Jn 18
18
Kichape'k li Jesus
(Mt 26,47-56; Mk 14,43-50; Lk 22,47-53)
1Naq kiraqe'k chi xyeeb'al a'in, li Jesus kiq'axonk rochb'eeneb' li xtzolom junpak'al li ha' Sedrón xk'ab'a', b'arwi' wank jun siir li awimq; ut aran kox'okaq rochb'eeneb' li xtzolom. 2Ab'anan laj Judas, li ok re chi xq'axtesinkil li Jesus, naxnaw ajwi' li na'ajej a'an, xb'aan naq naab'al sut ke'xch'utub' chaq rib'eb' aran li Jesus ut eb' li xtzolom.
3Kiwulak laj Judas aran rochb'eeneb' jun teepeb' aj puub' ut rochb'eeneb' laj k'aak'alenel taqlanb'ileb' chaq xb'aaneb' li xb'eenil aj tij ut xb'aaneb' laj Pariseey. Wankatqeb' chaq xxam sa' ruq'eb' ut sa' ru'ujatq che', ut wankeb' ajwi' xch'iich'eb'. 4Li Jesus naxnaw chixjunil li ok re chi xk'ulb'al; jo'kan naq kiwulak rik'ineb' ut kixye:
—Ani nekesik'?
5Ke'xsume:
—A' li Jesus aj Nazaret, chankeb'.
Kixye reheb':
—Laa'inin.
Wank ajwi' laj Judas sa' xyanqeb', a' li taaq'axtesinq re li Jesus. 6Naq li Jesus kixye reheb': “Laa'inin”, ke'q'ajk chirixeb' ut ke't'ane'k sa' ch'och'. 7Kixpatz' wi' chik reheb':
—Ani nekesik'?
—A' li Jesus aj Nazaret, chankeb' a'an.
8Kichaq'ok li Jesus ut kixye:
—Ak xinye eere naq laa'inin; jo'kan wi laa'in nikineesik', kanab'omaqeb' a'in chi xik.
9A'in kik'ulmank re naq chitz'aqloq ru li aatin yeeb'il chaq xb'aan: “Maajun reheb' li xak'e we, xsachk chiwu”.#18,9 Jn 6,39; 10,28-29; 17,12. 10Toja' naq laj Simón Pedro li wank xch'iich', kirisi ut kixtiq' li xmoos li xyuwa'il aj tij: kixch'ot li xxik wank sa' xnim. Li moosej a'an aj Malko xk'ab'a'. 11Kixye ut li Jesus re laj Pedro:
—K'e wi' chik laach'iich' sa' xna'aj. Ma ink'a' tab'i' tento twuk' li xsa' li sek' xk'e we linYuwa'?#18,11 Mt 26,39; Mk 14,36; Lk 22,42; Jn 12,27.
Li Jesus kixaqab'aak chiru laj Anás ut laj Kaifás
(Mt 26,57-58; Mk 14,53-54; Lk 22,54)
12Toja' naq eb' laj puub' rochb'eeneb' li najolomink reheb' ut eb' laj k'aak'alenel taqlanb'ileb' xb'aaneb' laj Judiiy ke'xchap li Jesus, ke'xb'ak' 13ut ke'xk'am xb'enwa rik'in laj Anás xb'aan naq a'an xyuwa' li rixaqil laj Kaifás, a' li xyuwa'il aj tij sa' li chihab' a'an. 14Laj Kaifás a'an li kitakchi'ink reheb' laj Judiiy: “Us naq taakamq jun ajwi' chi winq sa' xk'ab'a' li tenamit”, chan.
Laj Pedro kixye naq ink'a' naxnaw ru li Jesus
(Mt 26,69-75; Mk 14,66-72; Lk 22,55-62)
15Laj Simón Pedro kixtaaqe li Jesus rochb'een jun rech tzolonelil.#18,15 A'an li apóstol San Jwan. Nawb'il ru li tzolom a'an xb'aan li xyuwa'il aj tij, jo'kan naq ki'ok rochb'een li Jesus chi neb'aal, sa' rochoch li xyuwa'il aj tij; 16ut laj Pedro kikanaak chirix kab'l, chi xk'atq li okeb'aal. Toja' naq ki'elk chaq li tzolom jun chik, a' li nawb'il ru xb'aan li xyuwa'il aj tij, ki'aatinak rik'in li ixq aj ilol okeb'aal, ut kiroksi laj Pedro. 17Li ixq aj ilol okeb'aal kixpatz' re laj Pedro:
—Ma ink'a' tab'i' laa'at jun reheb' li xtzolom li winq a'an? chan.
Kixye a'an:
—Moko laa'in ta.
18Eb' li moosej ut eb' laj k'aak'alenel ke'xtz'ab' xxameb' xb'aan li ke ut yookeb' chi q'ixink. Wank ajwi' laj Pedro sa' xyanqeb', yo chi q'ixink.
