Pr 26
26
1Jo' li ratz'am ke sa' saq'ehil
malaj li hab' sa' xq'ehil li q'olok,
jo'kan ajwi' li loq'al:
moko us ta naq nak'ehe'k re li maak'a' xna'leb'.
2Jo' li tz'unun ink'a' nahilank
malaj li wilix naxik'ank chi junelik,
jo'kan ajwi' li majewaak
naq nachalk chi maak'a' xyaalal.
3Aajel ru li tz'uum cho'q re li kawaay ut li ch'iich' sa' re li b'uur;
jo'kan ajwi' aajel ru li che' cho'q re xyi rix li maak'a' xna'leb'.
4Maasume ru li k'aru naxye li maak'a' xna'leb'
re naq ink'a' tatkanaaq laa'at jo' a'an.
5Tento taanaw xsumenkil li maak'a' xna'leb'
re naq tixk'e reetal li xmajelal xna'leb'.
6Wi taataqla junaq esil chirix li maak'a' xna'leb',
a'an chanchan naq xaset laawoq ut xasik' aach'a'ajkilal.
7Jo' naq li yeq roq ink'a' najt nawulak,
jo'kan ajwi' li tusb'ileb' ru aatin cho'q re li maak'a' xna'leb'.
8Moko na'leb' ta xb'ak'b'al li pek chiru li rant'in;
jo'kan ajwi' xk'eeb'al xloq'al li maak'a' xna'leb'.
9Li kalajenaq ink'a' nareek'a xtiq'om li k'ix;
jo'kan ajwi' li uutz'u'ujinb'il aatin sa' re li maak'a' xna'leb'.
10Li naxk'e xk'anjel li maak'a' xna'leb' sa' li rochoch,
a'an chanchan laj yo li naxtiq' chixjunileb' li neke'nume'k.
11Jo' naq li tz'i' naxlow wi' chik sa' li xxa'aw,#26,11 2 P 2,22.
jo'kan ajwi' li maak'a' xna'leb' naq naxb'aanu wi' chik li maa'usilal.
12Toj naru xk'eeb'al xna'eleb'eb' li maak'a'eb' xna'leb';
ab'an jwal ch'a'aj xtenq'ankil junaq li naxk'oxla naq naxnaw chixjunil.#26,12 Pr 29,20.
13Naq laj q'em ink'a' naraj k'anjelak, naxye:
“Wank jun kaqkoj sa' b'e li naraj inkamsinkil”,#26,13 Pr 22,13. chan.
14Li xtz'apb'al li okeb'aal naxsuri rib' sa' li k'ojk'o wi';
jo'kan ajwi' laj q'em naxtolk'osi rib' chiru li xch'aat.
15Laj q'em naxch'ik li ruq' sa' li sek';
ab'an chi moko li tzekemq naxkuy xk'eeb'al sa' re.#26,15 Pr 19,24.
16Sa' xch'ool laj q'em naq q'axal wi' chik wank xna'leb'
chiruheb' wuqub' chi winq aj k'ehol na'leb'.
17Ani naxch'ik rib' sa' xraaxiik' jalan chik,
a'an chanchan yo chi xchapb'al li xxik junaq tz'i'.
18Jo' junaq kaan ru nakutuk simaj rik'in xam re kamsink,
19jo'kan naxb'aanu li naxb'alaq'i li ramiiw,
ut moqon chik naxye naq yal b'atz'unk re.
20Naq na'oso'k li si', nachupk li xam;
ut naq na'so'k li tik'ti', nach'anaak li raaxiik'.
21Si'ij ut si', a'an re xtz'ab'b'al li xam;
ut li josq' aj winq, a'an nayoob'ank raaxiik'.
22Li tik'ti'ik, a'an chanchan li saa'us:
cham naxik wi', toj sa' xchamal li ch'oolej!#26,22 Pr 18,8.
23Ch'och' uk'al uutz'u'ujinb'il rik'in plaat,
jo'kan li q'unil aatin li naxye li ink'a' us xna'leb'.
24Li xik' na'ilok naxmuq li xna'leb' naq na'aatinak;
ab'an sa' li xch'ool yo xk'uub'ankil li raaxiik'.
25Maapaab' naq tatraatina sa' q'unil aatin,
xb'aan naq k'ajo' li maa'usilal wank sa' xch'ool.
26Us ta tixmuq li xlab'alil xch'ool,
ab'an li xmaa'usilal taak'utunq chiruheb' chixjunileb' li poyanam.
27Li naxb'ek junaq jul, a'an ajwi' taat'ane'q chisa';
ut li natolk'osink pek, tixtaw li kamk rub'el a'an.#26,27 Eklo 27,25-27.
28Laj tik'ti' xik' naril li yaal;
ut li na'aatinak rik'in li q'unil aatin naxjuk' chixjunil.
Q'eqchi DC Bible © Bible Society in Guatemala, 2005.