Gn 50
50
Kimuqe'k laj Jakob
1Laj José kixhupub' rib' chi yaab'ak sa' xb'een li xyuwa' ut kixtz'ub' ru. 2Chirix chik a'an kixtaqlaheb' laj b'anonel aj k'anjeleb' chiru chi xyulb'al li xyuwa' sa' sununkil b'an. Ut eb' laj b'anonel ke'xb'aanu chi jo'ka'in. 3Ka'k'aal kutan ke'xb'an wi', xb'aan naq a'an li xk'ihaleb' li kutan na'ajmank re b'anok kamenaq. Ut eb' laj Ejiipt ke'xyaab'a laj Jakob chiru lajeeb' xkaak'aal (70) kutan.
4Naq ak ke'nume'k li kutan kiwank wi' li rahil ch'oolejil, laj José ki'aatinak rik'ineb' li wankeb' sa' rochoch laj Parahón chi jo'ka'in: “Wi usilal xintaw cheru, b'aanuhomaq usilal, yehomaq chaq re laj Parahón li esilal a'in: 5«Naq yo chi wulak xq'ehil li xkamik, linyuwa' xye we: Kamk we; tinaamuq sa' li muqleb'aal inhopom chaq sa' xch'och'eb' laj Kanahán, chan.#50,5 Gn 47,29-31. Ut laa'in xinb'aanu li jurament rik'in. Anaqwan b'i' kanab'in chi xik chi xmuqb'al linyuwa' ut, akaq xinb'aanu chaq a'in, tinsutq'iiq chaq wi' chik»”. 6Kixye laj Parahón: “Ayu ut toxaamuq chaq laayuwa', kama' xaye re rik'in jurament”.
7Toja' naq koho laj José chi xmuqb'al li xyuwa', ut chirix laj José koheb' ajwi' chixjunileb' laj k'anjel chiru laj Parahón li q'axal cheekeb' sa' rochoch jo' ajwi' chixjunileb' li xcheekelaleb' laj Ejiipt; 8chixjunileb' ajwi' li wankeb' sa' rochoch laj José, eb' li ras ut li wankeb' sa' rochoch li xyuwa'ilq. Ka'aj chik eb' li xkok'al, eb' li xkarneer ut eb' li xwakax ke'kanaak sa' li na'ajej Gosen. 9Ke'xk'am ajwi' b'eleb'aal ch'iich' ut aj ch'e'ol b'eleb'aal ch'iich' chirix laj José: k'ajo' xk'ihaleb' li ke'koheb'. 10Naq ke'wulak Koren-Atad, li wank junpak'al li nima' Jordán, aran ke'xyo'le li kamenaq chi q'axal raheb' xch'ool, ut laj José kixyaab'a li xyuwa'ilq chiru wuqub' kutan.
11Eb' laj Kanahán li wankeb' sa' li tenamit a'an ke'ril li xnimal rahil ch'oolejil aran Koren-Atad, ut ke'xye: “A'in xnimal rahil ch'oolejil cho'q reheb' laj Ejiipt”, chankeb'. Jo'kan naq li na'ajej a'an kixk'ab'a'in Abel-Misráhin: a'an wank junpak'al li nima' Jordán.
12Eb' li ralal laj Jakob ke'xb'aanu jo' chanru chaq'rab'inb'ileb' wi': 13ke'xk'am li xyuwa'ilqeb' aran Kanahán ut koxe'xmuq sa' li ochoch pek li wank sa' li na'ajej Makpelá xk'ab'a', a' li ch'och' kixloq' laj Abrahán cho'q xmuqleb'aal rik'in laj Efrón aj Hit, sa' xjayal Mambré.#50,13 Hch 7,16. 14Moqon laj José kisutq'iik wi' chik Ejiipt rochb'eeneb' li ras jo'wi' chixjunileb' li ke'ochb'eenink re chi xmuqb'al li xyuwa'ilq.
Xraqik li hu
15Naq eb' li ras laj José ke'ril naq ak xkamk li xyuwa'eb', ke'xye chirib'ileb' rib': “Mare toj yo xjosq'il laj José sa' qab'een ut tixk'e reeqaj chixjunil li rahilal xqab'aanu re”. 16Ut ke'xtaqla xyeeb'al li aatin a'in re laj José: “Rub'elaj li xkamik, xoxchaq'rab'i laayuwa' chi jo'ka'in: 17«Teeye re laj José: Chab'aanu usilal, chakuyaq xmaakeb' laawas, li k'aru xe'maakob'k wi'. Yaal naq yib'ru xe'xb'aanu aawe, ab'an anaqwan chakuy xmaakeb' laj k'anjel chiru li xYos laayuwa'»”.
Kiyaab'ak laj José naq kirab'i eb' li aatin a'in. 18Toja' naq koheb' li ras rik'in, koxe'xkut rib' chi roq ut ke'xye re: “We'ko chawu; laa'o chik aamoos”. 19Ab'an laj José kixye: “Mexxiwak -chan-. Ma yosin tab'i' laa'in? 20Us ta laa'ex xek'oxla xb'aanunkil rahilal we, ab'an li Yos xsutq'isi a'an cho'q usilal re xb'aanunkil li yooko chi rilb'al anaqwan: xkolb'aleb' xyu'am jun xnimal ru tenamit. 21Jo'kan b'i', mexxiwak: laa'in tin'iloq eere jo' ajwi' leekok'al”.
Ut kixk'ojob' xch'ooleb' naq kiraatinaheb' chi chaab'il.
22Laj José kikanaak Ejiipt rochb'eeneb' li xjunkab'al li xyuwa'ilq. Chixjunil li xyu'am laj José a'an lajeeb' xwaqk'aal (110) chihab'. 23Laj José toj kirileb' li xxikin'i laj Efraín. Jo'kan ajwi' eb' li ralal laj Makir, ralal laj Manasés, toj ke'yo'laak chiru ra' laj José.
24Sa' jun kutan laj José kixye reheb' li ras: “Kamk we, ab'anan ch'olch'o naq li Yos tulextenq'a ut texrisi sa' li tenamit a'in, re texxik sa' li ch'och' kixyeechi'i rik'in jurament re laj Abrahán, laj Isahak ut laj Jakob”. 25Toja' naq laj José kixk'eheb' li ralal laj Israel chi xyeeb'al rik'in jurament: “Ch'olch'o naq li Yos tulexrula'ani; toja' naq teexok linb'aqel arin ut teek'am cherix”.#50,25 Ex 13,19; Jos 24,32; Heb 11,22.
26Lajeeb' xwaqk'aal (110) chihab' wank re laj José naq kikamk Ejiipt: kiyule'k sa' sununkil b'an ut kik'eemank sa' xkaxonil.
Currently Selected:
Gn 50: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.