1 Ko 10

Eb' laj Israel ke'xtz'eq xmaataneb'

1Ex was wiitz'in, twaj teenaw naq eb' li qana' qayuwa' chixjunileb' ke'wank chaq rub'el li choql ut chixjunileb' ke'nume'k sa' li palaw. 2Chixjunileb' ke'kub'siik xha' sa' li choql ut sa' li palaw#10,2 Chirix li choql: cf. Ex 13,21-22; 14,19. Chirix li palaw: cf. Ex 14,22-29. re xtaaqenkil laj Moisés, 3ut chixjunileb' ke'tzekank rik'in jun chi musiq'ejil tzekemq.#10,3 Chirix li maná: cf. Ex 16,4-35; Dt 8,3; Sal 78,24-29. 4Chixjunileb' ajwi' ke'uk'ak rik'in jun chi musiq'ejil uk'a',#10,4 Chirix li ha' ki'elk chaq sa' li saqoonak: cf. Ex 17,5-6; Nm 20,7-11; Sal 78,15. xb'aan naq neke'uk'ak rik'in li musiq'ejil saqoonak li yo chi taaqenk reheb'; ut li saqoonak, a'an li Kriist. 5Ab'an q'axal naab'al reheb' a'an ink'a' kiwulak chiru li Yos li xna'leb'eb', ut ke'kanab'aak chi kamenaqeb' sa' li chaqich'och'.#10,5 Nm 14,16.29-30.

6Chixjunil a'an kik'ulmank jo' loq'laj eetalil cho'q qe, re naq ink'a' tqarahi ru li ink'a' us kama' naq eb' a'an ke'xrahi chaq ru. 7Mex'okenk chi xloq'oninkil li yal k'oxlanb'il yos jo' wan ke'b'aanunk chaq sa' xyanqeb' a'an, kama' tz'iib'anb'il sa' li Santil Hu: “Eb' li tenamit ke'chunlaak chi wa'ak chi uk'ak, ut chirix a'an ke'wakliik chi xajok ut chi maakob'k”.#10,7 Ex 32,6. 8Mooko'b'eetak jo' ke'xb'aanu eb' a'an, ut ke'kamk oxib' xka'k'aal mil chiru jun kutan. 9Miqayal rix li Qaawa', jo' wan ke'b'aanunk sa' xyanqeb' a'an, ut ke'sache'k xb'aaneb' li k'anti'. 10Chi moko choowech'oq, jo' wan ke'b'aanunk sa' xyanqeb' a'an, ut ke'sache'k xb'aan laj Sachonel.#10,10 A'an li ánjel aj sachonel (cf. Ex 12,23).

11Chixjunil a'an kichalk sa' xb'eeneb' jo' loq'laj eetalil, ut kitz'iib'aak re xk'eeb'al qana'leb' laa'o li wanko sa' roso'jikeb' li kutan. 12Jo'kan utan, li naxk'oxla naq kaw xaqxo, chirilaq rib' mit'ane'k. 13Maji' nachalk sa' eeb'een junaq aaleek q'axal nim chiru li neke'xk'ul chixjunileb'. Li Yos naxb'aanu li xyeechi'i, ut ink'a' texxkanab' chi aaleek jo' ink'a' truuq teekuy. Rik'in li aaleek, li Yos tixk'e ajwi' eere chanru teekuy re naq us tex'elq.

Li xsek' li Qaawa' ut li xsek'eb' li maa'us

14Jo'kan utan, ex was wiitz'in raarookex inb'aan, tz'eqtaanahomaq li jalan loq'onink.#10,14 Gal 5,20; 1 Jn 5,21. 15Yookin cheraatinankil jo'kex li wankeb' xna'leb'. Ut laa'ex naru teeye ma us li ninye malaj ink'a'. 16Li osob'tesinb'il sek' nokooyoxink wi'#10,16 A'an ajwi' kixb'aanu li Jesus sa' li xchaq'rab'ik wa'ak (11,25). ma maawa' tab'i' a'an li sumwank rik'in xkik'el li Kriist? Ut li wa naqajachi ma maawa' tab'i' a'an li sumwank rik'in xtz'ejwal li Kriist? 17Wank jun ajwi' chi wa; jo'kan naq, us ta naab'alo, ab'an junaj chi tz'ejwalej naq wanko, xb'aan naq chiqajunilo nokootz'aqonk rik'in li jun chi wa.

