Os 7
7
1“Naq nawaj raj xk'irtasinkil lintenamit
ut xkolb'aleb' li walal ink'ajol aj Israel,
nak'utunk li xmaakeb' laj Efraín
ut li xmaa'usilaleb' laj Samaria.
Xb'aan naq chixjunileb' neke'b'alaq'ik;
neke'okje'k sa'eb' li ochoch chi elq'ak
ut junch'oleb' chik li poyanam yookeb' chi elq'ak sa' b'e.
2Ink'a' neke'xk'oxla naq jultik we li xmaakeb'.
Ut anaqwan tz'aptz'ookeb' sa' li maak,
junelik wank chiwu li xmaa'usilaleb'.
3Rik'in li maa'usilal ut li b'alaq'ik neke'xb'aanu
neke'xsahob'resi xch'ooleb' li awab'ej ut li ninqeb' xwankil.
4Chixjunileb' a'an junes aj muxuleb' sumlaak;
chanchaneb' li tiqwal xam,
li ink'a' chik na'ajmank ru naq taak'ehe'q xkomon xxamlel
toj reetal taasipooq li kaxlanwa.
5Sa' xninq'e li awab'ej,
neke'yajerk li xninqaleb' ru winq xb'aan li num uk'ak;
neke'reetz'u eb' li poyanam,
ut li awab'ej naxb'aanu jo' neke'xb'aanu eb' a'an.
6Naq yookeb' chi xkawresinkil li maa'usilal,
li xch'ooleb' jo' tawi' xxamlel li nachiqe'k wi' li kaxlanwa:
chixjunil li q'oqyink ch'anch'ookeb',
ab'an naq nasaqewk, k'ajo' naq neke'xamnak!
7Chixjunileb' nachalk xjosq'ileb' jo' li tiqwal xam,
ut neke'xkamsi li xjolomileb'.
Kamenaqeb' chik chixjunileb' li x'awab'ejeb',
ab'anan maajun naxyaab'a link'ab'a'.
Eb' laj Israel neke'xsik' li xtenq'ankileb' yalaq b'ar
8“Eb' laj Efraín xe'xjunaji rib' rik'ineb' laj ab'l tenamit,
chanchaneb' li wa junpak'al ajwi' xchaq'ak.
9Jalaneb' xtenamit yookeb' chi tawasink reheb'
chi ink'a' neke'xk'e reetal a'an.
K'ajo' naq xe'saqo'k li rismaleb' xjolom
chi ink'a' neke'xnaw!
10Li xq'etq'etileb' laj Israel yo chi numtaak sa' xb'eeneb',
ab'an ink'a' neke'raj sutq'iik rik'in li Qaawa'.
Us ta q'axal ra xe'xk'ul,
ab'anan ink'a' neke'xsik' li Qaawa' li xYoseb'.
11Laj Efraín jo' jun li mukuy maak'a' xna'leb',
ink'a' naxnaw k'oxlak:
naxpatz' xtenq'ankil re Ejiipt
ut naxik rik'ineb' laj Asiria.
12A' yaal li b'ar te'xikje'q,
laa'in tinhel linra'leb'aal sa' xb'eeneb',
teb'inchap jo'eb' li xik'anel xul
ut tinrahob'tesiheb' xb'aan li maa'usilal xe'xb'aanu.
Ra chaalel sa' xb'eeneb' laj Israel
13“Ra chaalel sa' xb'eeneb' li xe'kanab'ank we.
Tz'eqtaananb'ilaqeb' xb'aan naq xe'xjipi rib' chiwu.
Laa'in teb'inkol raj,
a'ut eb' a'an tik'ti' chik neke'xye chiwix.
14Moko anchaleb' ta xch'ool naq neke'tz'aamank chiwu
naq yookeb' chi tz'uyink chiru li xch'aateb'.
Yal re xtz'aamankil li triiw ut li b'iin
naq neke'xlet'exi li xtib'eleb'.#7,14 Dt 14,1; 1 R 18,28.
Chi jo'kan xe'xq'etq'eti rib' chiwu.
15Naq xink'e xkawilaleb' li roq ruq'eb',
a' chik li rahilal xe'xk'uub' xb'aanunkil we.
16Xkoho xch'ooleb' chirixeb' li yal k'oxlanb'il yos,
chanchaneb' li yokosil xna' simaj li maak'a' aj e.
K'ajo' naq neke'xye laj k'amol xb'eheb':
jo'kan naq te'kamsiiq chi q'esnal ch'iich'
ut se'leb'aal te'kanaaq wi' xb'aaneb' laj Ejiipt.
Q'eqchi DC Bible © Bible Society in Guatemala, 2005.