19Li xyuwa'il aj tij kixpatz' re li Jesus chirixeb' li xtzolom jo' ajwi' chirix li k'aru naxtzoleb' wi'. 20Kichaq'ok li Jesus ut kixye reheb':
—Laa'in xin'aatinak chi kutankil chiruheb' li tenamit; junelik xeb'intzol sa' li ch'utleb'aal kab'l ut sa' rochoch li Yos, b'arwi' neke'ch'utlaak chixjunileb' laj Judiiy, ut maak'a' xinye chi muqmu. 21K'a'ut naq nakatpatz'ok we? Patz'on reheb' li xe'ab'ink re li xinye reheb'. A'aneb' neke'xnaw k'aru xinye.
22Ka'ajwi' kixye a'in, jun reheb' laj k'aak'alenel li wank aran, kixtz'aj chi ruq' li Jesus:
—Ma jo'ka'in naq nakasume li xyuwa'il aj tij? chan.
23Kichaq'ok li Jesus ut kixye re:
—Wi ink'a' us xinye, ch'olob' k'aru li ink'a' us; ab'anan wi us li xinye, k'a'ut naq nikinaasak'?
24Toja' naq laj Anás kixtaqla li Jesus chi b'ak'b'o rik'in laj Kaifás, li xyuwa'il aj tij.
25Xaqxo aran laj Simón Pedro chi q'ixink:
—Ma ink'a' tab'i' laa'at jun reheb' li xtzolom? chu'uxk re.
Ut a'an kitik'ti'ik ut kixye:
—Moko laa'in ta.
26Jun reheb' li xmoos li xyuwa'il aj tij, rech'alal li kich'ote'k xxik xb'aan laj Pedro, kixye:
—Ma ink'a' tab'i' xatwil chaq sa' li awimq aawochb'een a'an?
27Kitik'ti'ik wi' chik laj Pedro ut kixye naq ink'a'. Tikto kiyaab'ak jun li tzo' kaxlan.
Li Jesus chiru laj Pilaat
(Mt 27,1-2, 11-14; Mk 15,1-5; Lk 23,1-5)
28Naq kisaqewk, ke'risi li Jesus sa' rochoch laj Kaifás ut ke'xk'am sa' li raqleb'aal aatin. Eb' laj Judiiy ink'a' ke'ok sa' li raqleb'aal aatin re naq ink'a' te'xtz'ajni rib'eb':#18,28 Chixjunileb' li rochocheb' li jalan chik xpaab'aaleb' tz'ajn ruheb' cho'q reheb' laj Judiiy. a' ke'raj xtzekankil li Paswa. 29Jo'kan naq ki'elk chaq laj Pilaat chirix kab'l wankeb' wi' eb' a'an ut kixye:
—K'aru nekejit wi' li winq a'in?
30Ke'chaq'ok eb' a'an:
—Wi ta maak'a' xmaak, ink'a' raj xqaq'axtesi sa' laawuq', chankeb' re.
31Toja' naq laj Pilaat kixye reheb':
—K'amomaq laa'ex ut raqomaq aatin sa' xb'een jo' naxye leechaq'rab'.
Ke'chaq'ok eb' laj Judiiy ut ke'xye re:
—Laa'o maajun naru naqakamsi.
32A'an kik'ulmank re naq chitz'aqloq ru li yeeb'il chaq xb'aan li Jesus, naq kixch'olob' chanru naq taakamq. 33Ki'ok wi' chik laj Pilaat sa' li raqleb'aal aatin ut kixb'oq li Jesus:
—Ma laa'at li xreyeb' laj Judiiy? chan re.
34Kichaq'ok li Jesus:
—Ma yal sa' aach'ool xchalk li xaye malaj jalan xyehok aawe chiwix?
35Kisumeek xb'aan laj Pilaat:
—Ma laa'in tab'i' aj Judiiy? Laatenamit ut eb' li xb'eenil aj tij xe'q'axtesink aawe sa' wuq'. K'aru xab'aanu?
36Kichaq'ok li Jesus ut kixye:
—Lin'awab'ejihom maawa' re li ruuchich'och' a'in. Wi ta re li ruuchich'och' a'in lin'awab'ejihom, xe'yalok raj eb' laj k'anjel chiwu re naq ink'a' xinq'axtesiik sa' ruq'eb' laj Judiiy; ab'anan lin'awab'ejihom moko aj arin ta.
37Toja' naq laj Pilaat kixye re:
—Ma laa'at rey chi jo'kanan?
Kichaq'ok li Jesus ut kixye:
—Laa'at nakaye naq laa'in rey. A'in aj e naq kinyo'laak ut a'in aj e naq kinchalk sa' li ruuchich'och': re tin'aatinaq chirix li yaal. Chixjunil li na'okenk chirix li yaal, narab'i li xyaab' inkux.
38Laj Pilaat kixye re:
—K'aru li yaal?
Ut naq kixye a'in, ki'elk wi' chik chirix kab'l wankeb' wi' laj Judiiy ut kixye reheb':
—Laa'in maajun xmaak nintaw. 39Ab'anan k'aynaqex laa'ex naq nawach'ab' eere junaq preex sa' li Paswa. Ma teeraj twach'ab' eere li xreyeb' laj Judiiy?
40Toja' naq ke'xjap wi' chik reheb':
—A'an ink'a'; a'aq b'an laj Barrabás, chankeb'.
Ut laj Barrabás a'an jun xnimal aj elq'.
Currently Selected:
Jn 18: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.