Mk 1
1
I. LI JESUS KIXKAWRESI RIB' CHI K'ANJELAK (1,1-13)
Li xk'anjel laj Jwan aj kub'sihomha'
(Mt 3,1-12; Lk 3,1-9, 15-17; Jn 1,19-28)
1Xtiklajik li xChaab'il Esil li Jesus, li Kriist,#1,1 Chirix li xyaalalil li aatin Kriist: cf. Mt 1,17. Ralal li Yos.
2Tz'iib'anb'il sa' xhu li propeet Isaías:
“K'e reetal, tintaqla lintaql chawu
li taatuqub'anq re laab'e.#1,2 Mal 3,1.
3Xyaab' xkux li japjo re sa' li chaqich'och':
«Tuqub'omaq li xb'e li Qaawa',
tiikob'resihomaq li ruq' b'e chiru»”.#1,3 Is 40,3.
4Ut jo'ka'in kik'ulmank: kox'okaq laj Jwan aj kub'sihom ha' sa' li chaqich'och', yo chi xyeeb'al reheb' chixjunil naq tento te'xyot' xch'ool te'xjal xk'a'uxl ut te'kub'siiq xha' re naq li Yos tixkuy tixsach li xmaakeb'. 5Chixjunileb' laj Judea jo'wi' chixjunileb' laj Jerusalén neke'wulak rik'in laj Jwan; neke'xxooto li xmaakeb' ut a'an naxkub'siheb' xha' sa' li nima' Jordán.
6Laj Jwan naraq'un rix li kameey, jun tz'uum-k'aam naxb'ak' wi' li xsa'; aj saak' naxtzeka rik'in xya'al saqk'aw. A'an a'in li esil naxpuktesi: 7“Chalk re chiwix li q'axal nim xwankil chiwu, ut laa'in moko ink'ulub' ta xk'utzub'ankil wib' chi xhitb'al xk'aamal li xxaab'. 8Laa'in xinkub'si eeha' yal rik'in ha', a'ut a'an tixkub'si eeha' rik'in Santil Musiq'ej”.
Xkub'ik xha' li Jesus
(Mt 3,13-17; Lk 3,21-22)
9Sa'eb' li kutan a'an kichalk chaq li Jesus toj Nazaret, sa' xteepal Galilea, ut kikub'siik xha' xb'aan laj Jwan sa' li nima' Jordán. 10Naq yo chi elk li Jesus sa' li ha', kiril li choxa yo chi tehonk ut li Musiq'ej kama' junaq mukuy yo chaq chi kub'eek sa' xb'een. 11Ut kichalk chaq jun xyaab' kuxej sa' choxa, kixye: “Laa'at li walal raarookat inb'aan; aawik'in nasaho'k inch'ool”.
Li raalenkil li Jesus sa' li chaqich'och'
(Mt 4,1-11; Lk 4,1-13)
12Tikto li Musiq'ej kixk'am li Jesus chi kaw sa' li chaqich'och'. 13Ut chiru ka'k'aal kutan kiwank chaq sa' li chaqich'och', yo chaq raalenkil xb'aan laj tza. Wan chaq sa' xyanqeb' li josq' aj xul, ut eb' li ánjel neke'k'anjelak chiru.