18K'ehomaq reetal li tenamit Israel. Eb' li neke'tzekank re li namayejaak, ma ink'a' tab'i' neke'tz'aqonk rik'in li artal? 19K'aru xyaalal li yookin chi xyeeb'al? Ma yookin chi xyeeb'al naq li k'aru mayejanb'il chiruheb' li yal k'oxlanb'il yos wank xyaalal malaj naq eb' li yal k'oxlanb'il yos wankeb' xyaalal? 20Ink'a', ninye b'an naq li k'aru neke'xmayeja eb' li ink'a' neke'xpaab' li Kriist, chiruheb' li maa'us neke'xmayeja ut ink'a' chiru li Yos.#10,20 Dt 32,17; Sal 106,37; Bar 4,7. Ut laa'in ink'a' nawaj naq yooqex chi tz'aqonk rik'ineb' laj tza.

21Ink'a' naru teeruk' xsa' li xsek' li Qaawa' ut xsa' xsek'eb' li maa'us. Ink'a' naru textz'aq rik'in li xmeex li Qaawa' ut rik'in xmeexeb' li maa'us. 22Malaj tqaj xyoob'ankil xsowenal li Qaawa'?#10,22 Cf. Dt 32,16.21. Li Qaawa' a'an jun Yos aj sowen (cf. Ex 20,5; Dt 32,21; Os 2). Ma q'axal kawo tab'i' laa'o chiru li Yos?

Xtawb'al xyaalal

23“Chixjunil naru ninb'aanu!”, ab'an moko chixjunil ta us xb'aanunkil. “Chixjunil naru ninb'aanu!”, ab'an moko chixjunil ta nakab'lank li komonil. 24Maa'ani chixsik' li k'aru us cho'q re xjunes, a'aq b'an li us cho'q re li ras riitz'in chixsik'.

25-26Li Qaawa' a'an laj eechal re li ruuchich'och' jo'wi' chixjunil li wank chisa'.#10,26 Sal 24,1; 50,12. Jo'kan naq naru teetzeka chixjunil li nak'ayimank sa' k'ayiil chi ink'a' teepatz'i b'ar xchalk, re naq maak'a'aq eek'a'uxl naq teetzeka.

27Wi junaq ink'a' napaab'ank texxb'oq chi tzekank ut wi naxk'ul eech'ool xik rik'in, tzekahomaq jo'ch'inal jo'nimal li taak'ehe'q eere chi ink'a' teepatz'i b'ar xchalk xb'aan xq'unal eech'ool. 28Ab'an wi junaq taayehoq eere: “A'in xmayejaak chiruheb' li yal k'oxlanb'il yos”, meetzeka xb'aan li xyehok eere, jo'wi' re naq ink'a' taa'ok xk'a'uxl. 29Ink'a' yookin chi xyeeb'al a'in chirix laak'a'uxl laa'at, chirix b'an xk'a'uxl li jun chik, xb'aan naq chan put ru naq twech'iiq wix laa'in li wankin chi ach'ab'anb'il, xb'aan jalan aj k'a'uxl? 30Wi laa'in ninyoxink chirix li xintz'aqk, k'a'ut naq tinq'useq' rik'in li k'aru ninyoxi?

31Jo'kan utan, wi texwa'aq tex'uk'aq malaj k'a'aq chik re ru teeb'aanu, b'aanuhomaq chixjunil re xloq'oninkil ru li Yos. 32Meeluktesi xch'ooleb' laj Judiiy chi moko eb' laj Griego malaj li x'Iklees li Yos, 33jo' naq laa'in ninyal inq'e chi xk'ojob'ankileb' xch'ool chixjunileb' rik'in chixjunil. Ink'a' ninsik' li k'aru us cho'q we injunes, a' b'an li us cho'q re chixjunileb', re naq te'kole'q.

Currently Selected:

1 Ko 10: QQC

Highlight

Copy

Compare