Sal 59
59
SAALM 59 (58)
Li Qaawa' a'an laj tenq'ahom qe
1Re li xjolomileb' laj b'ichanel. “Matsachok”. Xsaalm laj David, naq laj Saúl kixye naq te'xk'aak'ale li rochoch laj David re naq kamsinb'ilaq.
2At inYos, chinaakol taxaq chiruheb' li xik' neke'ilok we,
chinaawisi sa' ruq'eb' li neke'raj inrahob'tesinkil;
3chinaakol chiruheb' li neke'b'aanunk maa'usilal,
chinaawisi sa' ruq'eb' laj kamsineleb' ras riitz'in!
4Chak'e reetal naq wankeb' te'ajoq inkamsinkil;
eb' li wankeb' xwankil yookeb' xk'uub'ankil insachb'al.
At Qaawa', maak'a' inmaak, ink'a' xinq'et laawaatin;
5us ta maak'a' xinmaakob'k wi',
ab'anan neke'xseeb'a rib' chi chalk sa' inb'een.
Ajsi aawu,
waklin chintenq'ankil ut chak'eheb' reetal,
6at Qaawa', at Nimajwal Yos, xYosat laj Israel!
Waklin chi xk'ajtesinkil ruheb' li poyanam,
maawuxtaana ruheb' laj b'alaq' a'in
li neke'yoob'ank maa'usilal.
7Ewu neke'sutq'iik chaq;
kama'eb' li tz'i' naq neke'woob'ak,
neke'xsutya rib' sa' chixjunil li tenamit.
8Chak'eheb' reetal chanru neke'aatinak:
li xtz'uumal reheb' chanchaneb' ch'iich':
“Ma wank ta junaq taa'ab'inq qe?”, chankeb'.
9A'ut laa'at, at Qaawa', yal nakase'eheb',#59,9 Sal 2,4.
nakatse'ek xb'aaneb' li poyanam a'an li maak'a'eb' xpaab'aal.
10At inYos, laa'at laj k'ehol xkawub' linch'ool,
aawik'in xaqxo li woyb'enihom,
xb'aan naq laa'at linsaqoonak.
11Li Yos aj rahol we, we' chaq chink'ulb'al.
A'an taak'ehoq we xq'axb'aleb' ru li xik' neke'ilok we.
12At Qaawa', laa'at laj kolol qe,
maakamsiheb' chi junajwa,
yalaq sachb'esiheb' b'an rik'in laawankil,
chacha'cha'i ruheb'
re naq a'an ink'a' taasachq sa' xch'ool lintenamit.
13Jo'ch'inal jo'nimal li neke'xye, a'an maak.
Che'kanaaq b'i' rub'el xwankil li xq'etq'etileb',
xb'aan li majewank ut li tik'ti' na'elk sa' xtz'uumal reheb'.
14Sacheb', sacheb' rik'in laajosq'il,
me'wank chik chi junajwa,
re naq chinawmanq naq li Yos na'awab'ejink
sa' xb'eeneb' laj Israel jo'ajwi' sa' chixjunil li ruuchich'och'!
15Ewu neke'sutq'iik chaq;
neke'woob'ak kama'eb' li tz'i',
neke'xsutya rib' sa' chixjunil li tenamit.
16Neke'xb'eeni rib' chi xsik'b'al k'aru te'xk'ux;
naq toj maji' neke'nujak, neke'hanok yalaq b'ar.
17A'ut laa'in tinb'icha li xnimal aawankil,
toj eq'la tinpuktesi resil laarahom,
xb'aan naq laa'at xatmuheelank we;
sa' xkutankil linrahilal laa'at xatkolok we.
18Aj k'eholat xkawub' inch'ool, tinb'ichanq sa' laak'ab'a',
xb'aan naq laa'at linsaqoonak, at inYos,
laa'at li Yos li nakatrahok we.
Currently Selected:
Sal 59: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
