Ez 27
27
Yaab'ak chirix li roso'jik Tiro
1Li Qaawa' kinraatina ut kixye we chi jo'ka'in: 2“At kaamel winq, b'icha li rahil b'ich a'in chirix Tiro, 3li tenamit wank chire li palaw ut nayakok rik'in naab'al chi tenamit sutsuukeb' chi ha'. Ye re chi jo'ka'in:
«Jo'ka'in xye li Qaawa' Yos:
At Tiro, laa'at nakaye naq q'axal ch'ina'usat,
jo'kat jun li jukub' tz'aqal re ru.
4Laawankil nawulak toj sa' xyi li palaw,
q'axal ch'ina'usat naq katyiib'aak.
5Junes saqichaj li ke'chalk chaq sa' xtzuulul Senir
ke'xyiib' wi' eb' li tz'alamche' sutsuukat wi';
toj aran Líbano ke'xk'am chaq li oqech nachapok re li xt'ikrul li jukub'.
6Eb' li che' natiikisimank wi' li jukub' ke'yiib'aak
rik'in aakute' kichalk chaq Basán;
yaw ke'xtz'ap wi' sa' laab'een,
Kitim kik'ame'k chaq li che' a'an,
ut uutz'u'ujinb'il rik'in marfil.
7Uutz'u'ujinb'il t'ikr liino yiib'anb'il chaq Ejiipt,
a'an li nab'eresink aawe chiru ha'
ut nak'anjelak ajwi' cho'q aaweetalil;
li t'ikr namuheelank aawe
a'an raxchoxa ut kaqmoyink rilb'al,
sa' li tenamit Elisá kik'ame'k chaq.
8Aj Sidón ut aj Arbad laj k'anjeleb' chawu;
ut eb' li neke'b'eresink aawe
a'aneb' li q'axal wankeb' xna'leb', yo'lajenaqeb' aawik'in.
9Eb' li cheekel winq aj Kebal neke'xsik' xyaalal
chanru te'xyiib' laajukub' naq taapo'e'q.
Yalaq b'ar neke'chalje'k eb' laj yakonel
chi k'ayink ut chi loq'ok aawik'in.
10Eb' li winq aj Persia, aj Lidia ut aj Libia
wankeb' cho'q aj puub' aawik'in;
jwal ch'ina'us rilb'aleb' rik'in li xkolb'aleb' rib',
ut li xch'iich' puniteb' a'an neke'xk'ut wi' laaloq'al.
11«Eb' laj Arbad neke'k'aak'alenk sa' xb'een li suttz'ak rochb'eeneb' laasoldaad, ut sa'eb' li ochoch najteb' xteram wankeb' laj Kamad, neke'xlukuxi chiru li tz'ak li xkolb'aleb' rib' re naq jwal ch'ina'us tat-iloq. 12K'ajo' li yakok neke'xb'aanu eb' laj Tarsis aawik'in xb'aan xk'ihal chixjunil laab'ihomal: neke'xjal ru rik'in plaat, q'unch'iich', saqich'iich' ut li raxch'iich'. 13Jo'kaneb' ajwi' eb' laj Grecia, eb' laj Tubal ut eb' laj Mesek neke'loq'ok aawik'in, ut neke'tojok rik'in poyanam ut rik'in chik k'a'aq re ru yiib'anb'il rik'in q'anch'iich'. 14Eb' laj Bet-Togarmá neke'tojok rik'ineb' muul ut kawaay re k'anjelak ut re b'eek. 15Eb' li ralal xk'ajol aj Rodas neke'yakok aawik'in; naab'aleb' li poyanam li wankeb' sa' sutha' a'aneb' aaloq'onel, ut neke'tojok rik'in marfil ut li che' ébano. 16Sa' xk'ab'a' laak'iila k'ay eb' laj Edom neke'loq'ok aawik'in ut neke'tojok rik'in lemtz'il q'ol, kaqinoq', kuxpo'ot, chaab'il liin, kaqiq'ol ut lemtz'il pek. 17Jo'kaneb' ajwi' laj Israel ut eb' laj Judá, naq neke'loq'ok aawik'in, nakate'xtoj rik'in li triiw re Minit, li k'uluj, li xya'al kab', li aseeyt ut li sununkil b'an. 18Eb' laj Damaask neke'loq'ok aawik'in chi yo'oon xb'aan xk'ihal li sahil eechej ut laab'ihomal, ut nakate'xtoj rik'in chaab'il b'iin re Helbón ut tuuxnoq' re Sahar. 