Jr 52
52
X'awab'ejihom laj Sedesías
(2 R 24,18-20; 2 Kr 36,11-16)
1Jun xka'k'aal chihab' wank re laj Sedesías naq ki'ok chi awab'ejink, ut junlaju chihab' ki'awab'ejink sa' li tenamit Jerusalén. xJamital xk'ab'a' li xna', xrab'in laj Jeremías, aj Libná. 2Laj Sedesías kixb'aanu li ink'a' nawulak chiru li Qaawa', jo' ajwi' tz'aqal li kixb'aanu laj Johakín. 3Jo'kan naq li Qaawa' kijosq'o'k rik'ineb' laj Jerusalén ut eb' laj Judá, ut ink'a' chik kiraj rilb'aleb' ru.
Roso'jik Jerusalén
(2 R 24,20—25,7; Jr 39,1-7)
Laj Sedesías kixq'etq'eti rib' chiru li awab'ej re Babilonia. 4Ak b'eleeb' chihab' chik rokik chi awab'ejink laj Sedesías, sa' li lajeeb' xb'e li xlaje po re li chihab' a'an, naq kichalk laj Nabukodonosor, li awab'ej re Babilonia, rochb'een chaq chixjunileb' laj puub', chi yalok rik'in Jerusalén.#52,4 Ez 24,2. Ke'xk'ojob' li xmuheb'aaleb' ut ke'xsut rix li tenamit rik'in k'iila taqleb'aal re te'ok chisa'. 5Kisutsuuk Jerusalén toj kiwulak junlaju chihab' chi awab'ejink laj Sedesías. 6Sa' li b'eleeb' xb'e li xka po re li chihab' a'an kinumtaak li we'ej sa' li tenamit ut tik maak'a' chik wa cho'q reheb' li poyanam. 7Toja' naq ke'xhop li suttz'ak#52,7 Ez 33,21. ut, us ta sutsu chi us li tenamit xb'aaneb' laj Kaldeha, ki'elelik li awab'ej chiru li q'oqyink rochb'een chixjunileb' laj puub'. Ke'elk sa' xyanqeb' li xsuttz'akil li tenamit, koheb' sa' li xna'aj rawimq li awab'ej ut ke'xchap xb'e re xik Arabá. 8Tikto eb' laj puub' aj Kaldeha ke'xchap raanil chirix laj Sedesías, li awab'ej, ut koxe'xtaw sa' xtaq'ahil Jerikó. Toja' naq chixjunileb' li xsoldaad ke'elelik chiru. 9Eb' laj Kaldeha ke'xchap li awab'ej ut ke'xk'am Riblá, sa' xteepal Jamat, b'arwi' wank li awab'ej re Babilonia, ut kiraqmank aatin sa' xb'een laj Sedesías. 10Aran Riblá, chiru ajwi' laj Sedesías, ke'kamsiik chi ch'iich' chixjunileb' li ralal jo' ajwi' chixjunileb' li xjolomileb' laj Judá. 11Li awab'ej re Judá ki'isiik xsa'eb' li ru, kib'ak'e'k rik'in kareen ut kik'ame'k xb'aan laj Nabukodonosor toj Babilonia,#52,4-11 Ez 12,8-13; 17,18-20. b'arwi' kiwank sa' tz'alam toj sa' xq'ehil li xkamik.
Xjuk'iik li rochoch li Qaawa'
(2 R 25,8-21; 2 Kr 36,17-21; Jr 39,8-10)
12Sa' li lajeeb' xb'e li ro' po re li xb'eleelaju chihab' rokik laj Nabukodonosor chi awab'ejink sa' xb'een Babilonia, laj Nabusaradán, aj k'anjel chiru li awab'ej ut xjolomileb' laj k'aak'alenel, kiwulak Jerusalén. 13Kixk'at li rochoch li Qaawa',#52,13 1 R 9,8. li rochoch li awab'ej ut chixjunileb' li ochoch wankeb' Jerusalén. 14Eb' laj puub' aj Kaldeha, li ke'chalk chirix laj Nabusaradán, ke'xjuk' chixjunileb' li xsuttz'akil li tenamit Jerusalén. 15Chirix chik a'an laj Nabusaradán kixk'ameb' chi preexil aran Babilonia eb' laj pak'onel ut eb' li poyanam li ke'kanaak sa' li na'ajej, jo' ajwi' li ke'xq'axtesi rib' rub'el xwankil laj Nabukodonosor. 16Ab'anan eb' li jwal neb'a'eb' ke'kanab'aak sa' xteepal Judá, re naq te'awoq uub' ut te'k'ale'q sa'eb' li k'aleb'aal.#52,15-16 Ez 12,14-16; 17,21.
