Lk 2
2
Xyo'lajik li Jesus
(Mt 1,18-25)
1Sa'eb' li kutan a'an ki'elk jun xchaq'rab' laj César Augusto naq chixjunileb' li wankeb' sa' ruuchich'och' te'xk'e chi tz'iib'aak li xk'ab'a'eb'. 2A'an chaq li xb'een tz'iib'ank k'ab'a'ej sa' li tenamit naq kiwank laj Cirino cho'q aj jolominel re Siria. 3Chixjunileb' koheb' chi xk'eeb'aleb' rib' chi tz'iib'aak, ak sa' xtenamit xtenamit li junjunq.
4Ki'elk ajwi' laj José aran Galilea, sa' li tenamit Nazaret, ut kitaqe'k Judea, sa' li xtenamit laj David, Belén xk'ab'a' (xb'aan naq a'an xkomoneb' li ralal xk'ajol laj David), 5re xk'eeb'al chi tz'iib'aak li xk'ab'a' rochb'een lix María li rixaqil li wank sa' yu'am.
6Ut naq wankeb' aran, kitz'aqlok xkutankil naq taa'alanq lix María; 7ut kiwank li xb'een xk'uula'al,#2,7 Naq li Santil Hu naxye naq lix María kiwank li xb'een xk'uula'al, naxch'olob' li xloq'al ut li xk'ulub' li k'uula'al a'an. kixb'at sa' t'ikr ut kixsotob' sa' xwa'leb'aaleb' ketomq, xb'aan naq maak'a' na'ajej cho'q reheb' sa' li kab'l.
Eb' laj k'aak'alenel ketomq ut eb' li ánjel
8Sa' li na'ajej a'an wankeb' aj k'aak'alenel ketomq, yookeb' chi yo'lek re xk'aak'alenkil li xketomq chiru q'oqyink. 9Ut jun li x'ánjel li Qaawa' kixk'ut rib' chiruheb', ut li xnimajwal loq'al li Qaawa' kixsuteb' sa' li xsaqenk: k'ajo' naq ke'xiwak.
10Ab'an li ánjel kixye reheb': “Mexxiwak xb'aan naq tinye eere jun chaab'il esilal, ut a'an jun xnimal sahil ch'oolej cho'q re chixjunil li tenamit: 11Anaqwan, sa' li xtenamit laj David, xyo'laak cho'q eere jun aj Kolonel, a'an li Kriist, li Qaawa'. 12A'in li reetalil cho'q eere: teetaw jun k'uula'al b'atb'ooq sa' t'ikr ut sotsooq sa' xwa'leb'aaleb' ketomq”.
13Xaqaamileb' chi xk'atq li ánjel naab'aleb' chik ánjel li wankeb' sa' choxa, yookeb' chi xnimankil ru li Yos chi jo'ka'in:
14“Nim li xloq'al li Yos taqe'q
ut wank tuqtuukil usilal sa' ruuchich'och'
rik'ineb' li raarookeb' xb'aan li Qaawa'”.
15Naq eb' li ánjel koheb' wi' chik sa' choxa, eb' laj k'aak'alenel ketomq ke'xye chirib'ileb' rib':
—Yo'qeb' toj Belén ut qilaq chaq a'in li xk'ulmank, li kixk'ut chiqu li Qaawa'.
16Ut ke'seeb'ank chi xik, koxe'xtaw lix María, laj José ut li k'uula'al sotso sa' xwa'leb'aaleb' ketomq. 17Naq ke'ril, ke'xseeraq'i li k'aru yeeb'il reheb' chirix li k'uula'al a'an; 18ut chixjunileb' li ke'ab'ink re ke'sachk xch'ool xb'aan li neke'xye eb' laj k'aak'alenel ketomq.
19Lix María naxk'uula sa' xch'ool chixjunil a'in, yo chi xk'oxlankil rix.
20Ut eb' laj k'aak'alenel ketomq ke'q'ajk, yookeb' chi xnimankil ut chi xloq'oninkil ru li Yos xb'aan li k'aru ke'rab'i ut ke'ril chaq, jo' chanru kiyeemank reheb'.
Li Jesus kiq'axtesiik sa' ruq' li Yos
21Naq kitz'aqlok waqxaqib' kutan li k'uula'al, kixk'ul li sirkunsisyon ut Jesus ke'xk'e cho'q xk'ab'a', a' ajwi' li kixye li ánjel naq toj maji' nasiyaak chaq rik'in li xna'.
22Naq kiwulak xq'ehil li xch'ajob'resinkileb' rib', jo' naxye li xChaq'rab' laj Moisés, ke'xk'am li Jesus Jerusalén re xq'axtesinkil sa' ruq' li Qaawa', 23jo' tz'iib'anb'il sa' li xChaq'rab' li Qaawa': “Chixjunil li xb'een alalb'ej teloom q'axtesinb'ilaq sa' ruq' li Qaawa'”.#2,23 Ex 13,2; 13,11. 24Naxye ajwi' li xChaq'rab' li Qaawa' naq “mayejanb'ilaq wiib' mukuy malaj wiib'aq k'ook'ob'”.#2,24 Lv 5,7; 12,8.
25Aran Jerusalén wank jun li winq, aj Simehón xk'ab'a': li winq a'an tiik xch'ool ut aj paab'anel, yo chi royb'eninkil li xk'ojob'ankil xch'ool li tenamit Israel; ut li Santil Musiq'ej wank chi xb'een.
