Is 3
3
Raqb'a aatin sa' xb'een Jerusalén
1K'ehomaq reetal naq li Qaawa', li Nimajwal Yos,
tixkanab' Judá ut Jerusalén chi maak'a' chik wanq re,
ut taarisi chixjunil li xwaheb' ut ruk'a'eb'.
2Maak'a'aqeb' chik li kaweb' rib', eb' laj yalonel,
laj raqol aatin ut li propeet,
laj q'e ut li cheekel winq,
3li xjolomileb' laj puub' ut li ninqeb' xwankil,
laj k'ehol na'leb', li chaab'il chi q'ehink ut laj nawal.
4Texink'e chi jolomiik xb'aaneb' li saaj al,
ut eb' a'an te'taqlanq sa' eeb'een.
5Li junjunq taaraj numtaak sa' xb'een li ras riitz'in:
li saaj winq tixq'etq'eti rib' chiru li cheekel winq
ut laj k'anjel tixpleeti li xnimal ru winq.
6Taawulaq xkutankil naq junaq asb'ej tixsik' ru junaq riitz'in
sa' rochoch li xyuwa' ut tixye re:
“Laa'at wank aab'aatal: kanaaqat cho'q aj k'amol qab'e;
laa'at tat-isinq qe sa' li rahilal wanko wi'”, cha'aq re.
7Ab'anan li jun chik tixye sa' li kutan a'an:
“Ink'a' tinruuq eetenq'ankil.
Maak'a' tzekemq chi moko b'aatal sa' li wochoch,
jo'kan naq mineek'e chi xjolominkil li tenamit”, cha'aq.
8Relik chi yaal naq yo chi sache'k Jerusalén
ut juk'b'il chik Judá,
xb'aan naq ink'a' us li xyehom xb'aanuhomeb';
xik' neke'ril li Qaawa' ut xe'xchiq' xjosq'il li Yos.
9Chi xnaq' ruheb' nak'utunk li xmaa'usilaleb';
moko muqmu ta li xmaakeb',
chanchaneb' wi' laj Sodoom.
Toq'ob'eb' xaq ru,
xb'aan naq yookeb' chi xsik'b'al li xrahilaleb'!
10Us xaq re li tiik xch'ool
xb'aan naq tixyal xsahil li xchaab'il k'anjel.
11Ab'an toq'ob' ru li ink'a' us xna'leb',
xb'aan naq taaq'ajkamuuq jo' chanru li xyehom xb'aanuhom.
12Jun saaj al yo chi rahob'tesink re lintenamit,
ut ixqeb' li neke'numtaak sa' xb'een.
Ex intenamit, eb' laj k'amol eeb'e yookeb' cheb'alaq'inkil
ut chi xk'amb'al eeb'e chi xb'aanunkil li ink'a' us.
13Xwakli chaq li Qaawa',
ak xaqxo chi raqok aatin sa' xb'een li xtenamit.
14Li Qaawa' xchalk chi xb'oqb'aleb' sa' raqb'a aatin,#3,13-14 Mi 6,2.
ut tixye reheb' li cheekel winq ut eb' laj k'amol xb'e li xtenamit:
“Laa'ex xexsachok re li wawimq uub',#3,14 Is 5,1-7.
ut xnujak leerochoch rik'in li k'aru xerelq'a reheb' li neb'a'.
15Ab'anan k'aru leewankil naq yookex xrahob'tesinkil lintenamit
ut xtawasinkileb' li neb'a'?”,
chan li Qaawa', li Nimajwal Yos.
Eb' li ixq aj Jerusalén
16Li Qaawa' kixye ajwi' chi jo'ka'in:
“Eb' li ixq aj Sión q'axal neke'xk'e xwankil,
neke'xja'ab' rib' naq neke'b'eek;
jwal josq' josq' neke'ilok ut neke'xk'osatq li xyokb'
yal re xk'eeb'al chi eek'ank li xsahob' ru li roqeb'.
17Ab'an laa'in tinjo li rismal li xjolomeb' li rixqilaleb' Sión
ut xutaanal te'kanaaq”, chan li Qaawa'.
18Sa' li kutan a'an li Qaawa' trisi chixjunileb' li xsahob' ru eb' li ixq: li xsahob' ru li oqej, li kemb'il t'ikr, 19eb' li q'ol, li xsahob' ru eb' li xkux uq'ej ut eb' li neke'xlan wi' li xjolomeb', 20li ka'xik, li kareen neke'ruutz'u'uji wi' li roqeb', li xk'aamal xsa'eb', eb' li sununkil b'an ut li neke'xlukub' chi xkuxeb' re xkolb'aleb' rib' chiru li ink'a' us, 21eb' li matq'ab', eb' li xsahob' ru li ru'ujeb', 22li chaab'il aq'ej, li b'aatal, li nalanmank wi' li jolomej ut eb' li jelool, 23eb' li lem, li aq'ej terto xtz'aq, li xb'ak'b'al li rismal xjolomeb' ut eb' li xt'ikr.
24Sa' li kutan a'an cho'q reeqaj li sununkil b'an taawanq li chu;
cho'q reeqaj li k'aamal sa', a' chik li k'aam taak'eemanq;
cho'q reeqaj li te'ok ismal, job'il jolomej chik taawanq;
cho'q reeqaj li chaab'il b'aatal, a' chik li q'es ruhil t'ikr taawanq;
ut li ch'ina'usal taasutq'iiq cho'q xutaan.
25Eb' laapoyanamil te'oso'q chi q'esnal ch'iich'
ut eb' li kaweb' rib' te'kamq sa' li yalok.
26Junes yaab'ak ut tz'uyink taawanq chireheb' li okeb'aal,
ut aajunes aj chik laa'at tatk'ojlaaq sa' li pojtz'.#3,26 Jr 14,2; Lm 1,4.
Currently Selected:
Is 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.