Hch 27

Laj Pablo koho chiru ha' toj Roma

1Naq kich'olaak qaxikik chiru ha' toj Italia, laj Pablo ut wiib' oxib' li wankeb' sa' tz'alam ke'q'axtesiik sa' ruq' jun xjolomileb' laj puub', aj Julio xk'ab'a', xkomoneb' li xteepalileb' aj puub' re laj Augusto. 2Koo'ok sa' jun li jukub' re Adramitio, xik re sa'eb' li na'ajej wankeb' chi xsutam Asia, chire li palaw, ut kooho qochb'een laj Aristarko aj Macedonia, Tesalónica xtenamit. 3Sa' li kutan jun chik koowulak Sidón. Laj Julio xchaab'ilal xch'ool naq kixkanab' laj Pablo chi rula'aninkileb' li ramiiw, re naq taatenq'aaq xb'aaneb'. 4Koo'elk aran Sidón ut kooho chiru ha' junqre Chipre, xb'aan naq chiqu yo chi chalk li iq'. 5Koonume'k sa' li palaw re Silisia ut Panfilia, ut koowulak Mira, sa' xteepal Lisia.

6Aran li xjolomileb' laj puub' kixtaw jun li jukub' re Alejandría yo chi xik Italia, ut kooxk'am chisa'. 7Chiru naab'al kutan koob'eek timil chiru li palaw ut koowulak chi ra chi sa chiru Knido; ab'an li iq' ink'a' kooxkanab' chi ok aran, jo'kan naq kooho chiru ha' junqre Kreta, chi xk'atq Salmone: 8raasa naq koonume'k aran ut, moqon, koxoo'elq sa' jun li na'ajej Chaab'il Hilob'aal neke'xye re, nach' rik'in li tenamit Lasea.

9Junxilaq chik a'an, naq xiw xiw chik li xik chiru ha' (xb'aan naq ak numenaq ajwi' xq'ehil li Ayuunik#27,9 Li xq'ehil li Ayuunik (cf. Lv 16,29-31) a'an xtiklajik li hab'alq'e, ut xiw xiw chik li xik chiru ha' chiruheb' li kutan a'an.), ki'aatinak laj Pablo rik'ineb' 10ut kixye:

—Ex wamiiw, nink'e reetal naq ch'a'aj chik li qab'eenik chiru ha'; moko ka'aj ta wi' li iiq ut li jukub' te'xk'ul naab'al li rahilal, tqak'ul aj b'an wi' laa'o.

11Li xjolomileb' laj puub' a' chik li naxye laj b'eresinel ut laj eechal re li jukub' naxpaab' chiru li naxye laj Pablo. 12Ut li na'ajej a'an moko us ta cho'q re li jukub' re xnumsinkil li hab'alq'e; jo'kan naq q'axal naab'aleb' ke'xk'uub' elk aran: mare anchal te'wulaq Fenis, a'an jun li hilob'aal jukub' re Kreta, li wank sa' xnim ut sa' xtz'e li rokeb'l saq'e.

Li kaqsut-iq' chiru palaw

13Yo chi apunk li iq' nachalk sa' rokeb'l li iq', ut eb' a'an ke'xk'oxla naq taaruuq li xk'uub'ahomeb'; ke'elk ut aran, ut koheb' junqre Kreta, nach' rik'in li ch'och' a'an. 14Ab'anan junpaataq chik a'an koxkut rib' sa' xb'een li na'ajej jun kaqsut-iq', Ewroakilón xk'ab'a': 15li jukub' kijukuuk ut ink'a' kixkuy xmetz'ew li iq', jo'kan naq laa'o kiqakanab' chi xik b'arwi' nak'ame'k. 16Koonume'k chirix jun li ch'ina na'ajej sa' palaw, Kawda xk'ab'a', ut aran chi ra chi sa kooruhank chi xtaqsinkil li ch'ina jukub'. 17Chirix chik a'an, rik'in xk'anjelob'aaleb' ke'xk'e xkawub'; ke'xb'ak' chi rub'el ut ke'xkut li xramleb' li jukub' xb'aan xxiweb': a' ke'xk'oxla naq mare toxe'xtaw li samahib' aran Sirte. Ut chi jo'ka'in yookeb' chi k'ame'k. 18Li kaqsut-iq' q'axal yo chi qachiq'chiq'inkil, jo'kan naq sa' li kutan jun chik ke'xtikib' xjeb'b'al li riiq li jukub', 19ut sa' rox li kutan ke'xkut rik'in ruq'eb' chixjunileb' li xk'anjelob'aal li jukub'. 20Chiru naab'al kutan ink'a' xk'utunk li saq'e chi moko eb' li chahim; makach'in li kaqsut-iq' wank sa' qab'een, tik ink'a' chik naqak'oxla naq tookole'q.