II. LI XK'ANJEL LI JESUS SA' XTEEPAL GALILEA (1,14—7,23)
Xtiklajik li xk'anjel li Jesus
(Mt 4,12-22; Lk 4,14-15; 5,1-11)
14Moqon, naq ak k'eeb'il chik laj Jwan sa' tz'alam, koho li Jesus Galilea, yo chi xpuktesinkil li xChaab'il Esil li Yos: 15“Xtz'aqlok xkutankil, li xnimajwal awab'ejihom li Yos#1,15 Li Jesus kichalk chi xxaqab'ankil li xnimajwal awab'ejihom li Yos (San Mateo naxye: li xnimajwal wankilal li choxa) sa' xb'een li xtenamit li Qaawa' ut, sa' xk'ab'a' a'an, sa' xb'een chixjunil li ruuchich'och'. Tento naq li Yos taa'awab'ejinq, re naq li xk'anjel laj tza taajuk'e'q xwankil. Li Yos na'awab'ejink sa' qayanq naq na'elk li yajel, li rahob'tesiik, li neb'a'il, li maak ut eb' li kristiyan neke'xwaklesi rib' chirib'ileb' rib'. Li xnimajwal awab'ejihom li Yos natiklaak timil timil; ka'ajwi' eb' li neb'a' li xch'ooleb' neke'ok chisa'. Ab'an timil timil tento naq taaxaqab'aaq sa' xb'een chixjunil li ruuchich'och'. A'an taak'ulmanq naq taasache'q xwankil li kamk, sa' roso'jikeb' li kutan. ak nach' wank -chan-. Yot'omaq eech'ool jalomaq eek'a'uxl, ut paab'omaq li Chaab'il Esilal”.
16Naq yo chi nume'k chire li palaw re Galilea, kiril laj Simón ut laj Andrés, riitz'in laj Simón, yookeb' chi xkutb'al li xyooyeb' sa' li palaw, xb'aan naq aj kareb'. 17Li Jesus kixye reheb':
—Chineetaaqe ut tink'e naq eb' leeras eeriitz'in chik teesik' cho'q ruuchil li kar.
18Sa' junpaat ke'xkanab' li xyooyeb' ut ke'xtaaqe li Jesus.
19Kib'eek chik kach'in ut kiril laj Santiago, ralal laj Sebedeo, jo'wi' li riitz'in, a' laj Jwan: eb' a'an ajwi' wankeb' sa' li jukub', yookeb' chi xxiitinkil li xyooyeb'. 20Tikto kixb'oqeb'; ut eb' a'an ke'xkanab' laj Sebedeo li xyuwa'eb', sa' li jukub', rochb'eeneb' laj k'anjel, ut koheb' chirix li Jesus.
Li Jesus kixk'irtasi jun li winq eechaninb'il xb'aan jun li tz'ajn aj musiq'ej
(Lk 4,31-37)
21Ke'wulak Kafarnaúm. Sa' li sábado li Jesus ki'ok sa' li ch'utleb'aal kab'l ut kixtikib' xtzolb'aleb' li tenamit. 22Ut sachsookeb' xch'ool ke'kanaak li tenamit rik'in li xk'utum, xb'aan naq naxtzoleb' chi wank xwankil, ut ink'a' jo'eb' laj tz'iib'. 23Wank aran, sa' li ch'utleb'aal kab'l, jun li winq wank tz'ajn aj musiq'ej rik'in; ut a'an kixjap re chi xyeeb'al:
24—K'aru wank qe aawik'in, at Jesus aj Nazaret? Ma xatchalk chi qajuk'b'al? Ninnaw anihat laa'at: a' li xsantil Alal li Yos, chan.
25Li Jesus kixq'us chi kaw:
—Matchoqink! Elen rik'in, chan re.
26Toja' naq li tz'ajn aj musiq'ej kixchiq'le li winq, kixjap re chi kaw ut ki'elk rik'in.
27Chixjunileb' ke'kanaak chi sachsookeb' xch'ool ut neke'xpatz'i rib' chirib'ileb' rib':
—K'aru a'in? A'an jun ak' na'leb', nak'utmank rik'in wankilal! Nataqlank ajwi' sa' xb'eeneb' li tz'ajn aj musiq'ej ut napaab'aak xb'aaneb'.
28Ut chi junpaat kisutunk resil li Jesus yalaq b'ar sa' xsutam chixjunil Galilea.
