Hch 20

Laj Pablo kixkanab' Éfeso

1Naq kich'anaak li mululij ib', laj Pablo kixb'oqeb' laj paab'anel ut kixk'e xkawub' xch'ooleb'; kixchaq'rab'iheb' ut kixchap xb'e re xik Macedonia. 2Kixb'eeni eb' li na'ajej a'an, yo chi xwaklesinkil xch'ooleb' laj paab'anel rik'in k'iila aatin, toj kiwulak Grecia, 3b'arwi' kikanaak oxib' po. Xik raj re Siria chiru ha' naq eb' laj Judiiy ke'xyoob' jun ch'a'ajkilal chirix. Toja' naq laj Pablo kixk'oxla nume'k Macedonia sa' xsutq'ijik. 4Ki'ochb'eeniik xb'aan laj Sópatros, ralal laj Pirro, aj Berea; xb'aan laj Aristarko ut laj Segundo, Tesalónika xtenamiteb'; xb'aan laj Gayo aj Derbe ut laj Timoteo, jo' ajwi' xb'aan laj Tíkiko ut laj Trófimo, sa' xteepal Asia li xtenamiteb'. 5Eb' a'in koheb' chi uub'ej ut koxe'royb'eni Tróada. 6Ut laa'o, chirix chik xninq'ehinkil li Wa ink'a' yuub'il,#20,6 Naraj naxye: “chirix chik xninq'ehinkil li Paswa”. koo'elk Filipos sa' jukub' ut sa' ro' li kutan koxqataw qib' rik'ineb' a'an Tróada, b'arwi' koowank wuqub' kutan.

Aran Tróada

7Sa' li xb'een kutan re li xamaan ch'utch'uuko laa'o chi xjachb'al li Wa,#20,7 Hch 2,42. wulajaq xxikik laj Pablo. A'in kixtikib' seeraq'ik rik'ineb' laj paab'anel, ab'anan kib'ayk chi aatinak toj tuqtu q'oqyink. 8Wankeb' naab'al li saqenk sa' xkab' k'ojar li kab'l b'ar ch'utch'uuko wi'. 9Jun li saaj al, aj Ewtiko xk'ab'a', k'ojk'o chire li b'entaan, naxiiqan chi wark xb'aan naq yo chi najto'k roq li xseeraq' laj Pablo. Li xwara kinumtaak sa' xb'een ut kit'ane'k chaq sa' rox k'ojar li kab'l toj taq'a ru: ut ak kamenaq chik naq ke'xwaklesi. 10Toja' naq kikub'e chaq laj Pablo, kixk'utzub' rib' sa' xb'een, kixq'alu ut kixye:

—Mexk'oxlak, toj yo'yo.

11Naq kitaqe'k wi' chik, kixjachi li wa ut kiwa'ak. Toj najt chik kikanaak chi seeraq'ik laj Pablo, toj kisaqewk; toja' naq koho. 12Ke'xk'am chaq li al chi yo'yo, ut q'axal ke'k'ojlaak xch'ool.

Laj Pablo kiwulak aran Mileto

13Laa'o xb'enwa koowulak sa' li jukub' aran Aso, b'arwi' kiqataw laj Pablo. Jo'ka'in naq kik'uub'aak xb'aan li apóstol, xb'aan naq taaraj xik chi ch'och'el. 14Ut naq koxoxtaw Aso, kiqak'am chiqix sa' jukub' ut koowulak Mitilene. 15Sa' li kutan jun chik koo'elk aran chiru ha' ut koowulak sa' xka'yab'aal Kíos; sa' rox li kutan koxoohilanq Samos ut sa' li xka koowulak Mileto. 16K'uub'k'u xb'aan laj Pablo naq ink'a' toxnume'q Éfeso re naq ink'a' tixb'ay rib' Asia; taaraj xseeb'ankil rib' re naq twanq Jerusalén sa' xkutankil li Pentekostés, wi tixk'e raj rib'.

