Fil 3

Li tz'aqal xb'ehil li kolb'a ib'

1Ex was wiitz'in, chisaho'q sa' eech'ool sa' xk'ab'a' li Qaawa'. Moko ch'a'aj ta cho'q we xtz'iib'ankil wi' chik eerik'in li k'a'aq re ru ak inyehom chaq, ut a'an tixk'e xkawub' leech'ool. 2Chekol eerib' chiruheb' li tz'i';#3,2 Eb' li tz'i' a'aneb' laj Judiiy li neke'xye naq tento sa' xb'eeneb' chixjunil laj paab'anel xk'ulb'al li sirkunsisyon. chekol eerib' chiruheb' li maa'us aj k'anjel; chekol eerib' chiruheb' laj sirkunsisyon aj b'alaq'! 3Eb' li tz'aqal xk'ulumeb' li sirkunsisyon a'ano laa'o, li naqaloq'oni ru li Yos jo' naraj li xMusiq', naqanima qib' sa' xk'ab'a' li Kristo Jesus ut ink'a' k'ojk'o li qach'ool ka'ajwi' rik'in li naqab'aanu qajunes.

4Laa'in wank ajwi' k'aru tink'e wi' xkawilal inch'ool. Wi wank junaq naxk'oxla naq truuq tixtaw xkawilal li xch'ool, ma toja' ta chik laa'in. 5Kink'ul li sirkunsisyon sa' xwaqxaq li kutan; laa'in aj Israel sa' xtepaal laj Benjamín, laa'in aj Hebreo kama'eb' ajwi' linna' linyuwa'; rik'in xpaab'ankil li Chaq'rab', laa'in aj Pariseey. 6Q'axal kink'e inch'ool chi paab'ank toj reetal kinrahob'tesi li Iklees, ut maajun truuq tixwech' wix rik'in li tiikilal natawmank sa' xk'anjelankil xChaq'rab' laj Moisés.

7Ut chixjunil a'in li q'axal kink'e xwankil junxil, nink'oxla naq maak'a' na'ok wi' sa' xk'ab'a' li Kriist. 8A wi' chik a'in: chiwu laa'in chixjunil li k'a'aq re ru maak'a' na'ok wi' sa' xk'ab'a' li xnimal xloq'al xnawb'al ru li Kristo Jesus, linQaawa'. Sa' xk'ab'a' a'an xintz'eq chirix inch'ool chixjunil li k'a'aq re ru ut yal mul aj chik naq nawil, re naq tweechani li Kriist 9ut tintawe'q rik'in, maawa' rik'in xtiikilal linch'ool li nachalk rik'in li Chaq'rab', rik'in b'an li nawank sa' xk'ab'a' xpaab'ankil li Kriist, a' li nachalk rik'in li Yos xb'aan li paab'aal. 10Nawaj xnawb'al ru li Kriist ut li xwankil li xwaklijik chi yo'yo, nawaj ajwi' tz'aqonk sa'eb' li xrahilal: chi jo'kan, juntaq'eetanb'ilaqin rik'in A'an sa' li xkamik, 11tinyal inq'e chi reechaninkil li xwaklijikeb' chi yo'yo eb' li kamenaq.

12Moko ak ta xintaw a'in, chi moko ak ta tz'aqal we wu, toj yookin b'an chi xyalb'al inq'e re naq toxweechani xb'aan naq xin'eechaniik ajwi' laa'in xb'aan li Kristo Jesus. 13Ex was wiitz'in, ink'a' nink'oxla naq ak ta xweechani. Ab'an li ninb'aanu, a'an a'in: ninsach sa' inch'ool li b'arwan xkanaak chaq chi ixb'ej ut ninyal inq'e chi xtawb'al li wank chi uub'ej; 14sa' aanil ninxik sa' li xraqik re xk'ulb'al li q'ajkam li wank toj taqe'q, li nokooxb'oq wi' li Yos sa' xk'ab'a' li Kristo Jesus.

15Jo'kan utan, chiqajunilo li tz'aqal qe qu sa' li qapaab'aal#3,15 Tz'aqal qe qu sa' li qapaab'aal naraj naxye naq ak xchap xxe' chi us li kristiyanil, us ta maji' kolb'ilo chi junajwa (3,12). jo'kaq taxaq a'in li qak'a'uxl; ut wi rik'in k'aru jalan chik nekek'oxla, a'an ajwi' li Yos taach'olob'anq cheru. 16Ab'anan toj b'arwi' xoowulak, xikaqo chi tiik chi uub'ej.

17Ex was wiitz'in, chek'am eere wik'in ut cheka'yaheb' li neke'xtaaqe li b'e xqak'ut cheru. 18Xb'aan naq naab'aleb' xik' neke'ril li xkrus li Kriist. A'in ak k'iila sut inyehom eere, ut anaqwan ninye wi' chik eere rik'in yaab'ak. 19Ab'an li xraqikeb' a'in, a'an li sachk; li xyoseb' a'an li xsa'eb'; neke'xnimob'resi rib' sa' li xutaanalil na'leb' neke'xye neke'xb'aanu, ut ka'ajwi' li k'a'aq re ru wank sa' ruuchich'och' neke'reek'a xsahil.

20A'ut laa'o sa' choxa wank qatenamit, b'arwi' taak'ulunq chaq laj Kolonel li naqoyb'eni, a' li Qaawa' Jesukriist. 21A'an taajaltesinq ru li qach'och'el qasululel chi nimaq xloq'al, re naq tkanaaq chi junajwa jo' li xjunxaqalil,#3,21 Cf. 1 Ko 15,35-37.42-49.53. sa' xk'ab'a' li xnimal xwankil li naruhank wi' xk'eeb'al chixjunil rub'el roq.

Currently Selected:

Fil 3: QQC

Highlight

Copy

Compare