19Eb' laj Dan jo'wi' eb' laj Grecia neke'xk'am chaq toj Usal li chaab'il ch'iich', li kaneel ut li sununkil b'an re xjalb'al ru rik'in li xloq'omeb' aawik'in. 20Eb' laj Dedán neke'yakok aawik'in rik'in k'ojleb'aal chirix kawaay. 21Eb' laj Arabia ut chixjunileb' li xninqal ru winq re Kedar a'aneb' aaloq'onel ut neke'xk'am chaq cho'q aawe eb' li kok' karneer, li chib'aat ut li teelom wakax. 22Eb' laj yakonel re Sabá ut Ramá neke'yakok aawik'in ut nakate'xtoj rik'in chaab'il sununkil b'an, lemtz'il pek ut rik'in oor. 23Eb' laj Harán, eb' laj Kané, laj Edén ut laj yakoneleb' re Sabá, Asiria ut chixjunil xteepal Media 24nokole'xk'ayi aawe chaab'il t'ikr, kuxpo'ot, noq' naab'al xb'onol, uutz'u'ujinb'il aq'ej jo'wi' tz'ulb'il k'aam. 25Eb' li jukub' re Tarsis neke'xtaaqe chaq rib' chi xk'amb'al chaq aawe li k'iila k'ay.
«Chanchanat jun li jukub' sa' xyi li palaw,
li q'axal naab'al li riiq.
26Toj sa' xyi li palaw xate'xk'am laj b'eresinel aawe,
ab'an li kawil iq' li nachalk sa' xjayal releb'l saq'e
xatxjuk' ut xatxsub' sa' xchamal li ha'.
27Laab'ihomal, laak'ay ut chixjunil li k'aru aawe,
eb' laj k'anjel chawu ut eb' laj b'eresinel aawe,
eb' laj peech' ut eb' laj yakonel,
eb' laj puub' ut chixjunileb' laawochb'een
te'sub'e'q toj sa' xchamal li ha'
sa' li kutan naq tat-oso'q.
28K'ajo' naq te'xiwaq eb' li wankatqeb' chi junqre li palaw
naq te'rab'i xyaab' xkuxeb' laj k'anjel chawu!
29Toja' naq chixjunileb' li wankeb' sa'eb' li jukub' te'elq chaq;
eb' laj b'eresinel ut eb' laj ch'e'ol jukub' te'kanaaq chi ch'och'el.
30Ut te'xjap re chi yaab'ak chawix,
te'tz'uyinq chi q'axal ra sa' xch'ooleb'.
Te'xk'e pojtz' sa' xjolomeb' ut te'xsotob' rib' sa' cha.
31Te'xjo li xjolomeb' sa' aak'ab'a',
te'xtiqib' rib' rik'in q'eqit'ikr
ut tz'uynaqeb' chi yaab'ak
chi k'ajo'aq xmayeb' li raanm.
32Sa' aak'ab'a' te'xb'icha junaq b'ich re rahil ch'oolej
ut xb'aan xrahil xch'ooleb' te'xye chi jo'ka'in:
Ani tawi' jo' li tenamit Tiro sa' xyi li palaw? cha'qeb'.
33Junxil naq neke'isiik laak'ay sa'eb' laajukub',
naab'aleb' li tenamit nakak'ojob' xch'ooleb'.
Xab'ihomob'resiheb' li awab'ej sa' ruuchich'och'
rik'in xk'ihal laab'ihomal ut laasahil eechej.
34Ut anaqwan xat-oso'k sa' xyi li palaw,
toj sa' xchamal li ha' xatsob'e'k.
Laak'ay ut chixjunileb' laj k'anjel chawu
aawech xikikeb' naq xe'oso'k sa' xchamal li ha'.
35Chixjunileb' li poyanam li wankatqeb' chire li palaw
sachsookeb' xch'ool chawix;
siksootkeb' li awab'ej
xb'aaneb' xxiw ut xpo'po'il xk'a'uxeb'.
36Eb' laj yakonel li wankatqeb' sa' jalan tenamit,
k'ajo' naq neke'xuxb'ak chawix;
jwal xiwajel aj chik xatkanaak
ut xat-oso'k chi junajwa»”.#27,25-36 Ap 18,11-19.
Currently Selected:
Ez 27: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
