Hag 2
2
Li xloq'al li x'ak' ochoch li Yos
1Sa' li jun xka'k'aal kutan xb'e li xwuq po, li Qaawa' ki'aatinak chi xtz'uumal re laj Hageo, li propeet, ut kixye chi jo'ka'in: 2“Anaqwan aatinan rik'in laj Sorobabel, ralal laj Salatiel, aj jolominel re Judá, jo'wi' rik'in laj Josué, ralal laj Josadak, li xyuwa'il laj tij, ut rik'ineb' chixjunil li tenamit. Ut ye reheb' chi jo'ka'in:#2,1-2 Esd 3,1-2. 3«Ani sa' eeyanq ki'ilok re li xb'een xloq'al li ochoch a'in? Ut chan chik ru na'ilmank anaqwan?#2,3 Esd 3,12. Pe' yaal naq chanchan naq maak'a' chik xloq'al ut xch'ina'usal jo' junxil? 4Ab'anan kawu laach'ool, a Sorobabel, chan li Qaawa'; kawu ajwi' laach'ool, a Josué, ralalat laj Josadak, li xyuwa'il laj tij. Ex tenamit sa' ruuchich'och', k'ehomaq eech'ool chi k'anjelak chejunilex, xb'aan naq wankin eerik'in, chan li Nimajwal Yos. 5Jo' naq kinye eere sa' jurament naq kexwisi chaq Ejiipt,#2,5 Ex 29,45-46. linmusiq' na'ochb'eenink eere: mexxiwak! 6Wulak re xq'ehil naq tinhich'hich'i li choxa, li ruuchich'och',#2,6 Heb 12,26. li palaw ut li chaqich'och'; 7ut tweek'asi xch'ooleb' chixjunil li tenamit. Toja' naq chixjunileb' a'an te'xk'amatq chaq li xb'ihomaleb' ut taanujaq li ochoch a'in rik'in linloq'al, chan li Nimajwal Yos. 8We li plaat ut li oor, chan li Nimajwal Yos. 9Q'axal nimaq xloq'al li ochoch a'in chiru li xb'een. Ut sa' li na'ajej a'in tink'e li tuqtuukilal. Laa'in li Qaawa' nim inwankil ninye a'in»”.
Li Yos naxq'us li xtenamit
10Sa' li kaahib' xka'k'aal kutan xb'e li xb'ele po, re li xkab' chihab' chi awab'ejink laj Darío, li Qaawa' ki'aatinak chi xtz'uumal re laj Hageo, li propeet, ut kixye chi jo'ka'in: 11“Sa' xk'ab'a' li Nimajwal Yos patz' reheb' li xyuwa'ileb' laj tij chirix li Chaq'rab': 12«Naq junaq aj tij tixk'am li mayejanb'il tib' sa' li raq', wi tixtoch' junaq wa, malaj li yu, malaj li b'iin, aseeyt, malaj k'a'aq chik ru chi tzekemqil, ma santob'resinb'il chik tkanaaq li tzekemq a'an?»”.Eb' laj tij ke'xsume ut ke'xye: “Ink'a'”.
13Toja' naq laj Hageo kixye wi' chik: “Wi junaq muxb'il ru xb'aan xch'e'b'al junaq kamenaq,#2,13 Nm 19,11-22. ut tixch'e' junaq reheb' li tzekemq a'in, ma muxb'il ru tkanaaq li tzekemq?”. Ut eb' laj tij ke'xye: “Muxb'il ru tkanaaq”.
14Toja' naq laj Hageo kixye reheb': “Ab'ihomaq anaqwan li naxye li Qaawa' li qaYos: «Jo'kan ajwi' nak'ulmank rik'in li tenamit a'in: jo'nimal neke'xb'aanu ut chixjunil li xmayejeb' muxb'ileb' ru. 15Ut chalen anaqwan k'oxlahomaq a'in chi us. Naq toj maji' neketikib' rub'elankil li rochoch li Yos, 16k'aru kik'ulmank? Naq nekeraj raj xxokb'al junmay iiq chi triiw, lajeeb' ajwi' neketaw; ut naq junaq naxik chi xsik'b'al lajeeb' roxk'aal kuk chi b'iin, ab'an yal junmay ajwi' naxtaw. 17Laa'in kexinrahob'tesi sa' chixjunil leek'anjel rik'in li tiqwal iq', laj saak' ut li saqb'ach, ab'an maajun eere kisutq'iik chaq wik'in, chan li Qaawa'. 18K'ehomaq reetal anaqwan: sa' li kutan a'in, kaahib' xka'k'aal xb'e li po, laa'ex xek'ojob' rub'elankil li xsantil ochoch li Qaawa'. 19K'ehomaq reetal chi us: chalen anaqwan ink'a' taalajq li triiw sa' leek'uleb'aal. Laa'ex toj maak'a' li uub', li iig, li triiw, li granaad, li oliiw sa' leerochoch; ab'an chalen anaqwan laa'in texwosob'tesi»”.
Li xyeechi'om li Yos re laj Sorobabel
20Chiru ajwi' li kutan a'an, kaahib' xka'k'aal xb'e li po, li Qaawa' ki'aatinak xka'sutil rik'in laj Hageo, ut kixye re: 21“Aatina laj Sorobabel, aj jolominel re Judá, chi jo'ka'in: «Ok we chi xchiq'chiq'inkil sa' xna'aj li choxach'och'. 22Tinjuk' li xwankileb' li neke'awab'ejink re li ruuchich'och' ut twisiheb' li awab'ej sa' li xna'ajeb'; tinpak'lusiheb' li b'eleb'aal ch'iich' re yalok ut eb' li wankeb' chisa'. Te'kamsije'q eb' li kawaay ut eb' li winq; li junjunq taakamsiiq chi q'esnal ch'iich' xb'aan li ras riitz'in. 23Sa' li kutan a'an -chan li Qaawa'- tinxaqab' laawankil, a Sorobabel, ralalat laj Salatiel, aj k'anjelat chiwu, ut jo'kaqat linmatq'ab' re kaaxtink; xb'aan naq laa'in xinsik'ok aawu, chan li Nimajwal Yos»”.
Currently Selected:
Hag 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.