21Chiru naab'al kutan ink'a' kiqayal wa; jo'kan naq laj Pablo kixaqliik sa' xyiheb' ut kixye:

—Ex wamiiw, jwal us raj xineepaab' ut ink'a' raj xex'elk chaq Kreta; jo'kan naq ink'a' raj xek'ul li rahilal a'in ut ink'a' raj xexsachok. 22A'ut anaqwan nintz'aama cheru naq kawaq eech'ool: maajun sa' eeyanq taasachq, ka'ajwi' li jukub'. 23Xb'aan naq chiru li q'oqyink a'in xk'ut rib' chiwu jun li ánjel taqlanb'il chaq xb'aan li Yos li ninloq'oni laa'in ut aj eechal we, 24ut xye we: «Matxiwak, Pablo! Tento tatwulaq chiru li awab'ej. K'e reetal, li Yos xk'eheb' sa' laawuq' li xyu'am chixjunileb' laawochb'een sa' laab'eenik», chan. 25Jo'kan utan, ex wamiiw, kawaq eech'ool! Sa' xk'ab'a' li Yos laa'in ninpaab' naq taak'ulmanq tz'aqal jo' yeeb'il chaq we. 26Toxqataw jun li na'ajej sutsu xb'aan li palaw.

27Sa' xkaalaju li q'oqyink li nokoojukuuk wi' sa' li palaw Adriátiko xk'ab'a', sa' xyiitoq tana li q'oqyink, eb' laj b'eresinel jukub' ke'reek'a naq nach' wank li ch'och'. 28Ke'xb'is li xchamal li ha' ut ke'xtaw naq wiib' xka'k'aal moqoj li xchamal; ut naq ke'jilok chik kach'in chiruheb', ke'xb'is wi' chik ut waqlaju moqoj aj chik xchamal. 29Yookeb' xxiw xb'aan naq mare toxqapik'a qib' sa' li pek ru naq neke'xk'oxla; jo'kan naq ke'xk'e sa' li ha' kaahib' chi xramleb' li jukub' chi xjolomil, ut q'axal neke'raj ta ak xsaqewk. 30Eb' laj b'eresinel jukub' ke'xyal elelik ut ke'ok chi xkub'sinkil li ch'ina jukub' sa' palaw, ke'xb'aanu rib'eb' jo' li yal xkutb'al li xramleb' jukub' chi uub'ej te'raj. 31A'ut laj Pablo kixye re laj jolominel ut reheb' laj puub':

—Wi ink'a' te'kanaaq eb' a'an sa' li jukub', moko truuq ta texkole'q laa'ex.

32Toja' naq eb' laj puub' ke'xset li xk'aamal li ch'ina jukub' ut ke'xkanab' chi t'ane'k sa' li palaw.

33Naq yookeb' chi royb'eninkil li kutan, laj Pablo kixtz'aama chiruheb' chixjunil naq te'wa'aq; ut kixye:

—Ak kaalaju kutan eerokik chi oyb'enink ut chi xkuyb'al eesa'; tik maak'a' neketzeka. 34Jo'kan naq nintz'aama usilal cheru, chexwa'aq: us cho'q eere, re naq texkole'q. Maajun sa' eeyanq taasachq junaq rismal xjolom.

35Ut naq kixye a'an, kixchap li wa, kiyoxink re li Yos chiru chixjunileb', kixjach ut ki'ok chi wa'ak. 36Toja' naq chixjunileb' ke'kawuuk xch'ool ut ke'wa'ak ajwi'. 37Waqlaju xkaalajuk'aalo (276) li wanko sa' li jukub'. 38Ut naq ak ke'k'ojlaak xch'ool, ke'ok chi xjeb'b'al riiq li jukub' rik'in xkutb'al li triiw sa' palaw.

39Naq kikutano'k, eb' laj b'eresinel jukub' ink'a' ke'xnaw ru li ch'och', ab'an ke'ril jun li ch'ina na'ajej jay re li ha', ut ke'xk'uub' xk'amb'al li jukub' aran, wi ta taaruuq. 40Ke'rach'ab' eb' li xramleb' jukub' ut ke'xkanab' sa' li palaw; ke'xhit ajwi' b'ayaq li xk'aamaleb' li b'eresib'aal, ke'xtaqsi sa' iq' li nimla t'ikr wank chi uub'ej ut koheb' sa' xjayal li ch'och'. 41Ab'anan koxe'xpik'a rib' sa' jun li na'ajej wank palaw chi xka'pak'alil, ut li jukub' kit'ilk aran: t'ilt'o li ru'uj sa' li samahib', ink'a' chik na'eek'ank; ut li rix yo chi juk'e'k xb'aan xmetz'ew li palaw.

42Toja' naq eb' laj puub' ke'xk'uub' xkamsinkileb' li preex re naq maa'ani taa'eleliq sa' numx. 43A'ut li xjolomileb' laj puub' li taaraj xkolb'al laj Pablo, ink'a' kixk'ulub'a li xk'a'uxeb' ut kixtaqla naq xb'enwa xkutaqeb' rib' sa' ha' eb' li neke'xnaw numxik ut che'wulaq chi ch'och'el; 44ut eb' li junch'ol chik elqeb': wan te'elq sa' xb'een tz'alamche', wan chik sa' xb'een li k'a'aq re ru re li jukub'. Chi jo'kan koowulak chiqajunilo chi ch'och'el chi maak'a' kiqak'ul.

Currently Selected:

Hch 27: QQC

Highlight

Compare

Copy