2 Ko 1
1
Xk'eeb'al sahil ch'oolej
1Laa'in laj Pablo, x'apóstol li Jesukriist jo' x'alaak sa' xch'ool li Yos, nintz'iib'ak, wochb'een laj Timoteo li wiitz'in, rik'in li x'Iklees li Yos li wank Korinto jo'wi' rik'ineb' chixjunil laj santil paab'anel li wankeb' sa' xsutam Akaya.#1,1 Laj Timoteo wan chaq Korinto naq laj Pablo kixk'ojob' aran li Iklees (cf. Hch 18,5). 2Li usilal ut li tuqtuukilal nachalk rik'in li Yos li qaYuwa' ut rik'in li Qaawa' Jesukriist, chiwanq taxaq eerik'in.
3Usilaatinanb'ilaq taxaq li Yos ut xYuwa' li Qaawa' Jesukriist, xb'aan naq a'an li Yuwa'b'ej aj uxtaan ut li Yos q'axal aj k'ojob'anel ch'oolej. 4A'an nak'ojob'ank qach'ool sa' chixjunil li qarahilal re naq tooruuq xk'ojob'ankil xch'ooleb' li wankeb' sa' chixjunil li rahilal, rik'in li xk'ojob'ankil qach'ool li naqak'ul rik'in li Yos. 5Jo' naq numtajenaq li rahilal naqak'ul qochb'een li Kriist, numtajenaq ajwi' li xk'ojob'ankil qach'ool naqak'ul sa' xk'ab'a' li Kriist. 6Wi nokoorahob'tesiik, a'an re xk'ojob'ankil eech'ool ut re eekolb'al naq naqak'ul. Wi nak'ojob'aak qach'ool, a'an re xk'ojob'ankil eech'ool naq naqak'ul: a'an taatenq'anq eere chi xkuyb'al xnumsinkil li rahilal naqakuy laa'o. 7K'ojk'o chi kaw li qoyb'enihom cherix laa'ex ut naqanaw naq, wi yookex chi tz'aqonk sa' li qarahilal anaqwan, taak'ojob'aaq ajwi' leech'ool jo' naqak'ul laa'o.
8Ex was wiitz'in, naqaj naq teenaw li nimla rahilal xqak'ul chaq Asia. Numtajenaq nim chiru li xooruhank xkuyb'al; x'aalo'k sa' qab'een ut xqak'oxla naq ink'a' chik tooxkanab' chi yo'yo.#1,8 Ink'a' naqanaw k'a' chi rahilalil kixk'ul laj Pablo aran (cf. 11,23-27). 9Relik chi yaal naq ak xteneb'aak li kamk sa' qab'een, ab'anan us ajwi' naq xqak'ul chi jo'kan re naq ink'a' xqakawu qach'ool qajunes qib', rik'in b'an li Yos li nawaklesink chi yo'yo eb' li kamenaq. 10A'an xkolok chaq qe chiru li nimla rahilal a'an ut toj yooq chi qakolb'al. A'an kaw wi' li qach'ool naq toj yooq chi qakolb'al, 11wi laa'ex tex'okenq chi tijok chiqix laa'o. Wi naab'aleb' neke'tijok chiqix, naab'aleb' ajwi' te'yoxinq sa' qak'ab'a' chirix li usilal xqamaatani.
K'a'ut naq laj Pablo ink'a' xwulak chi rilb'aleb' laj Korinto
12A'an a'in li k'ojk'o wi' li qach'ool: xnawb'al naq xoowank sa' santilal ut tiikilal sa' li ruuchich'och' a'in sa' xk'ab'a' li Yos, ut q'axal wi' chik naq xoowank sa' eeyanq laa'ex: moko rik'in ta xna'leb' li ruuchich'och', rik'in b'an rusilal li Yos. 13Xb'aan naq li k'aru xqatz'iib'a eerik'in, ka'ajwi' li yookex chi rilb'al ut chi xtawb'al xyaalal. Ut nawoyb'eni 14naq laa'ex li ak xetaw ru xyaalal chiqix, teetaw ru chi us naq laa'o leeloq'al, jo' naq laa'exaq li qaloq'al sa' xkutankil li Qaawa' Jesus.
15Sa' xk'ab'a' a'an xwaj raj xik xb'enwa eerik'in re naq xineek'ul raj xka'sutil; 16xink'oxla xinnume'k eerik'in re xik Macedonia, ut chirix chik a'an xinsutq'iik raj eerik'in, re naq tineerochb'eeni raj kach'inaq re xik Judea.
17Naq xwaj xb'aanunkil a'an, ma ink'a' tab'i' xink'oxla chi us li b'arwan xink'uub'? Malaj nekek'oxla naq yal ruuchich'och'il na'leb' chixjunil li xink'uub' xb'aanunkil, xb'aan naq xb'enwa xinye eere “yaal” ut chirix a'an “ink'a'”? 18Naxnaw chi us li Yos naq li aatin naqaye eere maawa' xb'enwa “yaal” ut chirix a'an “ink'a'”. 19Laj Silvano, laj Timoteo ut laa'in xqapuktesi resil li Kristo Jesus, li Ralal li Yos, eere laa'ex; ut A'an maawa' jun ta yaal ut jun ta ink'a'; junes li yaal b'an kiwank rik'in. 20Chixjunil li kixyeechi'i li Yos, kitz'aqlok ru rik'in li Kriist; jo'kan naq sa' xk'ab'a' A'an naqaye “Amén” re xloq'oninkil ru li Yos. 21A' ajwi' li Yos nak'ehok xkawub' qach'ool qochb'eenex laa'ex sa' xk'ab'a' li Kriist, ut a'an ajwi' kooxyul 22ut kixk'e qeetalil rik'in li xkaaxt,#1,21-22 Li yuluk ut li k'ehok eetalil rik'in li kaaxt a'an reetalil naq laj paab'anel q'axtesinb'il chik sa' ruq' li Yos. kixsi qe sa' li qaanm li Musiq'ej jo' reetalil naq tixb'aanu li xyeechi'om.
23Li Yos nach'olob'ank li yaal chiwix: eeraab'al we naq toj maji' xinwulak Korinto. Li Yos naxnaw ut chinxk'ehaq chi kamk wi ink'a' ninye li yaal! 24Moko naqaj ta taqlank sa' xb'een leepaab'aal, naqaj b'an sumk'anjelak chirix xsahil eech'ool, xb'aan naq kaw xaqxookex chi paab'ank.
Currently Selected:
2 Ko 1: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.