Kixk'irtasi li xna' li rixaqil laj Simón ut naab'aleb' chik
(Mt 8,14-17; Lk 4,38-44)
29Naq ke'elk sa' li ch'utleb'aal kab'l, koho li Jesus rochb'een laj Santiago ut laj Jwan sa' rochoch laj Simón ut laj Andrés. 30Li xna' li rixaqil laj Simón yokyo, yo xtiq, ut tikto ke'xye resil re. 31Li Jesus kijilok chi xk'atq, kixchap chi ruq' ut kixwaklesi: ut a'an kikanab'aak xb'aan li tiq, ut ki'ok chi k'anjelak chiruheb'.
32Ewu, naq ak x'ok li saq'e, chixjunileb' li yaj ut li eechaninb'ileb' xb'aan laj tza ke'k'ame'k chaq rik'in li Jesus. 33Ch'utch'uukeb' chire li kab'l chixjunileb' li tenamit. 34Ut kixk'irtasi naab'aleb' li yaj, k'iila paay ruheb' li xyajel. Kirisi ajwi' naab'al chi maa'us aj musiq'ej;#1,34 Li Jesus naxnaw naq eb' li tenamit yookeb' chi royb'eninkil jun aj Kolonel q'axal nim xwankil sa' li ruuchich'och' a'in. Jo'kan naq, jo' naxye k'iila sut San Markos, wan naq naxram chiruheb' li maa'us jo'wi' chiruheb' li xtzolom xyeeb'al ani tz'aqal a'an; wan naq narisi rib' chi junpaat sa' xyanqeb' li tenamit chirix naq ak xb'aanu junaq sachb'ach'oolej. ut ink'a' kixkanab'eb' chi aatinak li maa'us aj musiq'ej, xb'aan naq neke'xnaw ru.
35Naq x'ok chi hik'e'k, toj q'oqyink ajwi', kiwakliik, ki'elk aran ut koho sa' jun junesal na'ajej, ut ki'ok chi tijok. 36Laj Simón ut eb' li rochb'een koheb' chi xsik'b'al 37ut, naq koxe'xtaw, ke'xye re:
—Chixjunileb' yookeb' chasik'b'al.
38Kixye li Jesus reheb':
—Yo'qeb' sa' jalan chik na'ajej, sa'eb' li tenamit ut k'aleb'aal nach'eb' arin. Aran ajwi' tento tinpuktesi li Chaab'il Esilal, xb'aan naq a'in aj e naq xulin'elq.
39Ut kixb'eeni chixjunil Galilea, yo chi xpuktesinkil li Chaab'il Esilal sa'atqeb' li xch'utleb'aal kab'l, jo' ajwi' yo chi risinkilatq li maa'us aj musiq'ej.
Li Jesus kixk'irtasi jun saqlep rix
(Mt 8,2-4; Lk 5,12-16)
40Kiwulak rik'in li Jesus jun li winq saqlep rix ut kirelaji ru; kixwiq'ib' rib' ut kixye re:
—Wi taawaj, truuq tinaak'irtasi.
41Li Jesus kixtoq'ob'a ru, kixye' li ruq', kixch'e' ut kixye re:
—Twaj, tatk'iraaq.
42Ut sa' junpaat ki'elk li saqlep chirix ut kik'iraak. 43Tikto li Jesus kixchaq'rab'i ut kixye re chi kaw:
44—Il, maa'ani aj e chaye a'in; ayu b'an, k'ut aawib' chiru laj tij ut tatmayejaq chirix laak'irajik jo' naxye li xChaq'rab' laj Moisés, re naq ch'olch'ooq chiruheb'.
45A'ut a'an, naq ki'elk, makach'in chik naq ki'ok chi xyeeb'al ut chi xpuktesinkil resil chixjunil a'in, toj reetal naq li Jesus ink'a' chik naru na'ok sa'eb' li tenamit, nakanaak b'an chi najt, sa' junesal na'ajej. Ut aran ajwi' neke'wulak rik'in, yalaq b'ar nalaje'chalk chaq.
Currently Selected:
Mk 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.