Stg 1
1
Xk'eeb'al sahil ch'oolej
1Laa'in laj Santiago, xmoos li Yos ut xmoos li Qaawa' Jesukriist, nintaqla xsahil xch'ooleb' li kab'laju teep chi tenamit xcha'cha'ihomeb' rib' yalaq b'ar.#1,1 Eb' li kab'laju teep chi tenamit naraj naxye: chixjunil li x'ak' tenamit li Yos xcha'cha'ihomeb' rib' yalaq b'ar sa' ruuchich'och' sa' xyanqeb' li maawa'eb' kristiyan.
Li xyalb'al rix li qapaab'aal
2Ex was wiitz'in, chek'ehaq cho'q xnimal xsahil eech'ool li k'iila paay chi yale'k sutsuuqex wi'. 3Laa'ex nekenaw naq li xyalb'al rix leepaab'aal nak'amok chaq li kuyuk rahilal; 4ab'anan chexkuyuq chi tz'aqal re ru, re naq tz'aqalaq eere eeru ut chaab'ilaqex, chi maak'a' majelaqex wi' sa' leepaab'aal.
5Wi wank junaq eere yo chi majelo'k xna'leb', chixtz'aamaq re li Yos, ut taak'ehe'q re, xb'aan naq li Yos nak'ehok chi anchal xch'ool ut chi chaab'il reheb' chixjunileb'. 6Ab'anan chixtz'aamaq rik'in xpaab'aal, chi ink'a' taach'inanq xch'ool, xb'aan naq li ani nawiib'ank xch'ool, a'an chanchan xkaw oq li palaw eek'asinb'il xb'aan li iq' ut nak'ame'k yalaq b'ar. 7Junaq winq jo' a'an maak'a' truuq troyb'eni rik'in li Qaawa', 8xb'aan naq nawiib'ank xch'ool ut moko ch'olch'o ta ru li xyu'am.
9Ex was wiitz'in, wi wank junaq neb'a' sa' eeyanq, chisaho'q rik'in naq naterq'usiik xloq'al xb'aan li Yos; 10ut wi wank junaq b'ihom, chisaho'q rik'in naq nakub'siik xloq'al, xb'aan naq li b'ihom, a'an chanchan li ratz'um li pim li ink'a' nawank chi junelik: 11naq na'elk chaq li saq'e chi k'ajo' xtiqwal, naxchaqihob'resi li pim, nat'ane'k li ratz'um#1,10-11 Is 40,6-7; 1 P 1,24. ut na'oso'k li xch'ina'usal. Jo'kan ajwi' naq taa'oso'q li b'ihom sa'eb' li xb'aanuhom.
12Us xaq reheb' li neke'xkuy li yale'k! Xb'aan naq, chirix xq'axb'al ru a'an, te'xk'ul xq'ajkamunkileb', a' li yu'am yeechi'inb'il chaq xb'aan li Qaawa' reheb' li neke'rahok re. 13Naq taayale'q rix junaq, mixye: “A' li Yos nayalok wix”, xb'aan naq li Yos ink'a' nayale'k rix xb'aan li ink'a' us chi moko naxyal rix anihaq. 14Li aaleek nachalk sa' xb'een li junjunq naq naq'unb'esiik ut nak'ame'k xb'aan xrahinkil ru li maa'usilal. 15Chirix chik a'an li xrahinkil ru li maa'usilal nasiyank ut narala li maak, ut li maak, naq ak xtz'aqlok ru, naxk'am chaq li kamk.
Chiqapaab' chi tz'aqal li Raatin li Yos
16Ex was wiitz'in raarookex inb'aan, meeb'alaq'i eerib': 17chixjunil li usilal k'eeb'il qe ut chixjunil li qamaatan li tz'aqal re ru, taqe'q nachalk chaq, ut nakub'e chaq rik'in li xYuwa'ileb' li chahim, li ink'a' najalaak chi moko naq'oqyino'k ru. 18A'an sa' xch'ool x'alaak qayoob'tesinkil rik'in li Aatin re li yaal, re naq laa'ohaq jo' xb'een ru li awimq sa' li xyoob'tesihom.
19Ex was wiitz'in raarookex inb'aan, chiwanq sa' eech'ool a'in: li junjunq seeb'aq xch'ool chi ab'ink, chixkuyaq rib' chi aatinak ut chixkuyaq rib' chi josq'o'k.#1,19 Eklo 5,11; Pr 10,19; 14,17. 20Xb'aan naq li josq' aj winq ink'a' naxb'aanu li tiikilal li naraj li Yos. 21Jo'kan utan, tz'eqtaanahomaq chixjunil li tz'ajb'eetal jo'wi' chixjunil li maa'usilal li yo chi numtaak, ut k'ulumaq sa' q'unil li Aatin awb'il eerik'in: a'an wank xwankil chekolb'al.
22B'aanuhomaq li naxye li Aatin, ut ink'a' chik'ojlaaq eech'ool ka'ajwi' rik'in rab'inkil: yal xb'alaq'inkil eerib' nekeb'aanu chi jo'kan. 23Xb'aan naq li narab'i li Aatin ut ink'a' naxyu'ami, a'an chanchan jun li winq naril li ru sa' lem; 24ut naq naxik, nasachk sa' xch'ool chanru na'ilok. 25Ab'an li naxk'e xch'ool chi xk'oxlankil rix li Chaq'rab' tz'aqal re ru aj k'ehol chi wank chi ach'ab'anb'il,#1,25 Li Ak' Chaq'rab' nokoorach'ab' chiru chixjunil li b'ak'b'ooko wi' ut nokooxk'e chi wank chi ach'ab'anb'il. ut junelik kaw xch'ool chi xpaab'ankil moko jo' ta aj ab'inel li junpaat nasachk sa' xch'ool, jo' b'an tz'aqal aj b'aanuhom re li k'aru nataqlaak wi', li winq a'an osob'tesinb'ilaq rik'in xk'anjelankil.
26Wi ani naxk'oxla rib' naq tz'aqal aj paab'anel ut ink'a' naxq'us li ru'uj raq', a'an naxb'alaq'i rib' xjunes, ut li xpaab'aal maak'a' rajb'al. 27Li tz'aqal paab'ank li maak'a' reek' ut loq' chiru li Yos Yuwa'b'ej, a'an a'in: xtenq'ankileb' li maak'a'eb' chik xna' xyuwa' ut eb' li xmalka'an li wankeb' sa' rahilal, jo' ajwi' xkolb'al qib' chiru li xmaa'usilal li ruuchich'och' chi maak'a'aq qamuxul.
Currently Selected:
Stg 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.