Mi 7
7
Xk'ihank li maa'usilal
1Toq'ob' xaq wu,
chanchanin aj chik li nasakonink chirix xq'ehil li q'olok,
ut ink'a' chik nintaw in'uub' chi moko in'iig;
ink'a' chik nintaw ruheb' li awimq li q'axal nawulak chiwu.
2Sa' ruuchich'och' maajun chik tiik xch'ool
ut maa'ani chik junaq aj paab'anel.#7,2 Sal 12,2.
Chixjunileb' kawal wankeb' chi b'aanunk maa'usilal
ut neke'xra'le rib' chirib'ileb' rib'.
3K'aynaqeb' li ruq'eb' chi xb'aanunkil li maa'usilal;
eb' laj jolominel kaw neke'titz'ok toj,
eb' laj raqol aatin neke'tuminaak ruheb',
ut eb' li ninqeb' xwankil neke'xb'aanu li neke'raj
ut neke'xk'uub' ru li ink'a' us.
4Li jwal chaab'il sa' xyanqeb', a'an chanchan li k'ix;
ut li tiik xch'ool, a'an chanchan li pajl.
Ab'anan chalk re li raqok aatin,
a' li kutan yeeb'il aawe xb'aaneb' li propeet.
Toja' naq te'sachq xna'leb' chixjunileb'.
5Meepaab' li tixye eere leeras eeriitz'in
chi moko chek'ojob' eech'ool chirix junaq leeramiiw;
chek'e ajwi' reetal li teeseeraq'i rik'in leerixaqil.
6Xb'aan naq anaqwan li alalb'ej naxtz'eqtaana li yuwa'b'ej,
li ko'b'ej naxq'etq'eti rib' chiru li xna',
li alib'ej xik' naril li xna' li xb'eelom,
ut eb' li xik' neke'ilok, sa' ajwi' leerochoch wankeb'.#7,6 Mt 10,35-36; Lk 12,53.
7A'ut laa'in kaw nin'oyb'enink rik'in li Qaawa',
k'ojk'o linch'ool rik'in li Yos laj kolol we:
ninnaw naq A'an taa'ab'inq we.
Li Yos tixkol li xtenamit
8Matsaho'k rik'in linrahilal, at tenamit li xik' nakat-ilok we,
xb'aan naq us ta xint'ane'k, tinwakliiq wi' chik;
us ta wankin sa' aak'ab', li Qaawa' a'an linsaqenk.
9Tinkuy li xjosq'il li Qaawa' xb'aan naq xinmaakob'k chiru:
toj taaraqoq aatin chiwix ut taaril xtoq'ob'aal wu.
Li Qaawa' taa'isinq we sa' li aak'ab'
re toxwil linkolb'al xb'aan.
10Li xik' na'ilok we taaril a'an;
taaril ut taakanaaq sa' xutaan.
Ut li xyehok we junxil:
“B'ar wank li Qaawa' laaYos?”,#7,10 Sal 79,10; Jl 2,17.
anaqwan taasaho'q linch'ool chi rilb'al
naq taayeq'iiq sa' oqej jo' xsululel li b'e.
11At Jerusalén, chalk re li kutan
naq taawaklesiiq wi' chik laasuttz'akil ut taayu'manq ru laateepalil.
12Chalk re li xq'ehil naq te'chalq aawik'in naab'aleb' li tenamit
chalen Asiria toj Ejiipt,
chalen li nima' Nilo toj chire li Éwfrates,
chalen chire li palaw jun toj chire li palaw jun chik,
chalen li k'iche' jun toj chire li k'iche' jun chik.
13Ab'an nakirnak taakanaaq li xna'ajeb' li tenamit a'an
xb'aan li maa'usilal xe'xb'aanu jo'k'ihaleb' li wankeb' aran.
Tij chirix li xtenamit li Yos
14At Qaawa', chawil taxaq laatenamit rik'in laawankil,
chab'eresiheb' laakarneer sik'b'ileb' ru aab'aan,
li wankeb' xjunes sa' li k'iche'
ut sutsuukeb' sa' xq'emal li ch'och'.
K'ameb' chi ichajib'k sa' xteepal Basán ut Galahad,
jo' naq ke'wank chaq junxil.
15Chak'ut wi' chik li xninqal sachb'ach'oolej chiruheb',
jo' naq koo'elk chaq sa' li tenamit Ejiipt.
16Eb' li tenamit junch'ol te'ril a'an,
ut us ta q'axal kaweb' rib', te'kanaaq sa' xutaan.
Te'memo'q ut te'tz'apxiko'q.
17Te'xlow li pojtz' jo'kaqeb' li k'anti',
jo'kaqeb' li xul li neke'xjukuki rib' chiru ch'och'.
Siksootqeb' naq te'elq sa' li xsokeb',
ut parpotqeb' xb'aaneb' xxiw naq te'chalq aawik'in,
at Qaawa', at qaYos.
Li Yos naxkuy xmaakeb' li xtenamit
18Maajun chik junaq Yos jo' laa'at, at Qaawa',
xb'aan naq laa'at nakakuy nakasach li xmaakeb' li rela' laatenamit.
Laa'at ink'a' nakatjosq'o'k chi junajwa,
xb'aan naq nakara li uxtaanank.
19Chawuxtaana wi' chik qu,
chamuq li qamaa'usilal ut chakut chixjunileb' li qamaak sa' xchamal li palaw.
20At Qaawa', junelik taxaq
wanq li xtiikilal aach'ool rik'in laj Jakob
ut laarahom rik'in laj Abrahán,
jo' kaye chaq junxil q'e kutan reheb' li qana' qayuwa'.#7,20 Gn 12,1-3; 17,6-8; 28,13-15; Lk 1,55.73.
Currently Selected:
Mi 7: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.