Jn 21
21
Li Jesus kixk'ut rib' chire li palaw
1Chirix chik a'an, li Jesus kixk'ut wi' chik rib' chiruheb' li xtzolom chire li palaw wank Tiberias. Jo'ka'in naq kixk'ut rib': 2Ch'utch'uukeb' laj Simón Pedro, laj Tomás, a' li Lut nayeemank re, laj Natanael, a' laj Kanahán re Galilea, eb' li ralal laj Sebedeo ut wiib'eb' chik xtzolom li Jesus, 3naq laj Simón Pedro kixye reheb':
—Xik we chi karab'k.
Ke'chaq'ok eb' a'an:
—Xikaqo ajwi' laa'o chawix, chankeb'.
Koheb' ut ke'taqe'k sa' li jukub', ab'anan maak'a' ke'xchap chiru li q'oqyink a'an. 4Naq ak xsaqewk, koxxaqliiq li Jesus chire li ha', ab'an eb' li xtzolom ink'a' neke'xnaw naq a'an li Jesus. 5Kixye li Jesus reheb':
—Ex inkok'al, ma maak'a' kach'inaq tzekemq eerik'in?
Ke'chaq'ok eb' a'an ut ke'xye:
—Maak'a'.
6Ut a'an kixye reheb':
—Kutomaq leeyooy chi xk'atq li jukub', sa' leenim, ut teetaw.
Ke'xkut, ut ink'a' chik neke'xkuy xkelonkil chaq xb'aan xk'ihal li kar. 7Toja' naq li xtzolom li Jesus, li q'axal raaro xb'aan, kixye re laj Pedro:
—A'an li Qaawa'!
Naq kirab'i naq a'an li Qaawa', laj Simón Pedro kixk'e li raq' chirix, xb'aan naq t'ust'u, ut kixkut rib' sa' li palaw. 8Eb' li rech tzolonelil ke'chalk sa' li jukub', yookeb' chaq chi xkelonkil li yooy nujenaq chi kar, xb'aan naq ink'a' najt wankeb' rik'in li ch'och', yal oxk'aal moqoj tana. 9Naq ke'wulak chi ch'och'el, ke'ril li ru xam wank aran, jun kar wank sa' xb'een rochb'een xwahil. 10Kixye li Jesus reheb':
—K'amomaq chaq kach'inaq li kar li toja' xechap chaq.
11Kitaqe'k laj Simón Pedro sa' li jukub' ut kixkelo chaq li yooy chi ch'och'el, nujenaq chi ninqi kar: oxlaju xwaqxaqk'aaleb' (153). Ab'anan, us ta naab'aleb', ink'a' kit'upe'k li yooy.
12—Kimqex ut wa'inqex, chan li Jesus reheb'.
Ab'an maajun reheb' li xtzolom kikawuuk xch'ool chi xpatz'b'al re: «Anihat laa'at?». Ak neke'xnaw chi us naq a'an li Qaawa'. 13Kichalk li Jesus, kixchap li wa ut kixk'e reheb'; jo'kan ajwi' kixb'aanu rik'in li kar.
14A'in ak rox sut chi xk'utb'al rib' li Jesus chiruheb' li xtzolom, chirix li xwaklijik chi yo'yo sa' xyanqeb' li kamenaq.
Chab'eresiheb' linkarneer
15Naq ak xe'wa'ak, kixye li Jesus re laj Simón Pedro:
—At Simón, ralalat laj Jwan, ma q'axal nikinaara chiruheb' a'in?
Kixye a'an:
—Hehe', Qaawa'. Laa'at nakanaw naq nakatinra.
Kixye li Jesus re:
—Chach'oolaniheb' linkok' karneer.
16Kixpatz' wi' chik re xka' sut:
—At Simón, ralalat laj Jwan, ma nikinaara?
Kichaq'ok a'an:
—Hehe', Qaawa'. Laa'at nakanaw naq nakatinra, chan.
Kixye li Jesus re:
—Chab'eresiheb' linkarneer.
17Kixpatz' wi' chik re rox sut:
—At Simón, ralalat laj Jwan, ma nikinaara?
Kiraho'k xch'ool laj Pedro naq ox sut kipatz'e'k re: «Ma nikinaara?». Ut kichaq'ok:
—Qaawa', laa'at nakanaw chixjunil. Laa'at xak'e reetal naq nakatinra, chan.
Kixye li Jesus re:
—Chach'oolaniheb' linkarneer.#21,17 Li Jesus kixq'axtesi re laj Pedro li k'anjel re rilb'aleb' li kok' karneer ut eb' li karneer; naraj naxye naq li xtenamit li Yos q'axtesinb'il sa' ruq' laj Pedro xb'aan naq a'an kixra li Jesus, us ta ox sut kixye naq ink'a' naxnaw ru. Cf. Jn 18,17.25.27. 18Relik chi yaal ninye aawe: naq toj saajat chaq, nakab'ak' aasa' aajunes ut nakatb'eek b'ar nakawaj xik. Ab'an naq tattixq, taaye' laawuq' ut jalan chik taab'ak'oq aasa' ut tatxk'am b'arwi' ink'a' taawaj xik.
19Rik'in a'in kixye xyaalal chanru naq taakamsiiq re xnimankil xloq'al li Yos.#21,19 Relik chi yaal naq laj Pedro kixhoy xkik'el sa' xk'ab'a' li Jesus, ut chi jo'kan kixnima xloq'al li Yos. Ut naq ak xye a'in, li Jesus kixye re:
—Taaqehin.
20Kixsutq'isi rib' laj Pedro ut kiril naq yo xtaaqenkil xb'aan li xtzolom li Jesus raaro xb'aan, a' li kix'anab' rib' chire xch'ool sa' li wa'ak ewu naq kixpatz' re: “Qaawa', ani li taaq'axtesinq aawe?”. 21Naq laj Pedro kiril li rech tzolonelil, kixye re li Jesus:
—Qaawa', ut a'in k'aru taakanaaq wi'?
22Kiyehe'k re xb'aan li Jesus:
—Wi twaj naq a'in taakanaaq toj reetal tolin'elq,#21,22 Toj sa' li xnimal xk'ulunik li Qaawa' Jesus. k'a' taawaj re? Taaqehin laa'at.
23Jo'kan naq kisutunk resil sa' xyanqeb' laj paab'anel naq ink'a' taakamq li tzolom a'an. Ab'an li Jesus moko kixye ta re laj Pedro naq ink'a' taakamq, kixye b'an: “Wi twaj naq a'in taakanaaq toj reetal tolin'elq, k'a' taawaj re?”.
Xraqik li Hu
24A'an a'in li tzolom li ki'aatinak chirix chixjunil a'in, ut kixtz'iib'a ajwi'. Ut laa'o naqanaw naq tz'aqal yaal li xch'olob'ahom.
25Toj wank naab'al chik kilajxb'aanu li Jesus. Wi ta te'tz'iib'amanq chi xjunjunqaleb', nink'oxla naq chixjunil li ruuchich'och' moko taatz'aqloq ta cho'q xna'ajeb' li hu te'tz'iib'amanq.
Currently Selected:
Jn 21: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.