Jn 15
15
Li tz'aqal xtoonal li uub'
1“Laa'in li tz'aqal xtoonal li uub' ut linYuwa' a'an laj saab'esinel. 2Chixjunil li ruq' li ink'a' na'uuchink wik'in, narisi; ut chixjunil li na'uuchink, naxsaab'esi ru re naq numtajenaq chik taaruuchin. 3Laa'ex ak saab'esinb'ilex xb'aan li aatin xinye eere. 4Kanaaqex wik'in, ut laa'in tinkanaaq eerik'in. Jo' li ruq' che' ink'a' naru na'uuchink xjunes rib' wi ink'a' xtz'ejwalihom rib' rik'in li xtoonal, jo'kan ajwi' laa'ex wi ink'a' nekexkanaak wik'in.
5“Laa'in li xtoonal li uub'; laa'ex li ruq'. Ani nakanaak wik'in ut laa'in rik'in, a'an q'axal na'uuchink, xb'aan naq wi jachjooqex wik'in maak'a' naru teeb'aanu. 6Ani ink'a' nakanaak wik'in taa'isiiq jo' li ruq' che', ut taachaqiq. Ut te'xxok, te'xkut sa' xam ut taak'atmanq.
7“Wi nekexkanaak wik'in ut eb' li waatin neke'kanaak eerik'in, tz'aamahomaq li teeraj ut taak'eemanq eere. 8Rik'in a'in naxk'ul xloq'al linYuwa', naq q'axal chi'uuchinq leepaab'aal ut laa'exaq tz'aqal intzolom. 9Jo' naq xinxra li Yuwa'b'ej, jo'kan ajwi' naq xexinra laa'in. Kanaaqex sa' linrahom. 10Wi nekepaab' linchaq'rab', texkanaaq sa' linrahom jo' naq laa'in xinpaab' xchaq'rab' linYuwa' ut ninkanaak sa' li xrahom.
11“Xinye a'in eere re naq li xsahilal inch'ool chiwanq eerik'in ut li xsahilal eech'ool tz'aqalaq re ru. 12A'an a'in linchaq'rab', naq chera eerib' cherib'il eerib' jo' naq xexinra laa'in. 13Maa'ani q'axal narahok jo' li naxq'axtesi li xyu'am sa' xk'ab'a'eb' li ramiiw. 14Laa'ex li wamiiw wi nekeb'aanu li nekexintaqla wi'. 15Ink'a' chik ninye moosej eere xb'aan naq li moosej ink'a' naxnaw li naxb'aanu laj eechal re; wamiiw b'an chik ninye eere xb'aan naq chixjunil li xwab'i chaq rik'in linYuwa', xlajink'ut cheru.
16“Moko laa'ex ta xexsik'ok wu; laa'in b'an xinsik'ok eeru ut xexinxaqab' re texxik ut chi'uuchinq leepaab'aal, ut li taaruuchin leepaab'aal wanq chi junelik. Chi jo'kan chixjunil li teetz'aama chiru li Yuwa'b'ej sa' ink'ab'a', taak'eemanq eere. 17A'an a'in li nekexinchaq'rab'i wi', naq chera eerib' cherib'il eerib'.
Eb' li xtzolom li Jesus ut li ruuchich'och'
18“Wi xik' nekexril li ruuchich'och', chenawaq naq laa'in xb'enwa xik' xinril cheru laa'ex. 19Wi ta rehex li ruuchich'och', texxra raj li ruuchich'och' jo' naq naxra li re. Ab'anan moko rehex ta li ruuchich'och', laa'in b'an xinsik'ok eeru ut xexwisi chisa': jo'kan naq xik' nekexril li ruuchich'och'. 20Jultikaq eere li aatin xinye eere: «Laj k'anjel moko nim ta xwankil chiru laj eechal re». Wi xine'xrahob'tesi laa'in, jo'kan ajwi' naq texb'aanu eere; wi xe'xk'e xch'ool chirix li waatin, jo'kan ajwi' naq te'xk'e xch'ool chirix leeraatin laa'ex. 21Chixjunil a'in te'xb'aanu eere inb'aan laa'in, xb'aan naq ink'a' neke'xnaw ru li kitaqlank chaq we.
22“Wi ta ink'a' xink'ulunk ut ink'a' ta xwaatinaheb', maak'a'eb' raj xmaak; a'ut anaqwan maak'a' k'aru te'xkol wi' rib' sa' li xmaakeb'. 23Ani xik' na'ilok we, xik' ajwi' naril linYuwa'. 24Wi ta ink'a' xinb'aanu li xninqal ru b'aanuhom sa' xyanqeb' li maa'ani chik kib'aanunk re, maak'a' raj xmaakeb'; a'ut anaqwan xe'ril ut xik' nikine'ril laa'in ut linYuwa'. 25Jo'ka'in xk'ulmank re naq chitz'aqloq ru li aatin tz'iib'anb'il sa' li xChaq'rab'eb' a'an: «Xik' xine'ril chi maak'a' inmaak».#15,25 Sal 35,19; 69,5.
26“Naq taachalq laj K'ojob'anel ch'ool li toxintaqla chaq, a' li Musiq'ej re li yaal li nachalk rik'in li Yuwa'b'ej, a'an taa'aatinaq chiwix. 27Ut laa'ex ajwi' teeye li yaal chiwix, xb'aan naq wankex wik'in chalen chaq sa' xtiklajik.
Currently Selected:
Jn 15: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.