1 Ko 16
16
Xraqik li hu
1Chirix li tenq'aal cho'q reheb' laj santil paab'anel#16,1 A'in li tenq'aal cho'q reheb' laj santil paab'anel aj Jerusalén (cf. Hch 24,17; Ro 15,25-29; 2 Ko 8-9; Gal 2,10). cheb'aanuhaq ajwi' laa'ex li xinchaq'rab'iheb' wi' eb' li Iklees wankeb' Galacia. 2Rajlal domiing li junjunq sa' eeyanq chixk'uulahaq sa' rochoch jo'ch'inal jo'nimal xruhank xxokb'al, re naq ink'a' yooqex chi kub'sink naq toxin'elq laa'in. 3Akaq xinwulak eerik'in, tintaqlaheb' Jerusalén eb' li sik'b'ileb' ru eeb'aan, chi wanq xhuheb', re naq toxe'xq'axtesi li tenq'aal x'alaak sa' leech'ool. 4Ut wi us naq tinxik ajwi' laa'in, wochb'eeneb' naq tooxik.
5Tinwulaq eerik'in naq akaq xinnume'k Macedonia, xb'aan naq Macedonia toxinnume'q. 6Mare toxinkanaaq jun k'amokaq sa' eeyanq; mare toj tinnumsi li hab'alq'e eerik'in, re naq laa'ex tineerochb'eeni kach'inaq toja' yaal tana b'ar tinxik. 7Xb'aan naq ink'a' nawaj naq yal tinnume'q eerik'in, twaj b'an tinwanq jarub'aq kutan sa' eeyanq, wi jo'kan naraj li Qaawa'. 8Aran Éfeso tinkanaaq toj sa' li Pentekostés, 9xb'aan naq xteemank chiwu jun nimla okeb'aal re naq taa'uuchinq aran link'anjel, us ta naab'aleb' li xik' neke'ilok we.
10Wi taawulaq laj Timoteo,#16,10 Chirix laj Timoteo: cf. Hch 16,1; 1 Ko 4,17. cherilaq re naq twanq sa' eeyanq chi maak'a'aq xxiw, xb'aan naq wech aj k'anjelil sa' xk'anjel li Qaawa'. 11Maa'ani chitz'eqtaananq re, chechaq'rab'i b'an sa' tuqtuukil usilal re naq taak'ulunq wi' chik wik'in, xb'aan naq yookin chi royb'eninkil wochb'eeneb' li was wiitz'in.
12Naab'al sut xwelaji ru laj Apolo, li wiitz'in,#16,12 Chirix laj Apolo: cf. Hch 18,24-28. re taaxik eerik'in rochb'eeneb' laj paab'anel; ab'an maak'a' xch'ool chi xik anaqwan. Jo'q'e tana tixk'e rib' chiru, toja' naq taaxik.
13Chexyo'leq, kaw xaqxooqex sa' li paab'ank, chexk'anjelaq jo' tz'aqal winq, kawaqex. 14Cheb'aanu chixjunil rik'in rahok.
15Nekenaw chi us naq li xjunkab'al laj Estéfanas#16,15 Chirix laj Estéfanas: cf. 1 Ko 1,16. a'aneb' xb'een chi paab'ank sa' xsutam Akaya ut xe'xq'axtesi rib' chi k'anjelak chiruheb' laj santil paab'anel. 16Nintz'aama cheru naq chexpaab'anq chiruheb', jo' ajwi' chiru chixjunileb' li neke'okenk chi k'anjelak rochb'eeneb'.
17Nasaho'k linch'ool rik'in xk'ulunik laj Estéfanas, laj Fortunato ut laj Akaiko: eb' a'an xe'wank cho'q eeruuchil naq maa'anihex. 18Xe'xk'ojob' inch'ool jo'wi' leech'ool laa'ex. Chenawaq b'i' roxloq'inkileb' li winq a'an.
19Neke'xtaqla xsahil eech'ool eb' li Iklees re Asia. Neke'xtaqla naab'al xsahil eech'ool, sa' xk'ab'a' li Qaawa', laj Akila ut lix Priska,#16,19 Chirix laj Akila ut lix Priska: cf. Hch 18,2. rochb'eeneb' li Iklees li nach'utlaak sa' rochocheb'. 20Chixjunileb' laj paab'anel neke'xtaqla xsahil eech'ool. Chek'ehaq xsahil eech'ool cherib'il eerib' rik'in li santil utz'uk u.
21Laa'in laj Pablo nintz'iib'a xsahil eech'ool rik'in wuq'.
22Ani ink'a' naxra li Qaawa', tz'eqtaananb'ilaq chi junajwa! Maraná tha.#16,22 Sa' aatinob'aal arameo Marán athá naraj naxye: Li Qaawa' xk'ulunk. Ut Maraná tha naraj naxye: Kim, at Qaawa' (cf. Ap 22,20).
23Li rusilal li Qaawa' Jesus chiwanq taxaq eerik'in! 24Nekexinra chejunilex sa' xk'ab'a' li Kristo Jesus.
Currently Selected:
1 Ko 16: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.