Dt 2
2
Sa' li chaqich'och'
1“Chirix chik a'an koosutq'iik ut kooho sa' li chaqich'och', sa' xb'ehil li palaw Suf, jo' kinxtaqla wi' li Qaawa'. Ut chiru k'iila kutan kiqasuti rix li tzuul Seír.#2,1 Nm 21,4. 2Toja' naq li Qaawa' kixye we: 3«Junxil nekex'ok chi xb'eeninkil eerib' chirix li tzuul a'in. Ayuqex sa' xjayal releb'l iq'. 4Ye li aatin a'in re li tenamit: Naq toxexnume'q sa' xch'och'eb' leeras eeriitz'in, a'eb' li ralal xk'ajol laj Esaú li wankeb' aran Seír,#2,4 Gn 36,8; Nm 20,14-21. eb' a'an te'xxiwa eeru, ab'anan laa'ex chek'e reetal, 5mexyalok rik'ineb', xb'aan naq laa'in maak'a' re li xch'och'eb' a'an tink'e eere, chi moko jun miinaq ta xna'aj leeroq, xb'aan naq li tzuul Seír kink'e chireechani laj Esaú. 6Li tzekemq teetzeka ut li ha' teeruk', yal teeloq' rik'in tumin». 7Xb'aan naq li Qaawa' laaYos xatrosob'tesi sa' chixjunil laak'anjel; xatril chiru laab'eenik sa' li nimla chaqich'och' a'in, ut ak ka'k'aal chihab' anaqwan naq li Qaawa' laaYos wank aawik'in chi maak'a' xmajelo'k aawe.
8“Moqon koonume'k sa' xyanqeb' li qas qiitz'in, li ralal xk'ajoleb' laj Esaú li wankeb' aran Seír, sa' xb'ehil Arabá, li naxik Elat ut Esión-Kéber; kiqajal xjayal li qab'e ut kiqachap xb'ehil li chaqich'och' re Mohab. 9Toja' naq li Qaawa' kixye we: «Maachiq' xjosq'il eb' laj Mohab, maayoob'eb' chi yalok, xb'aan naq maak'a' re li xtenamiteb' a'an tink'e aawe: eb' a'an ralal xk'ajoleb' laj Lot ut ak kink'e li na'ajej Ar reheb'».#2,9 Gn 19,37; Nm 21,10-20. 10(Najter ke'wank aran eb' laj Emiit, a'an chaq jun nimla tenamit, k'ajo'eb' xk'ihal ut ninqeb' xtib'el, jo'keb' laj Anak. 11Eb' a'an ut eb' laj Anak sa' xch'ooleb' li tenamit naq aj Refaiheb', ab'anan eb' laj Mohab, aj Emiit neke'xye reheb'. 12Jo'kan ajwi' aran Seír najter eb' laj Jor ke'wank chaq aran, ab'an ke'isiik ut ke'sache'k ru xb'aaneb' li ralal xk'ajol laj Esaú, ut a'aneb' ke'kanaak sa' li xna'ajeb', jo' ke'xb'aanu laj Israel rik'in li ch'och' li kik'ehe'k reheb' xb'aan li Qaawa'.) 13«Ut anaqwan xaqlinqex ut q'axonqex junpak'al li nima' Séred», chan li Qaawa'. Toja' naq kooq'axonk junpak'al li nima' Séred.
14“Chalen chaq Kadés-Barné toj re naq kooq'axonk junpak'al li nima' Séred, koob'eek waqxaqlaju xka'k'aal chihab', toj reetal ke'oso'k chixjunileb' li winq neke'yalok, jo' tz'aqal xyehom li Qaawa'.#2,14 Nm 14,28-35. 15A' ajwi' li xwankilal li ruq' li Qaawa' ki'isink reheb' sa' li xmuheb'aaleb' toj reetal ke'oso'k chixjunileb'.
