Jos 2
2
Lix Rajab kixtenq'aheb' laj k'ehol eetal aran Jerikó
1Laj Josué, ralal laj Nun, toj Sitín kixtaqla chaq chi muqmu wiib' laj k'ehol eetal, ut kixye reheb': “Ayuqex ut k'ehomaq reetal li na'ajej ut li tenamit Jerikó”, chan. Eb' a'an koheb' ut koxe'okaq sa' rochoch jun aj yumb'eet, xRajab#2,1 Heb 11,31; Stg 2,25. xk'ab'a', ut aran ke'wark.
2Kiwulak resil rik'in li awab'ej re Jerikó: “K'e reetal, wankeb' winq aj Israel xe'ok chaq arin chi q'eq re xk'eeb'al reetal li tenamit”, chu'uxk re. 3Toja' naq li awab'ej re Jerikó kixtaqla xyeeb'al re lix Rajab: “Isiheb' chaq li winq li xe'ok aawik'in, sa' laawochoch, xb'aan naq xe'chalk chi xk'eeb'al reetal chixjunil li tenamit”, chan re.
4Ab'anan li ixq koxmuqeb' chaq li wiib' chi winq ut kixye:
—Yaal ajwi' naq xe'k'ulunk sa' li wochoch, ab'an moko ninnaw ta aj b'areb'. 5Ut naq x'ewuuk, kach'in chik maa natz'apmank li rokeb'aal li tenamit, eb' li winq a'an xe'elk ut ink'a' ninnaw b'ar xkoheb'. Ayuqex chirixeb' sa' junpaat ut toxeetaweb', chan.
6A'ut lix Rajab ak kixtaqlaheb' li wiib' chi winq sa' xb'een li kab'l ut kixmuqeb' chaq sa' xyanqeb' xjoob'il xnoq'el li liin li tub'tu aran re chaqik.
7Wankeb' winq ke'elk chi xsik'b'aleb' sa' xb'ehel li nima' Jordán b'arwi' ink'a' cham li ha' ut, ka'ajwi' ke'elk, kitz'apmank li rokeb'aal li tenamit. 8Naq eb' laj k'ehol eetal maji' neke'yoklaak, kitaqe'k lix Rajab wankeb' wi', sa' xb'een li kab'l, 9ut kixye reheb':
—Ak ninnaw naq li Qaawa' xq'axtesi eere li tenamit. Laa'o xiw xiw wanko ut chixjunileb' li wankeb' sa' li na'ajej a'in neke'siksotk cheru. 10Xqab'i resil naq kex'elk chaq Ejiipt ut li Qaawa' kixchaqihob'resi li Kaqi Palaw cheru.#2,10 Ex 14,21. Naqanaw ajwi' naq kesach ruheb' chi junajwa laj Sijón ut laj Og,#2,10 Nm 21,21-35. eb' li wiib' chi awab'ej aj Amor, junpak'al li nima' Jordán. 11K'ajo' naq kooxiwak chi rab'inkil a'an, ut chixjunileb' ke'ch'inank xch'ool cheru laa'ex, xb'aan naq li Qaawa' leeYos a'an li xYos chixjunil li choxach'och'. 12Jo'kan utan, yehomaq we anaqwan sa' jurament sa' xk'ab'a' li Qaawa' naq teeb'aanu usilal re linjunkab'al, jo' naq laa'in xinb'aanu usilal eere. K'ehomaq we junaq eetalil li tinnaw wi' 13naq relik chi yaal teekanab' chi yo'yo linna' linyuwa', eb' li was wiitz'in jo'wi' chixjunil li xkomoneb', ut tooheekol chiru li raaxiik' chalk re sa' qab'een, chan lix Rajab.
14Ke'chaq'ok eb' li winq ut ke'xye: “Wi ink'a' taaye resil li k'aru yooko xb'aanunkil, tqakol rix leeyu'am jo' naq laa'ex xekol rix li qayu'am laa'o. Ut naq li Qaawa' ak xq'axtesi li qana'aj, laa'o tqab'aanu usilal aawe ut toowanq sa' tiikilal aawik'in”, chankeb'.
15Toja' naq li ixq kixkub'siheb' sa' li b'entaan rik'in jun nimla k'aam, xb'aan naq letzlo li rochoch lix Rajab chiru li tz'ak sutsu wi' li tenamit. 16Ut kixye reheb':
—Ayuqex wankeb' wi' li tzuul, re naq ink'a' texxtaweb' laj sik'ol eere. Wanqex aran chi muqmu chiru oxib' kutan toj reetal te'sutq'iiq chaq laj sik'onel. Chirix chik a'an naru texxik laa'ex, chan lix Rajab.
17Ke'chaq'ok eb' li winq ut ke'xye re:
—Laa'o tqab'aanu li k'aru xqaye sa' jurament, jo' xatz'aama chiqu. 18Ab'anan naq too'ok sa' li tenamit, tento taab'ak' li kaqinoq' a'in sa' li b'entaan xoohaakub'si wi'. Taach'utub'eb' aawik'in sa' laawochoch laana' laayuwa', eb' laawas aawiitz'in ut chixjunileb' li wankeb' sa' rochoch laayuwa'. 19Wi junaq taa'elq sa' laawochoch, a'an wank xmaak wi taakamq; maak'a' chik qamaak laa'o. Ab'an wi junaq reheb' li wankeb' sa' laawochoch natoch'e'k xb'aan anihaq, chikanaaq sa' qab'een li xkamik. 20Ut wi laa'at toohaajit, ink'a' chik tqab'aanu li xqaye sa' li jurament li xatitz' qe, chankeb'.
21—Us, chi'uxq jo' leeraatin, chan lix Rajab.
Toja' naq kixchaq'rab'iheb', ut eb' a'an koheb'. Chirix chik a'an li ixq kixb'ak' li kaqinoq' sa' li b'entaan.
22Eb' li winq koheb' sa' xyanqeb' li tzuul ut ke'kanaak aran toj reetal ke'sutq'iik chaq laj sik'ol reheb': us ta ke'xyal xq'e chi xsik'b'aleb' yalaq b'ar sa' li b'e, ab'anan ink'a' ke'xtaweb'. 23Toja' naq eb' li wiib' chi winq ke'kub'e chaq, ke'xq'ax li nima' Jordán ut koheb' rik'in laj Josué, ralal laj Nun. Ke'xseeraq'i chixjunil li kik'ulmank; 24chirix chik a'an ke'xye re:
—Yaal naq li Qaawa' ak xk'e sa' quq' chixjunil li tenamit a'an. Chixjunileb' neke'siksotk chiqu, chankeb'.
Currently Selected:
Jos 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.