2 Ko 12

1Maak'a' tinra chirix naq tinnima wib'; ab'an wi tento tinb'aanu, tinseeraq'i eere li wilom ut li k'utb'esinb'il chiwu xb'aan li Qaawa'. 2Ninnaw ru jun li winq aj paab'anel re li Kriist,#12,2 A'an li apóstol Pablo. kaalaju chihab' anaqwan xsaapuuk toj sa' rox xk'ojaril li choxa (ink'a' ninnaw ma chi yo'yo malaj yal sa' moy u; li Yos nanawok re). 3Ut ninnaw naq li winq a'an (ma chi yo'yo malaj yal sa' moy u: ink'a' ninnaw, li Yos nanawok re) 4xsaapuuk toj sa' li sahil na'ajej ut xrab'i li aatin li maa'ani naru xyeeb'al: ramro chiru yalaq ani aatinak chirix. 5Sa' xk'ab'a' li winq a'an naru raj tinnimob'resi wib'; ab'an laa'in ka'ajwi' sa' xk'ab'a' xmajelal inmetz'ew tinnima wib'.

6Wi ta twaj xnimankil wib', moko maak'a'aq ta raj inna'leb', xb'aan naq tinye raj li yaal. Ab'anan ink'a' tinb'aanu: mare anchal ani junaq tixk'oxla naq laa'in q'axal nim inwankil chiru li b'arwan naril malaj narab'i chiwix.

7Jo'kan utan, re naq ink'a' tinnimob'resi wib' xb'aan li q'axal loq' xk'utb'esiik chiwu, xk'eemank jun li tiq'leb' sa' linjunxaqalil, jun xtaql laj tza xpaq'lenk we chi ruq', re naq ink'a' tinnimob'resi wib'.#12,7 Li tiq'leb' a'an jun rahilal k'eeb'il re li apóstol xb'aan jun aj tenq' re laj tza: mare jun nimla yajel malaj li rahob'tesiik xb'aaneb' laj Judiiy (cf. Ro 9,8). 8Ox wa xintz'aama chiru li Qaawa' naq chinajto'q wik'in. 9Ab'an a'an xye we: “Tz'aqal cho'q aawe li wusilal, xb'aan naq linwankil tz'aqal nak'utunk sa' xmajelal li metz'ew”. Jo'kan utan, chi anchal inch'ool toj tinnima wib' sa' xmajelal inmetz'ew, re naq taahilanq wik'in li xwankil li Kriist. 10Nasaho'k sa' inch'ool sa' xmajelal inmetz'ew, rik'in li hob'e'k, rik'in li wank sa' rajb'al ru, rik'in li rahob'tesiik ut li raaxiik' k'ulb'il sa' xk'ab'a' li Kriist, xb'aan naq jo'q'e maak'a' inmetz'ew, toja' naq q'axal kaw wib'.

11Xkaano' wu, ab'an laa'ex xexminok wu. Laa'ex raj li xexnimank inloq'al, xb'aan naq tik moko kub'enaq ta inwankil chiruheb' li “xninqaleb' ru apóstol” a'an, us ta laa'in maak'a' inwankil. 12Li reetalil li tz'aqal apóstol xk'utunk sa' eeyanq: rik'in chixjunil li kuyuk, rik'inatq eetalil, sachb'ach'oolej ut xninqal ru b'aanuhom. 13K'aru kok'ex wi' chiruheb' li Iklees junch'ol? Ka'ajwi' rik'in naq ink'a' xexinch'i'ch'i'i. Chekuyaq inmaak wi ink'a' us xinb'aanu.

14K'ehomaq reetal, ak rox wa naq ninkawresi wib' chi xik eerik'in, ut ink'a' texinch'i'ch'i'i xb'aan naq ink'a' ninsik' li k'aru eere, laa'ex b'an li nekexwaj. Relik chi yaal naq maawa'eb' li alal k'ajolb'ej teneb'anb'il sa' xb'eeneb' tamresink tumin cho'q reheb' li xna' xyuwa', a'eb' b'an li na'b'ej yuwa'b'ej tento te'tamresinq tumin cho'q reheb' li ralal xk'ajol. 15Chi anchal inch'ool tinsach li k'aru we ut tinq'axtesi linyu'am re reechaninkil leeraanm. Ut wi laa'in q'axal nekexinra, ma us naq kach'in ajwi' tineera laa'ex?

16Relik chi yaal naq maa'ani xinch'i'ch'i'i; ab'anan wan neke'yehok naq rik'in xseeb'al inch'ool xexinb'alaq'i. 17Ma xexinb'alaq'i tab'i' xb'aan junaq reheb' li xintaqlaheb' eerik'in? 18Xinb'oq laj Tito ut xintaqla eerik'in rochb'een li qiitz'in jun chik. Ma xexxb'alaq'i tab'i' laj Tito? Ma ink'a' tab'i' xook'anjelak chi juntaq'eet li qana'leb' ut li qak'a'uxl?#12,18 Cf. 2 Ko 8,18.22.

Laj Pablo naraj xik wi' chik Korinto

19Mare ak junxil xex'ok chi xk'oxlankil naq yooko chi xpatz'b'al qakuyb'al cheru. Ab'anan moko jo'kan ta: nokoo'aatinak chiru li Yos sa' xk'ab'a' li Kriist. Ut chixjunil a'in, ex was wiitz'in raarookex inb'aan, yal re xkab'lankil leekomonil naq ninye. 20Relik chi yaal naq yo inxiw: mare anchal tinwulaq eerik'in chi ink'a' toxexintaw jo' nawaj laa'in, chi moko tineetaw laa'ex jo' chanru raj teeraj. Mare toxintaw jachok ib', kaqalink, josq'il, wech'ij ib', q'ab'ank, molok aatin, q'etq'etil, po'oj ib'. 21Ninxiwak naq, sa' linwulajik, linYos tixkub'si wi' chik inwankil sa' eeyanq: mare tinyaab'aq chirixeb' naab'al li xe'maakob'k junxil ut ink'a' xe'xjal xk'a'uxl chirix li maa'usilal xe'xb'aanu, jo'wi' chirix li ko'b'eetak yumb'eetak ut tz'i'b'eetalil.

Currently Selected:

2 Ko 12: QQC

Highlight

Copy

Compare