Mt 28
28
Li xwaklijik chi yo'yo li Jesus
(Mk 16,1-8; Lk 24,1-12; Jn 20,1-10)
1Naq ak xnume'k li sábado, hik'e'k re li xb'een kutan re li xamaan,#28,1 Li xb'een kutan re li xamaan a'an li domiing, xkutankil li Qaawa' (Ap 1,10) sa' xk'ab'a' li xwaklijik chi yo'yo li Jesus (cf. Hch 20,7). lix María aj Magdala ut lix María jun chik koheb' chi rilb'al li muqleb'aal. 2Tikto kiwank jun nimla hiik: jun x'ánjel li Qaawa' kikub'e chaq sa' choxa, kinach'ok wan wi' li muqleb'aal, kixtolk'osi li pek ut kik'ojlaak sa' xb'een. 3Nalemtz'unk li rilob'aal chanchan raq'kaaq, ut saq li raq' kama' li ratz'am ke. 4K'ajo'eb' xxiw laj k'aak'alenel muqleb'aal naq ke'ril a'an: neke'siksotk aj chik ut chanchan kamenaq ke'kanaak. 5Toja' naq li ánjel ki'ok chi raatinankileb' li ixq ut kixye reheb':
—Mexxiwak. Ninnaw naq yookex chi xsik'b'al li Jesus, a' li kik'ehe'k chiru krus. 6Maa'ani chik arin: xwakliik chi yo'yo kama' kixye. Kimqex, ilomaq li na'ajej b'arwi' xjilib'aak. 7Ayuqex sa' junpaat chi xyeeb'al reheb' li xtzolom: «Xwakliik chi yo'yo sa' xyanqeb' li kamenaq, ut k'amolb'e cheru toj Galilea; aran toxeeril ru». Chek'e reetal, ak xinye eere.
8Ak te'eelunq wan wi' li muqleb'aal chi yookeb' xxiw ut k'ajo' ajwi' xsahilaleb' xch'ool, koheb' sa' aanil chi xyeeb'al resil reheb' li xtzolom. 9Toja' naq li Jesus ki'elk chi xk'ulb'aleb' ut kixye: “Ma sa sa' leech'ool”. Eb' a'an ke'jilok chi xk'atq, ke'xq'alu chi roq ut ke'xloq'oni. 10Toja' naq li Jesus kixye reheb':
—Mexxiwak. Ayuqex chi xyeeb'al reheb' li wiitz'in naq xikaqeb' Galilea; aran toxe'ril wu.
Li k'aru ke'xyoob' eb' li xb'eenil aj tij
11Naq yookeb' chi xik eb' li ixq, wankeb' aj k'aak'alenel muqleb'aal koheb' sa' li tenamit chi xyeeb'al reheb' li xb'eenil aj tij chixjunil li kik'ulmank. 12Ut eb' a'in ke'xch'utub' rib' rochb'eeneb' li cheekel winq, ke'ok chi k'uub'ank ut ke'xk'e naab'al li tumin reheb' laj puub', ut ke'xye reheb':
13—Jo'ka'in teeye: «Ke'wulak chi q'eq eb' li xtzolom ut ke'relq'a li xtz'ejwal, naq yooko chi wark». 14Ut wi ta tixnaw a'an laj Pilaat, laa'o tqak'e chixpaab' ut texqakol chiru chixjunil li ch'a'ajkilal.
15Eb' a'an ke'xk'ul li tumin ut ke'xb'aanu jo' chaq'rab'inb'ileb' wi'. Ut li resil a'an kisutunk sa' xyanqeb' laj Judiiy chalen chaq toj anaqwan.
Li xnimal ru qataqlankil
(Mk 16,14-18; Lk 24,36-49; Jn 20,19-23; Hch 1,6-8)
16Eb' li xjunlaju chi tzolom koheb' Galilea sa' xb'een li tzuul li ke'taqlaak wi' xb'aan li Jesus. 17Ut naq ke'ril ru, ke'xloq'oni; ab'an wankeb' sa' xyanqeb' ink'a' ajwi' ke'xpaab'. 18Kijilok li Jesus chi xk'atqeb', kiraatinaheb' ut kixye:
—K'eeb'il we chixjunil li wankilal, jo' sa' choxa jo' ajwi' sa' ruuchich'och'. 19Ayuqex b'i', ut k'ehomaqeb' cho'q intzolom chixjunileb' li tenamit. Teekub'siheb' xha' sa' xk'ab'a' li Yuwa'b'ej, li K'ajolb'ej ut li Santil Musiq'ej, 20ut k'utumaq chiruheb' xpaab'ankil chixjunil li xexintaqla wi'. Chenawaq naq laa'in wanqin eerik'in chixjunil li kutan toj sa' roso'jik li ruuchich'och'.
Currently Selected:
Mt 28: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.