26Ak yeeb'il chaq re xb'aan li Santil Musiq'ej naq ink'a' taakamq chi maji'aq taaril ru li xKriist li Qaawa'. 27Chi toch'b'il li xch'ool xb'aan li Musiq'ej, kiwulak laj Simehón sa' rochoch li Yos. Ut naq ki'oksiik li k'uula'al Jesus xb'aan li xna' xyuwa' re xb'aanunkil li naxye li Chaq'rab' chirix a'an, 28laj Simehón kixq'alu li k'uula'al, kixnima ru li Yos ut kixye:
29“Anaqwan, at Qaawa', chaq'rab'i laamoos
sa' tuqtuukil usilal,
jo' chanru yeeb'il chaq xb'aan laawaatin,
30xb'aan naq ak xwil rik'in wu li kolb'a ib'
31li xakawresi chiru chixjunileb' li tenamit:
32a'an saqenk re xkutanob'resinkileb' li junch'ol chik,
ut xnimal xloq'al laatenamit Israel”.
33Sachsookeb' xch'ool li xna' xyuwa' rik'in li yeeb'il chirix li k'uula'al. 34Ut laj Simehón kirosob'tesiheb' ut kixye re lix María li na'b'ej:
—K'e reetal. Li k'uula'al a'in xaqab'anb'il chaq re naq naab'aleb' aj Israel te't'ane'q malaj te'wakliiq xb'aan. A'anaq jun eetalil li taawanq wi' jachok ib', 35re naq tkanaaq chi kutankil li wank sa' xch'ooleb' naab'al chi poyanam. Ut laa'at jun ch'iich' taaxeq'oq re laawaanm.
36Wank ajwi' aran jun propeet, x'Ana xk'ab'a', xrab'in laj Fanuel, yo'lajenaq sa' li xteepal laj Aser. A'an ak xikenaq xhab'. Toj saaj naq kisumlaak ut wuqub' chihab' ajwi' kiwank rik'in li xb'eelom. 37Anaqwan xmalka'an chik ut kaahib' ro'k'aal chihab' wank re. Ink'a' naxkanab' li rochoch li Yos, yo chi k'anjelak chiru li Qaawa' chi q'eq ut chi kutan rik'in kuyuk sa' ut tijok. 38Sa' ajwi' li honal a'an kiwulak aran ut ki'ok chi xnimankil ru li Yos ut chi aatinak chirix li k'uula'al rik'in chixjunileb' li yookeb' chi royb'eninkil li xkolb'al li tenamit Jerusalén.
39Naq ak xe'xb'aanu chixjunil li naxye li xChaq'rab' li Qaawa', ke'sutq'iik Galilea, sa' li xtenamiteb', Nazaret xk'ab'a'. 40Ut li k'uula'al yo chi k'iik ut chi kawuuk, nujenaq chi chaab'il na'leb'; ut li rusilal li Yos wank chi xb'een.
Li ch'ina'al Jesus kikanaak sa' rochoch li Yos
41Rajlal chihab' li xna' xyuwa' li Jesus neke'xik Jerusalén chi xninq'ehinkil li Paswa. 42Naq li Jesus kixkooloni kab'laju chihab', koheb' sa' li ninq'e jo' k'aynaqeb' xb'aanunkil. 43Ut sa' xraqik li ninq'e, ke'sutq'iik; ab'an li ch'ina'al Jesus kikanaak chaq Jerusalén chi ink'a' ke'xnaw li xna' xyuwa'. 44Sa' xch'oleeb' a'an naq wan chaq sa' xyanqeb' li rochb'eeneb' chaq chi sutq'iik; jo'kan naq ke'b'eek chiru jun kutan ut ke'xsik' sa' xyanqeb' li rech'alal ut eb' li neke'xnaw ru. 45Ab'anan ink'a' ke'xtaw; jo'kan naq ke'sutq'iik wi' chik Jerusalén chi xsik'b'al.
46Sa' rox kutan koxe'xtaw sa' rochoch li Yos, k'ojk'o sa' xyiheb' laj tzolonel, yo chi rab'inkileb' ut chi patz'ok reheb'. 47Sachsookeb' xch'ool chixjunileb' li neke'ab'ink re xb'aan li xseeb'al xk'a'uxl ut li xsumehom. 48Ut naq li xna' xyuwa' ke'ril, ke'sachk xch'ool, ut li na'b'ej kixye re:
—At wal, k'a'ut naq xab'aanu qe chi jo'ka'in? Laayuwa' ut laa'in k'ajo' qak'a'uxl chawix naq yooko chasik'b'al.
49Li Jesus kixsumeheb' ut kixye:
—K'a'ut naq nikineesik'? Ma ink'a' nekenaw naq tento tinwanq sa' rochoch linYuwa'?
50A'ut eb' a'an ink'a' ke'xtaw ru li kixye reheb'.
51Toja' naq kisutq'iik wi' chik Nazaret rochb'eeneb', ut napaab'ank chiruheb'. Li xna' naxk'uula chi us sa' xch'ool chixjunil a'in. 52Ut li Jesus yo chi k'iik rik'in xna'leb' ut rik'in xteram, sa' chaab'ilal chiru Yos ut chiruheb' li winq.
Currently Selected:
Lk 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.