2 Kr 2
2
Li xsumwank laj Salomón rik'in laj Jirán
(1 R 5,1-18; 7,13-14)
1Laj Salomón kixtaqla xyiib'ankil li rochoch li Qaawa' jo' ajwi' jun li ochoch cho'q re a'an. 2Jo'kan naq kixsik'eb' ru lajeeb' xkaak'aal mil (70,000) chi aj paqonel ut kaak'aal mil (80,000) chi aj sik'ol pek sa'eb' li tzuul, ut kixxaqab' b'eleeb' o'q'ob' (3,600) chi winq li te'iloq re li k'anjel.
3Chirix chik a'an laj Salomón kixtaqla xyeeb'al re laj Jirán, awab'ej re Tiro: “B'aanu wik'in li xab'aanu rik'in laj David linyuwa', naq xataqlaheb' chaq naab'al li che' yaw, re kixyiib' jun rochoch b'arwi' kiwank. 4K'e reetal, twaj xkab'lankil jun rochoch li Qaawa' linYos re naq q'axtesinb'ilaq cho'q re A'an, jo' ajwi' re xk'atb'al sununkil ensens chiru, re xmayejankil rajlal li loq'laj wa ut xyeechi'inkil k'atb'il xul eq'la ut ewu, sa' li kutan sábado, sa' xyo'lajik li po ut sa'atqeb' chik jalan ninq'e sa' xk'ab'a' li Qaawa' li qaYos, jo' junelik na'uxmank Israel. 5Ut li ochoch ok we xkab'lankil nimaq chi us, xb'aan naq li qaYos jwal nim chiru chixjunileb' li jalanil yos. 6Ab'an ani taaruhanq chi xkab'lankil jun rochoch li Qaawa'#2,6 1 R 8,27; 2 Kr 6,18. wi li xnimal li choxa ink'a' tz'aqal cho'q xna'aj? Ut anihin laa'in chi xkab'lankil jun rochoch li Yos, us ta yal re xk'atb'al li pom sa' xk'ab'a'? 7Nintz'aama usilal chawu, taqla chaq junaq aj k'anjel tzolb'il chi us chi xk'anjelankil li plaat ut li oor, q'anch'iich' ut kawil ch'iich', li naxnaw k'anjelak rik'in li chaab'il t'ikr, kaq, q'an ut moraad xb'onol. Ut tixnaw ajwi' let'exink che', rochb'eeneb' laj k'utunel li wankeb' chi k'anjelak chiwu Judá ut Jerusalén, a'eb' li sik'b'ileb' ru xb'aan laj David linyuwa'. 8Taqla ajwi' chaq we li che' yaw, saqichaj ut chakalte'. Ninnaw naq eb' laj k'anjel chawu neke'xnaw setok che' aran Líbano. Ut laa'in tintaqlaheb' li neke'k'anjelak chiwu re te'xtenq'aheb' 9chi xsetb'al ut xch'utub'ankil naab'al li che', xb'aan naq q'axal nimaq ut chaq'alaq ru li ochoch tinyiib'. 10Tink'e reheb' laj k'anjel chawu, li te'setoq che', naab'al li triiw, li seb'aad, li b'iin ut li aseeyt”, chan laj Salomón.
11Toja' naq laj Jirán, awab'ej re Tiro, kixtaqla jun li hu re laj Salomón li awab'ej, b'arwi' kixye re: “Li Qaawa' xatxxaqab' cho'q awab'ej re Israel, xb'aan naq naxra li xtenamit”. 12Ut kixye ajwi' sa' li hu: “Usilaatinanb'il taxaq li Qaawa', xYos laj Israel, aj Winqob'resihom re li choxach'och', xb'aan naq kixk'e re li awab'ej David jun ralal tiik xch'ool, wank xna'leb' ut seeb' xk'a'uxl, li tixyiib' rochoch li Qaawa' ut jun xna'aj li awab'ej! 13Jo'kan utan tintaqla aawik'in jun li winq wank xnawom ut xna'leb', a' laj Jirán-Abí, 14xyum jun li ixq aj Dan ut li xyuwa' a'an xkomoneb' laj Tiro. Naxnaw chi us xk'anjelankil li plaat ut li oor, li q'anch'iich' ut li kawil ch'iich', li pek ut li che'; naxnaw ajwi' xk'anjelankil li chaab'il t'ikr, kaq, q'an ut moraad xb'onol, li liin ut li chaab'il noq'. A'an naxnaw ajwi' let'exink a' yaal chanru taawaj, ut tixb'aanu jalan jalanq chi k'anjel na'ajmank ru, rochb'eenaqeb' laj k'anjel chawu ut eb' li ke'wank chaq rik'in li awab'ej David laayuwa'. 15Jo'kan naq chataqla chaq rik'ineb' laamoos li triiw, li seb'aad, li aseeyt ut li b'iin li xayeechi'i laa'at, at awab'ej. 16Ut laa'o taaqaset chixjunileb' li che', jo'ch'inal jo'nimal taak'anjelaq chawu, ut sa' xb'een poyte' taaqataqla chiru palaw toj Jope. Chirix chik a'an laa'at tatk'amoq re chixjunil aran Jerusalén”, chan laj Jirán.
17Moqon chik laj Salomón kirajlaheb' laj ab'l tenamit li wankeb' Israel, jo' kixb'aanu laj David li xyuwa', ut kik'utunk naq wankeb' oxlaju xwaqxaqk'aal mil rik'in lajeek'aal xkab' o'q'ob' (153,600) chi winq. 18Sa' xyanqeb' a'an kixxaqab' lajeeb' xkaak'aal mil (70,000) aj paqonel, kaak'aal mil (80,000) aj sik'ol pek sa'eb' li tzuul ut b'eleeb' o'q'ob' (3,600) li te'iloq re li k'anjel te'xb'aanu li tenamit.
Currently Selected:
2 Kr 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.