Laj Pablo kixchaq'rab'iheb' li xcheekel winqilal Éfeso

17Naq wank Mileto, laj Pablo kixtaqla xb'oqb'aleb' li xcheekel winqilaleb' li Iklees re Éfeso. 18Ut naq ke'wulak rik'in, kixye reheb':

“Laa'ex nekenaw chanru naq xinwank junelik eerik'in, chalen chaq sa' li xb'een kutan li wokik Asia toj anaqwan. 19Xink'anjelak chiru li Qaawa' chi q'axal kub'enaq inwankil, rik'in xya'al wu ut rik'in li k'iila yale'k xchalk sa' inb'een xb'aan xra'aleb' laj Judiiy. 20Laa'ex nekenaw naq ink'a' xwisi wib' naq xwank k'aru us cho'q eere: ink'a' xinkanab' eetzolb'al ut xjultikankil cheru li Aatin chiruheb' li tenamit jo' ajwi' chire kab'lal; 21xinjultika chi kaw chiruheb' laj Judiiy ut eb' laj Griego naq tento te'xjal xk'a'uxl ut te'xq'axtesi rib' re li Yos, jo' ajwi' naq te'xpaab' li Qaawa' Jesus. 22Anaqwan, k'ehomaq reetal, xik we Jerusalén chi ink'a' ninnaw k'aru toxink'ul aran. A' li Musiq'ej naminok wu. 23Ka'ajwi' ninnaw naq sa' li junjunq chi tenamit li Santil Musiq'ej naxch'olob' chiwu naq kareen ut rahilal te'oyb'eninq we. 24Ab'anan laa'in ink'a' nink'e xloq'al linyu'am chi junajwa; ka'ajwi' nawaj tinchoy linb'eenik ut li k'anjel xink'ul sa' ruq' li Qaawa' Jesus, a' li xyeeb'al resil li xChaab'il Esil li rusilal li Yos.

25“Anaqwan ninnaw naq maajun chik sa' eeyanq, li xinnumje'k wi' chi xpuktesinkil resil li xnimajwal awab'ejihom li Yos, taaril ta chik wu. 26Jo'kan naq sa' li kutan a'in tinye eere sa' yaal naq maak'a' inmaak, wi wanq ta junaq eere ink'a' taakole'q, 27xb'aan naq ink'a' xinxiwak chi xyeeb'al eere resil chixjunil li xnimal rajom li Yos. 28Cherilaq eerib' jo' ajwi' cherilaqeb' chixjunil li karneer li xaqab'anb'ilex wi' xb'aan li Santil Musiq'ej cho'q aj k'aak'alehom reheb'. Cheb'eresi li x'Iklees li Yos li kixloq' rik'in xkik'el li Ralal. 29Ninnaw naq, akaq xkohin, wanqeb' josq' aj xojb' te'ok sa' eeyanq li te'xrahob'tesi eb' li karneer. 30Sa' eeyanq ajwi' laa'ex wanqeb' winq te'wakliiq chi xyeeb'al k'a'aq re ru ink'a' us re xk'amb'aleb' laj paab'anel chirixeb'. 31Jo'kan utan, chexyo'leq ut jultikaq eere naq chiru oxib' chihab' ink'a' xinhilank chi xk'eeb'al eena'leb' chejunjunqal, chi q'eq ut chi kutan, rik'inatq xya'al wu.

32“Anaqwan texinkanab' sa' ruq' li Yos ut rik'in li Aatin naxye resil li xrahom: a'in wank xwankil chetenq'ankil chi kab'laak sa' li paab'aal jo' ajwi' chi xk'eeb'al eere li xyeechi'om li Yos, eerochb'eenaqeb' chixjunil li santob'resinb'ileb'. 33Laa'in ink'a' xinrahi xplaat, chi moko x'oor malaj xb'aatal anihaq. 34Laa'ex nekenaw naq eb' li wuq' a'in xe'k'anjelak naq xinwank sa' rajb'al ru jo'wi' xe'k'anjelak cho'q reheb' li wochb'een. 35Chi yalaq chan re ru xlajink'ut cheru naq tento xtenq'ankileb' li toq'ob'eb' ru rik'in k'anjelak chi jo'ka'in, jo'wi' tento xk'eeb'al sa' qach'ool li xyehom li Qaawa' Jesus: «Q'axal nim li sahil ch'oolejil wank sa' li k'ehok chiru li wank sa' li k'uluk»,#20,35 A'in ajwi' xyehom li Jesus, us ta ink'a' tz'iib'anb'il sa' li Santil Evangelio. chan”.

36Ut naq ak kiraqe'k chi xyeeb'al a'in, laj Pablo kixwiq'ib' rib' ut kitijok rochb'eeneb' chixjunil. 37K'ajo' naq ke'ok chi yaab'ak chixjunileb', ke'xq'alu chi xkux laj Pablo ut ke'xtz'ub' ru 38chi q'axal raheb' sa' xch'ool, xb'een xb'een rik'in li aatin kixye naq ink'a' chik te'ril ru. Ut ke'rochb'eeni toj sa' li jukub'.

Currently Selected:

Hch 20: QQC

Highlight

Compare

Copy