaꞌ, oꞌoramaꞌ. Napoaton ama sopairoꞌsaꞌ yonquiatomaꞌ, coshatocosohuëꞌ, oꞌocosohuëꞌ.

22Sopairoꞌsaꞌ yonquihuatamaꞌ, Yosë aꞌpitatënquëmaꞌ, noꞌhuiarinquëmaꞌ. ¿Ina nohuantëramaꞌ ti? ¡Inasoꞌ chini chiníquën nanantërin! Canpoasoꞌ co ina pochin chiníquën nanantërëhuahuëꞌ.

Aꞌnapita nosorocasoꞌ yaꞌhuërinsoꞌ

23“Maꞌsona tërantaꞌ yanipatëhuaꞌ, noya nicacasoꞌ,” topi. Napoaponahuëꞌ, co yaꞌipi ninëhuasopita catahuarinpoahuëꞌ noya cancantacasoꞌ. Tëhuënchachin yaꞌipi noya nicacaso nipirinhuëꞌ, co yaꞌipi catahuarinpoahuëꞌ aꞌnapita achinicancanacasoꞌ. 24Napoaton aꞌnapitantaꞌ noya noya imacaiso marëꞌ catahuacoꞌ. Canpitaora costaramasoꞌ ama aquëtëꞌ yonquicosohuëꞌ. Aꞌnapita naꞌcon naꞌcon yonquicoꞌ.

25Nosha mircatoquë yaꞌhuëhuachin, paꞌanatomaꞌ, caꞌcoꞌ. Ama mantaꞌ natantapomarahuëꞌ, caꞌcoꞌ. “¿Mamanshi chinotopiso pëiquë maꞌpatëran?” ama itocosohuëꞌ. Ama nisha nisha yonquiapomarahuëꞌ, caꞌcoꞌ. 26Tata Yosëri yaꞌipiroꞌpaꞌ ninin. Yaꞌipi maꞌsharoꞌsantaꞌ noya ninin.

27Aꞌna tahuëri coshatapataramaꞌ. Co imarinsohuëꞌ amatohuachinquëmaꞌ, nohuantohuatamaꞌ pacoꞌ. Nosha acotohuachinënquëmaꞌ, “Mamanshi marëꞌ acopisoꞌ nimara,” ama tapomarahuëꞌ, caꞌcoꞌ. 28Nipirinhuëꞌ, aꞌna piyapi shaꞌhuitohuachinquëmaꞌ, “Iso nosha mamanshi chinotacaso marëꞌ acopisoꞌ,” itohuachinquëmaꞌ, ama caꞌcosohuëꞌ. Shaꞌhuitërinquëmasoꞌ nosoroatomaꞌ, ama caꞌcosohuëꞌ. 29Caꞌpatamaꞌ, co ina marëꞌ oshahuanaramahuëꞌ. Aꞌnaquënso nipirinhuëꞌ niꞌpachinënquëmaꞌ, nisha nisha yonquiamara. Ina nosoroatomaꞌ, ama caꞌcosohuëꞌ.

Aꞌnaquëmaso nipirinhuëꞌ, itaramaco: “¿Maꞌmarëtaꞌ aꞌnapita yonquiato cosharoꞌ aꞌpocaꞌhuasoꞌ yaꞌhuërin? 30‘Yosparinquën Sinioro,’ itahuato, noya casoꞌ caꞌnahuë. ¿Onpoatontaꞌ ina marëꞌ co noyahuëꞌ niꞌninaco?” topiramahuëꞌ. 31Maꞌsona tërantaꞌ nipatamaꞌ, Yosë yonquiatomaꞌ, noya nicoꞌ aꞌnapitantaꞌ Yosë noya yonquicaiso marëꞌ. Napoaton coshatohuatamaꞌ, oꞌopatamaꞌ, maꞌsona tërantaꞌ nipatamaꞌ, ina yonquicoꞌ. 32Ama insontaꞌ anishacancantocosohuëꞌ. Cotioroꞌsaꞌ, nisha piyapiꞌsaꞌ, Quisocristo imapisopita, yaꞌipiya nosorocasoꞌ yaꞌhuërin. 33Casoꞌ yaꞌipi piyapiꞌsaꞌ yonquirahuë. Catahuarahuë noya Yosë imacaiso marëꞌ. Co caora costarahuësoꞌ yonquirahuëꞌ. Aꞌnapitantaꞌ yacatahuarahuë inahuantaꞌ Quisocristori anoyacancantacaso marëꞌ.

Currently Selected:

1 Corintios 10: cbt

Highlight

Copy

Compare