Film 1
1
Pablo ichene len'okhayaj häp Filemón lhäy'e Dios leles iyhäj
1Amtena ipuhfwa Filemón tä ahäpe och'otfwayej Dios lechumet, olham Pablo tä õhp'o n'ohi'pe Cristo Jesús, ochen ame olhämetna, olham lhäy'e lhapuhfwa Timoteo. 2Häte ochene Apia, häp atsinha tä lhapuhfwa, lhäy'e Arquipo,#Col 4.17 häp lhat'unfwa tä y'awo lhaka'tshayaja'pe Cristo, lhäy'e amel tä Dios leles iyhäj tä lhaihutpejwek tä ihi Filemón lew'et.
3Is chik Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.
Häpet Filemón lehumnhayaj lhäy'e t'ekhahyaj
4Ipuhfwa Filemón, tä owopej ot'alhyaja, ontichunpej hach'oye wet owo graciasayej oka Dios. 5Tsi otoynej ame ahumnhayaj tä letiyej nilhokej Dios laka wichi lhäy'e ekhahyaj tä letiyej Lhawuk Jesús. 6Wet tä oläte tä let'ekhaye mälhyej iwoye olhamel, oy'alhyen ame Dios yämlek nem koyhyaj tä letäfwelej häp m'ayhay tä ischehen tä in'amejen, häp tä isej Cristo Jesús. 7Ipuhfwa, wuj tä olhaikhajyen wet okäjyaj ihi tä otoyne tä wuj tä lehumin Dios leles, tsi matche tä lekäsyenwethä lehusey.
Pablo lhaip'altseneje Filemón häp lakawo Onésimo
8-9Tä mälhyejtso tä ahäpe hin'o tä ahumnhatsaj, olhaip'altsen ame athana. Tej tä ohäpe Cristo laka apóstol, ofwenhit'a amho olhämet tä oyok, “Woye m'ak tä one'tek lewoye.” Mat oyok, Olham Pablo tä othaläkwfwaj t'at, lhäy'e tä õhp'o n'ohi'pe Cristo Jesús, 10olhaip'altsenej ame häp n'aelh tä lhayen olhäsayej Cristo tä oihi n'op'onthina, oyäme Onésimo.#Col 4.9
11Ifwalas tä pajche lham häpe akawo tä achäjek tä tek aisej. Mat athana nech'e olham lhäy'e am n'aisej t'at häp lham.#1.11 Häp n'olhey Onésimo yok, Elh tä oisej. 12Oyachaj ame, hätet iwoyek ochen ame ohusek. 13Ot'uhin'ehläk it n'oyej häpkhin'ek tach'ot n'oye tä õhp'o n'ohi'pe Dios Silätyaj, tejin'ek kahäpeya am. 14Mat otch'anlhayej ame täjtso, häpkhilek m'ak chik lewoye häpkhit'a m'ak tä olham tä onityen amej, mat häpe m'ak tä am t'at tä anech'ethayaj tä lewoye.
15Oyenek häpe t'at täja m'ak tä tamenej p'ante tä Onésimo nem i'amej ayej, häpkhilek i'amej athana wet lajit lepesa. 16Nemhit häte iwoye akawo tä achäjek, mat inu'pe täjtso, häpe t'at apuhfwa tä lehumin. Olham wuj tä ohumin, mat am nemla koyhyaj tä lehumin, tsi aelh t'at wet apuhfwayej Lhawuk.
17Tä mälhyejtso, chik lhenn'o hat'unfwaya n'oyej Lhawuk, chumlä lham, tech'aynej chik olham t'at tä letachum n'ohlä. 18Chik iche m'ak tä ni'isa tä iwoyej p'ante ame, wok letujlhaye'pe m'ak at chik häpe, alh n'oye'pe olham. 19Olham Pablo olesayen olhämetna, oyok, Olhamlak otiskanpe. ¡N'am t'uhläk ofwel amho tä häte am iche t'at m'ak tä is chik lew'en n'oho atape!
20Eh ipuhfwa, tä ahäpe Lhawuk lhäs, woye t'at m'ak tä ot'alhej amena, wet käjyenlhi ohusek tä ahäpe opuhfwayej Cristo. 21Ochen ame olhämetna häp tä ohanej tä lewohiyela t'at, wet äp lenuhthila'pe m'ak tä ot'alhej amena.
22Iche m'ak elh. Is chik lewaklhat n'oho ow'et chik oihla'ayejchufwi. Tsi oyenek oisej häp amel alhyajay wet Dios isiyakaynhilan'o amehen.
Lepes Pablo lhämet
23Epafras#Col 1.7; 4.12 tä otan'isfwa tä õhp'o n'ohi'pe Cristo Jesús, lham ichen ame len'okhayaj. 24Häte Marcos,#Ap.Lh 12.12,25; 13.13; 15.37-39; Col 4.10 Aristarco,#Ap.Lh 19.29; 27.2; Col 4.10 Demas,#Col 4.14; 2~Tim 4.10-11 lhäy'e Lucas, häp lhamel tä tach'ote ochumet.
25Is chik Lhawuk Jesucristo lep'altsenyaj ihiche nilhokej amel ahusey.
Currently Selected:
Film 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.