16“Naq ak xe'kamk chixjunileb' li winq li neke'yalok sa' xyanqeb' li tenamit, 17li Qaawa' kixye we: 18«Hoon tatnume'q sa' xnub'ajlil Mohab, sa' xb'ehil Ar, 19ut taataweb' li ralal xk'ajol laj Amón. Maachiq' xjosq'ileb' chi moko taatikib' yalok rik'ineb', xb'aan naq maak'a' re li xtenamiteb' li ralal xk'ajol laj Amón tink'e ta aawe: ink'ehom chik cho'q reechanihomeb' li ralal xk'ajol laj Lot»,#2,19 Gn 19,38. chan. 20(Li na'ajej a'in ajwi' kiwank chaq jo' xtenamiteb' laj Refait, xb'aan naq a'aneb' ke'wank aran najter, ut eb' laj Amón aj Sansum neke'xye reheb'. 21A'an jun nimla tenamit, k'ajo'eb' xk'ihal ut ninqeb' xteram jo'eb' laj Anak. Li Qaawa' kixsacheb' ru rik'in ruq'eb' laj Amón li ke'isink reheb' ut ke'kanaak sa' li xna'ajeb'. 22Jo'kan ajwi' li Qaawa' kirusilaheb' ru li ralal xk'ajol laj Esaú li ke'wank Seír: ke'xsacheb' ru laj Jor, ke'risiheb' ut ke'kanaak sa' li xna'ajeb' chalen toj anaqwan. 23A'an ajwi' ke'xk'ul eb' laj Abí, li ke'wank sa'eb' li na'ajej re Gasa; a'atqeb' laj Kaftor li chalenaqeb' chaq Kaftor, ke'xsacheb' ru ut ke'kanaak sa' li xna'ajeb'.) 24«Xaqlinqex -chan li Qaawa'-, ayuqex ut q'axonqex junpak'al li nima' Arnón. Ilomaq, laa'in tinq'axtesi sa' eeruq' laj Sijón, aj Amor, awab'ej re Jesbón, ut chixjunil li xtenamit. Okanqex sa' li xtenamit ut chiq'omaq xjosq'il. 25Chalen anaqwan twoksi xiw ut xxiwankil aawu sa' xyanqeb' chixjunileb' li tenamit li wankeb' junsut junrub'el choxa. Naq te'rab'i resil eechalik, siksootqeb' chixjunileb' ut parpotqeb' xb'aan xxiweb'», chan li Qaawa'.
Kiq'axe'k ru laj Sijón
(Nm 21,21-30)
26“Chalen chaq sa' li chaqich'och' re Kedemot kintaqlaheb' aj esil rik'in laj Sijón, awab'ej re Jesbón, re xyeeb'al li tuqtuukil aatin a'in: 27«Ok we chi nume'k sa' laatenamit. Tiik li b'e tink'am, chi ink'a' tinjiloq sa' linnim chi moko sa' lintz'e. 28B'aanu usilal, li tzekemq tintzeka taak'ayi we; jo'kan ajwi' li ha' twuk'. Ka'ajwi' nintz'aama usilal chawu, twaj nume'k chi oqej, 29jo' kanab'anb'il we xb'aaneb' li ralal xk'ajol laj Esaú li wankeb' Seír, jo'wi' xb'aaneb' laj Mohab li wankeb' Ar, toj reetal tinwulaq sa' li nima' Jordán ut tin'ok sa' li ch'och' tixk'e qe li Qaawa' li qaYos».
30“A'ut laj Sijón, awab'ej re Jesbón, ink'a' kooxkanab' chi nume'k aran, xb'aan naq li Qaawa' laaYos ak xkawresi ut xjipob'resi li xch'ool re xq'axtesinkil sa' leeruq' jo' naq wank anaqwan.
31“Toja' naq li Qaawa' kixye we: «K'e reetal, ak xintikib' xq'axtesinkil aawe laj Sijón ut chixjunil li xch'och'. Tikib' reechaninkil ut chap cho'q aawe», chan li Qaawa'.
32“Laj Sijón ki'elk chaq, rochb'een chixjunileb' li xtenamit, re yalok qik'in aran Yahás, 33ab'an li Qaawa' li qaYos kixq'axtesiheb' sa' quq' ut kiqasach ruheb' rochb'eeneb' li ralal xk'ajoleb' ut chixjunileb' li poyanam. 34Toja' naq kiqeechaniheb' chixjunil li xtenamit ut kiqaq'axtesiheb' chi oso'k: jo' winq, ixq ut kok'al, chi maajun kiqakanab' chi yo'yo. 35Ka'ajwi' kiqak'uula cho'q qeechanihom li ketomq ut li k'a'aq ru xqataw sa'eb' li tenamit. 36Chalen chaq Aroher, junq re li taq'a Arnón, ut li tenamit li wank sa' li taq'a, toj Galahad, maajun tenamit ink'a' ta kooruuk koo'ok wi'. Li Qaawa' li qaYos kixq'axtesi sa' quq' chixjunil. 37Ka'ajwi' li xna'ajeb' laj Amón, chixjunil li na'ajej junqre li nima' Yabok ut eb' li tenamit wankeb' chi tzuul, ink'a' koo'ok chisa', xb'aan naq ink'a' q'axtesinb'ileb' qe xb'aan li Qaawa'.
Currently Selected:
Dt 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.