Hch 18

Xk'ojlajik li Iklees aran Korinto

1Chirix chik a'an laj Pablo ki'elk Atenas ut kiwulak Korinto. 2Aran kixtaw jun aj judiiy, aj Akila xk'ab'a', yo'lajenaq sa' xteepal Ponto, toja' chalenaq chaq Italia rochb'een lix Priscila li rixaqil, xb'aan li chaq'rab' k'eeb'il xb'aan laj Klawdio naq chixjunileb' laj Judiiy te'elq Roma.#18,2 A'an kik'ulmank sa'eb' li chihab' 49-50. Laj Pablo ki'ok sa' rochocheb' 3ut kikanaak rik'ineb', yo chi k'anjelak aran, xb'aan naq junajeb' ajwi' li xk'anjeleb'. Li xk'anjeleb' a'an yiib'ank muheb'aal rik'in tz'uum. 4Rajlal sábado laj Pablo naseeraq'ik sa' li ch'utleb'aal kab'l, yalyo xq'e chi xq'unb'esinkileb' laj Judiiy jo'wi' eb' laj Griego.

5Naq ke'chalk chaq Macedonia laj Silas ut laj Timoteo, laj Pablo junes chirix li Aatin kixk'e xch'ool, ut naxch'olob' chiruheb' laj Judiiy naq li Jesus a'an li Kriist. 6A'ut eb' a'an ink'a' ke'raj rab'inkil, ke'ok b'an chi xmajewankil; jo'kan naq laj Pablo kixchiq' ru li raq' ut kixye reheb':

—A' yaal eere. Leekik'el chinaq sa' eeb'een. Laa'in maak'a' inmaak, ut chalen anaqwan tinxik junes rik'ineb' li junch'ol chik.

7Tikto ki'elk aran ut kox'okaq sa' rochoch jun li winq aj Justo xk'ab'a', li naxxiwa ru li Yos; nach' wank li rochoch rik'in li ch'utleb'aal kab'l. 8Laj Krispo, aj jolominel re li ch'utleb'aal kab'l, kixpaab' li Qaawa' rochb'een chixjunil li xjunkab'al; ut naab'aleb' chik aj Korinto, naq ke'rab'i laj Pablo, ke'xpaab' ut ke'kub'siik xha'.

9Sa' jun li q'oqyink kixye li Qaawa' re laj Pablo sa' moy u: “Matxiwak! Toj aatinan wan ut matkanaak chi ch'anch'o, 10xb'aan naq wankin aawik'in ut maa'ani truuq chi rahob'tesink aawe. Relik chi yaal naq naab'al lintenamit wank sa' li na'ajej a'in”. 11Laj Pablo kikanaak aran jun chihab' rik'in waqib' po, yo chi xk'utb'al li Raatin li Yos chiruheb'.

Laj Pablo kik'ame'k sa' raqleb'aal aatin xb'aaneb' laj Judiiy

12Naq laj Galión wank chi taqlank aran Akaya,#18,12 A'an kik'ulmank sa' li chihab' 52. eb' laj Judiiy sa' komonil ke'xkut rib' sa' xb'een laj Pablo, ke'xk'am sa' li raqleb'aal aatin 13ut ke'xye:

—A'in naxq'unb'esi xch'ooleb' li tenamit chi xloq'oninkil li Yos, ab'an moko jo' ta naxye li Chaq'rab'.

14Ok raj re laj Pablo chi aatinak, naq laj Galión kixye reheb' laj Judiiy:

—Ex aj Judiiy, wi a'an ta xb'aanu junaq maak malaj junaq ink'a' us, texwab'i raj sa' xyaalal, kama' eek'ulub'. 15Ab'anan nawil naq yookex chi xwech'inkil rix li aatin, k'ab'a'ej ut k'a'aq chik re ru wank sa' leeChaq'rab'; jo'kan naq a' yaal eere. Ink'a' nawaj raqok aatin chirix a k'a'aq re ru a'in.

16Ut kirisiheb' sa' li raqleb'aal aatin. 17Toja' naq chixjunileb' ke'xchap laj Sóstenes, aj jolominel re li ch'utleb'aal kab'l, ut ke'ok chi xsak'b'al chiru li raqleb'aal aatin. Ab'anan laj Galión maak'a' kiraj wi'.

Laj Pablo ki'elk Grecia

18Toj naab'al kutan chik kikanaak laj Pablo aran; toja' naq kixchaq'rab'iheb' laj paab'anel ut koho chiru ha' sa' xjayal Siria rochb'een lix Priscila ut laj Akila. Sa' li tenamit Senkreas koxk'e chi b'ese'k li rismal xb'aan naq wank xyeechi'om re li Qaawa' sa' jurament.#18,18 Cf. Nm 6,1; Hch 21,23-27. 19Naq ke'wulak Éfeso, laj Pablo kixkanab'eb' lix Priscila ut laj Akila, kox'okaq sa' li ch'utleb'aal kab'l ut kixtikib' seeraq'ik rik'ineb' laj Judiiy. 20Eb' a'an ke'xtz'aama chiru naq chikanaaq chik kach'inaq aran, ab'an laj Pablo ink'a' kixk'ul xch'ool, 21kixchaq'rab'iheb' b'an ut kixye: “Wi li Yos naraj, tinsutq'iiq chaq eerik'in”.

Ut ki'elk aran Éfeso. 22Naq kiwulak Cesarea, ki'elk sa' li jukub' ut kitaqe'k chi xk'eeb'al xsahilaleb' xch'ool li Iklees wank Jerusalén; moqon kikub'eek Antiokía.

23Ink'a' k'iila kutan kikanaak aran; chirix chik a'an koho chi xb'eeninkil chi tustu chixjunil xsutam Galacia ut Frigia re xk'eeb'al xkawub' xch'ooleb' chixjunileb' laj paab'anel.

Laj Apolo

24Kiwulak aran Éfeso jun aj judiiy, aj Apolo xk'ab'a', yo'lajenaq Alejandría, chaab'il na'aatinak ut naxnaw chi us xsa' li Santil Hu. 25Tzolb'il sa' xb'e li Qaawa', q'axal naxk'e xch'ool chi aatinak ut naxtzoleb' li tenamit sa' xyaalalil chirix xyu'am li Jesus, us ta ka'ajwi' naxnaw li kub'iha' jo' kixk'ut laj Jwan. 26Kaw xch'ool laj Apolo naq ki'ok chi aatinak sa' li ch'utleb'aal kab'l. Ab'anan naq ki'ab'iik xb'aaneb' lix Priscila ut laj Akila, eb' a'in ke'risi xjunes ut q'axal chi chaab'il chik ke'xch'olob' chiru li xb'e li Yos.

27Laj Apolo kiraj q'axonk Akaya; jo'kan naq eb' laj paab'anel ke'xk'e xkawub' xch'ool ut ke'tz'iib'ak rik'ineb' li rech aj paab'anelil wankeb' aran, re naq che'xk'ulaq chi chaab'il. Ut naq kiwulak aran, q'axal kixtenq'aheb' li ak okenaqeb' chi paab'ank xb'aan rusilal li Yos: 28kaw naxsumeheb' laj Judiiy chiruheb' chixjunil ut naxk'ut xyaalalil rik'in li Santil Hu naq li Jesus a'an li Kriist.

Currently Selected:

Hch 18: QQC

Highlight

Compare

Copy