1 Ti 1

Xk'eeb'al sahil ch'oolej

1Laa'in laj Pablo, x'apóstol li Kristo Jesus, jo' chanru rajom li Yos laj Kolol qe#1,1 Li aatin aj Kolonel sa'eb' li Cartas Pastorales (a'aneb' 1-2 Ti ut Tito) wan naq nayeemank chirix li Yuwa'b'ej (1 Ti 2,3; 4,10; Tit 1,3; 2,10; 3,4), wan ajwi' naq nayeemank chirix li Jesukriist (2 Ti 1,10; Tit 1,4; 3,6). ut li Kristo Jesus li qasahil oyb'enihom, 2nintz'iib'ak aawik'in, a Timoteo, tz'aqal walalat sa' li qapaab'aal. Chiwanq taxaq aawik'in li usilal, li uxtaanal ut li tuqtuukilal nachalk rik'in li Yos Yuwa'b'ej ut rik'in li Kristo Jesus, li Qaawa'.

Eb' laj b'alaq'

3Naq kohin Macedonia, kintz'aama chawu naq tatkanaaq Éfeso re xq'usb'aleb' li wankeb' aran, naq ink'a' che'k'utuq jalanil na'leb', 4chi moko chixik xch'ooleb' chirix b'alaq'il seeraq', jo'wi' chirix xwech'inkil rix li xxe' xtoonaleb': chixjunil a'in maak'a' roso'jik. Li na'leb' a'in nak'amok chaq wech'ij ib' ut ink'a' na'okenk sa' xnimal xk'a'uxl li Yos, li k'ojk'o sa' li paab'aal.

5Li xyaalal li chaq'rab' a'in, a'an naq chiqara qib' chiqib'il qib' rik'in li rahok na'alaak sa' saq ru ch'oolejil, sa' li tiikil k'a'uxl ut li tz'aqal paab'ank. 6Wankeb' xe'elk sa' li b'e a'in ut xe'sachk xb'aan naq neke'xb'ay rib' rik'in seeraq' maak'a' na'ok wi'; 7neke'raj wank cho'q aj tzolonel sa' li xChaq'rab' li Yos, ab'an ink'a' neke'xtaw xyaalal li neke'xye ut neke'xch'olob' chi kaw.

Li xk'anjel li Chaq'rab'

8Laa'o naqanaw naq li Chaq'rab' a'an chaab'il wi naqapaab' jo' chaq'rab': 9ak ch'olch'o chiqu naq li Chaq'rab' moko k'eeb'il ta cho'q reheb' li tiikeb' xch'ool, reheb' b'an li ink'a' neke'raj ab'ink ut aj q'etoleb' aatin, reheb' ajwi' li ink'a' useb' xna'leb' ut aj maakeb', eb' li ink'a' neke'xpaab' li Yos ut aj muxuneleb' paab'aal, eb' li neke'xkamsi xna' xyuwa' malaj ras riitz'in, 10eb' laj ko'b'eet laj yumb'eet, eb' li neke'maakob'k rik'in rech winqilal rech ixqilal ut neke'xk'ayi ras riitz'ineb', eb' laj tik'ti' ut eb' li neke'xpatz' li Yos rik'in yoob'anb'il aatin; naraj naxye, reheb' chixjunil li xik' neke'ril li qachaab'il k'utum, 11li wank sa' xk'ab'a' li xChaab'il Esil li loq'laj ut usilaatinanb'il Yos, jo' chanru q'axtesinb'il we.

Li xb'oqb'al laj Pablo

12Ninb'anyoxi re li xk'ehok xkawub' inch'ool, a' li Kristo Jesus li Qaawa', naq xk'ul xch'ool inxaqab'ankil chi k'anjelak.#1,12 Cf. Hch 9,15; 1 Ko 15,9-10; Gal 1,13-16. 13Ut laa'in aj majewanel naq kinwank chaq junxil, aj rahob'tesinel ut aj hob'onel; ab'an li Yos kiruxtaana wu xb'aan naq xmajelal inna'leb' kinb'aanu wi' a'in, naq toj maji' nin'ok chaq chi paab'ank. 14Ut li rusilal li Qaawa' q'axal xnumtaak wik'in xb'aan naq xk'e we li paab'ank ut li rahok li nachalk rik'in li Kristo Jesus.

15Li aatin a'in tz'aqal yaal ut paab'ajel cho'q re chixjunileb': naq li Kristo Jesus kik'ulunk sa' ruuchich'och' re xkolb'aleb' laj maak; ut laa'in li xb'een sa' xyanqeb'. 16Ut a'in xyaalal naq li Yos kiruxtaana wu: re naq li Jesukriist xb'enwa wik'in tixk'utb'esi chixjunil li xnimal xkuyum, jo'wi' re xk'amb'al xb'e chixjunileb' li te'paab'anq re naq te'reechani li junelik yu'am.

17Li Rey li wank xwankil chi junelik q'e kutan, a' li Yos li ink'a' nakamk, ink'a' ilb'il ru ut jun chirib'il, chinimaaq xloq'al ut loq'oninb'ilaq taxaq junq'e junq'e kutan. Jo'kan taxaq.

Li teneb'anb'il sa' xb'een laj Timoteo

18A'an a'in laachaq'rab'inkil inb'aan, at walal Timoteo, jo' chanru yeeb'il chaq chawix junxil xb'aan raatineb' li propeet.#1,18 Eb' li propeet ke'ok chi aatinak chirix laj Timoteo naq a'an kixaqab'aak cho'q aj k'anjel sa' li Iklees (cf. 1 Ti 4,14; 2 Ti 1,6; Hch 13,1-4). Sa' xk'ab'a'eb' a'an chayal aaq'e chi xb'aanunkil li chaab'il k'anjel a'in; 19chiwanq aapaab'aal ut tiikaq laach'ool. Wankeb' ke'sachk chi junajwa sa' xpaab'aaleb' xb'aan xtz'eqtaanankil li chaab'il k'a'uxl. 20Sa' xyanqeb' a'an wankeb' laj Himeneo ut laj Alejandro;#1,20 Chirix laj Himeneo: cf. 2 Ti 2,17. Chirix laj Alejandro: cf. 2 Ti 4,14. a'ut laa'in ak xinq'axtesiheb' sa' ruq' laj tza re naq te'xtzol naq ink'a' raj xe'xmajewa li Yos.

Currently Selected:

1 Ti 1: QQC

Highlight

Copy

Compare