17Eb' laj Kaldeha ke'xjuk'eb' li roqechal li rochoch li Qaawa' yiib'anb'ileb' rik'in q'anch'iich', eb' li k'ochleb'aal ut li nimla xna'aj li ha' li wank sa' rochoch li Yos, ut ke'xk'am chixjunil li q'anch'iich' toj Babilonia. 18Ke'xxok ajwi' eb' li xna'aj li cha, li lekleb', li ch'iich', li waal, li xokleb' ut chixjunil li k'a'aq re ru yiib'anb'il rik'in q'anch'iich' li nak'anjelak sa' li loq'onink. 19Li xjolomileb' laj puub' kixxok ajwi' eb' li sek', li xanxaar, li k'anjelob'aal re kirkisink, li xna'aj li cha, eb' li xna'aj kanteel, eb' li lekleb', eb' li pulaat ut chixjunil li k'a'aq re ru yiib'anb'il rik'in oor ut plaat na'uxk wi' mayejak. 20Ink'a' kiruuk xb'isb'al li raalal li wiib' chi oqech, li nimla xna'aj li ha', eb' li kab'laju chi xjalam u eb' li b'ooyx yiib'anb'il rik'in q'anch'iich' li ke'wank rub'el li xna'aj li ha', jo' ajwi' eb' li k'ochleb'aal li kixk'e chi yiib'aak laj Salomón, li awab'ej, cho'q re li rochoch li Qaawa'; ink'a' kinawmank jo'k'ihal li raalal. 21Oob' moqoj xteram li xb'een oqech; numenaq oxib' moqoj li xnimal li xsa', mer k'utub' li xpimal ut hopook li xsa'. 22Naxkuy raalal jun xsahob' ru yiib'anb'il rik'in q'anch'iich', aj numenaq jun moqoj xteram, wank xkareen ut naab'al chi granaad chi xsutam: yiib'anb'il chixjunil rik'in q'anch'iich'. Jo'kan ajwi' li jun chik oqech. 23Waqlaju ro'k'aal chi granaad t'uyt'uukeb' chi junqre, ut o'k'aal chi granaad wankeb' chi xsutam eb' li xsahob' ru.#52,17-23 1 R 7,15-47.
Eb' laj Judá ke'k'ame'k chi preexil sa' najtil tenamit
24Li xjolomileb' laj puub' kixchap laj Seraías, li xb'eenil aj tij, ut laj Sofonías, li xkab'il, jo'wi' oxib'eb' chik li neke'ilok re li rokeb'aal li rochoch li Qaawa'. 25Kixchap ajwi' jun xjolomileb' laj puub' aj Israel, wuqub'eb' aj k'ehol xna'leb' li awab'ej li wankeb' sa' li tenamit sa' li kutan a'an, laj tz'iib' li natenq'ank re li xjolomileb' laj puub' chi xb'oqb'aleb' li poyanam chi yalok, ut oxk'aal xninqaleb' ru winq li ke'tawe'k sa' li tenamit Jerusalén. 26-27Laj Nabusaradán, li xjolomileb' laj k'aak'alenel, kixk'am chixjunileb' li poyanam a'in chiru li awab'ej re Babilonia, li toj wank aran Riblá, sa' xteepal Jamat. Ut aran laj Nabukodonosor kixk'eheb' chi kamsiik.
Chi jo'ka'in naq eb' laj Judá ke'isiik sa' li xtenamiteb'. 28A'an a'in xk'ihaleb' laj Judá li kixk'ameb' chi preexil laj Nabukodonosor sa' xwuq xchihab' chi awab'ejink: oxib' xkab'lajuk'aal xwaqxaq o'q'ob' (3,023) chi poyanam aj Judá; 29naq yo xwaqxaqlaju chihab' chi awab'ejink laj Nabukodonosor, kixk'am kab'laju xka'k'aal rox o'q'ob' (832) chi poyanam aj Jerusalén; 30naq yo roxka'k'aal chihab' chi awab'ejink laj Nabukodonosor, laj Nabusaradán, li xjolomileb' laj k'aak'alenel, kixk'am oob' xwaqxaqlajuk'aal xkab' o'q'ob' (745) chi poyanam aj Judá. Li xk'ihaleb' chixjunil a'an: kaahib' mil rik'in lajeek'aal xkab' o'q'ob' (4,600) chi poyanam li ke'isiik sa' li xna'ajeb'.
Laj Johakín ki'isiik sa' tz'alam ut kik'ehe'k xloq'al
(2 R 25,27-30)
31Waqlaju xka'k'aal chihab' xxikik chi preexil laj Johakín, awab'ej re Judá, sa' li wuqub' xka'k'aal xb'e li kab'laju po, laj Ebil-Merodak, awab'ej re Babilonia, kixtikib' awab'ejink ut kirusila ru Johakín, awab'ej re Judá, ut kirisi sa' tz'alam. 32Q'axal kixb'aanu usilal re ut kixk'e xwankil jwal nim wi' chik chiruheb' chixjunil li awab'ej wankeb' rochb'een aran Babilonia. 33Jo'ka'in naq laj Jekonías kiru risinkil li raq' li preexil chirix ut junelik kiwa'ak rochb'een li awab'ej chiru chixjunil li xyu'am. 34Kich'oolaniik ajwi' xb'aan li awab'ej re Babilonia rajlal kutan chiru chixjunil li xyu'am, toj sa' xkutankil li xkamik.
Currently Selected:
Jr 52: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.