Heb 13
13
Xk'eeb'al xna'leb'eb' laj paab'anel
1Chiwanq junelik li rahok ib' sa' eeyanq jo' eeras eeriitz'in eerib'. 2Misachk sa' eech'ool li k'ehok ochochnaal; sa' xk'ab'a' a'an wankeb' xe'xk'ul eb' li ánjel sa' rochocheb' chi ink'a' xe'xnaw.#13,2 Gn 18,1-8; 19,1-3; Tb 5,4.
3Jultikaq eere li wankeb' sa' tz'alam, chanchan ta wi' naq laa'ex jun rik'ineb'. Jultikaq eere li rahob'tesinb'ileb', xb'aan naq laa'ex ch'och' sululex ajwi'.
4Chejunilex cheroxloq'i li sumlaak ut maak'a' k'aru teeb'alaq'i wi' eerib', xb'aan naq li Yos taaraqoq aatin sa' xb'eeneb' laj ko'b'eet laj yumb'eet jo' ajwi' sa' xb'eeneb' laj muxul sumsu.
5Mexrahink li b'ihomal, k'ojk'ooq b'an eech'ool rik'in li k'aru wank eere, xb'aan naq li Yos kixye: “Ink'a' tatinkanab' chi moko tatintz'eq chirix inch'ool”.#13,5 Dt 31,6-8; Jos 1,5; Eklo 29,23. 6Jo'kan naq naru tqaye chi anchal qach'ool:
“Li Qaawa' a'an aj tenq'ahom we; ink'a' tinxiwaq.
K'aru truuq xb'aanunkil we junaq yal winq?”.#13,6 Sal 56,4-5.10-12; 118,6.
7Jultikaq eere eb' laj k'amol eeb'e li ke'ch'olob'ank raatin li Yos cheru. Chek'ehaq reetal chanru xo'raqe'q wi' li xyu'ameb', ut k'amomaq eere rik'in li xpaab'aaleb'. 8Li Jesukriist a'an ajwi' li wan chaq ewer, li wank anaqwan; ut a'anaq chi junelik.
9Chek'e reetal, mexb'alaq'iik xb'aan xk'utomeb' li winq jalan jalanq neke'xye ut najt chalenaqeb'. Jwal us naq tqakawub'resi qach'ool rik'in rusilal li Yos, ut maawa' rik'in tzekemq li maak'a' ki'ok wi' reheb' li ke'paab'ank re.
10Laa'o wank jun qa'artal b'arwi' ink'a' xk'ulub'eb' tzekank eb' li neke'k'anjelak sa' li loq'laj Muheb'aal. 11Li xyuwa'il aj tij naroksi li xkik'eleb' li xul sa' li Santil Na'ajej cho'q mayej chirix li maak, ab'an li xtib'eleb' nak'atmank chaq toj chirix li tenamit.#13,11 Lv 16,27. 12Jo'kan ajwi' li Jesus kixk'ul li rahilal toj junpak'al rokeb'aal li tenamit,#13,12 Mt 27,32; Jn 19,17.20. re xsantob'resinkil li xtenamit rik'in li xkik'el.
13Elqo ajwi' laa'o sa' li tenamit chi xk'ulb'al li Jesus, yooqo chi riiqankil li xnimal xrahilal a'an, 14xb'aan naq arin maak'a' qatenamit re chi junajwa, yooko b'an xsik'b'al li toj chaalel.
15Sa' xk'ab'a' li Jesus qamayejaaq ut qayeechi'iiq junelik li qatij re li Yos, naraj naxye, a' li xk'anjel li xtz'uumal qe li naqanima wi' li xk'ab'a'.#13,15 Lv 7,12; Sal 50,14.23; Os 14,2. 16Misachk sa' eech'ool xb'aanunkil li usilal jo'wi' xwotzb'al chixjunil; a'an a'in li mayej nawulak chiru li Yos.
17Chex'ab'inq chiruheb' laj k'amol eeb'e xb'aan naq eb' a'an neke'yo'lek chirix leeyu'am jo'eb' li toxe'xq'axtesi ru li xk'anjeleb' cherix laa'ex. Chepaab'aqeb' re naq te'xb'aanu a'in rik'in sahil ch'oolej, ut ink'a' chi rahaqeb' sa' xch'ool, xb'aan naq a'an moko tixk'am ta chaq usilal cho'q eere.
18Chextijoq chiqix: naqeek'a naq tuqtu li qach'ool ut naqaj xb'aanunkil chixjunil chi chaab'il. 19Q'axal nintz'aama naq cheb'aanuhaq a'in re naq tinruuq chi sutq'iik chi junpaat eerik'in.
Xchaq'rab'inkileb' laj paab'anel
20Li Yos aj k'ehol tuqtuukilal, li kiwaklesink re li Jesus sa' xyanqeb' li kamenaq, a' li Qaawa', li xnimal ru aj K'aak'alenel karneer sa' xk'ab'a' xkik'elil li junelik Sumwank, 21a'an taxaq chik'uub'anq re leeyu'am rik'in chixjunil li chaab'ilal re xb'aanunkil li rajom. A'an taxaq chib'aanunq qik'in li nawulak chiru sa' xk'ab'a' li Jesukriist: rehaq taxaq li loq'al junq'e junq'e kutan. Jo'kan taxaq.
22Ex was wiitz'in, nintz'aama cheru naq chekuyaq rab'inkil li aatin a'in li nintaqla re xkawub'resinkil leech'ool: moko k'i ta li aatin xintz'iib'a sa' li hu a'in. 23Chenawaq naq laj Timoteo, li qakomon, ak x'ach'ab'aak. Wi taak'ulunq chi junpaat, wochb'eenaq naq tooxik cherilb'al.
24K'ehomaqeb' xsahil xch'ool chixjunileb' laj k'amol eeb'e jo'wi' chixjunileb' laj santil paab'anel. Neke'xtaqla xsahil eech'ool eb' laj Italia.
25Li rusilal li Yos chiwanq taxaq eerik'in.
Currently Selected:
Heb 13: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.