Luc 1
1
1-4Teófilo:#Ap.Lh 1.1 Ochen ame olhämetna tä ahäpe elh tä lewujyaj ihi. Ot'uhläk wuj tä lehanej tä matche t'at häp m'ayhay p'ante in'oyejen tä pajche õ'chufwen amej. Wujpe iyhäj tä t'uhläk ikalelhätchä m'ayhaytso, wet lhamel itihi lelesaynhay häp m'ak tä wichi tä hiw'enpe ifwenho olhamel. Tsi wichina matche tä hiw'enpe nilhokej m'ayhaytso, tälhe tä iwo tesa, wet yen at silätyaja. Tä mälhyejtso, tä olham pajche lhäy'e lhip tä olhaichufwenej tähestso, ow'en tä is che olhamtej olesayen m'ak tä kalelhäj, tälhe tä ichun pajtha nichäte lepes. Wet häp täja m'ak tä ochen amena.
Ángel yäme Juan Bautista tä nech'e ihichela
5Häp lewhäy p'ante hin'o tä lhey Herodes#1.5 Herodes tä Lhamya. niyatej honhat tä Judea, iche p'ante sacerdote tä lhey Zacarías, lham häpe t'at sacerdotes tä Abías lhayis elh p'ante. Wet lech'efwa lhey Elisabet, tälhe Aarón lhayis p'ante. 6Häp lham lhäy'e lech'efwa inukwe t'at Dios len'äyij, lhamel iwoye nilhokej Lhawuk lhämtes wet nehit katsik ihanej iwoyneje che yen tesayej m'ak at che häpe. 7Mat leles ihihit'a, tsi tälhe tä Elisabet lhutsha, sufwnaj t'at, yäk wuj tä thänhäy lhamel.
8Wet nichäte p'ante lewhäy tä sacerdotes tä Abías lhayis tachumhilhi Dios Lew'et tä ihi Jerusalén. 9Wet lhamel lakey tä iwo sorteaya, wet yiwete Zacarías yämlek ihochufwi Lech'o Elh tä N'ot'amajchet häpkhilek iwunho incienso. 10Wet tä iwunho, nilhokej wichi i'alhoye tä iwo let'alhyaja. 11Wet ángel tä tälhe Lhawuk lhain'ältej Zacarías, takasit tä ihi lhip tä lefwomkat häp altar tä incienso lew'et tä õ'wun. 12Tä Zacarías hiw'en, inuhat lhamho, wuj tä nowaye. 13Mat ángel tahuyej wet yok:
–Zacarías, yej noway, tsi Dios iläte t'at alhyaj tä lewoyepej, wet hach'efwa Elisabet iwohla lhäsa. Ena lheya Juan. 14Akäjyaj tapohla amej, wet wujla'pe wichi che akäjejlhi che nech'e iche, 15tsi Lhawuk yenhiyela hin'o tä len'ohyaj ihi. Iyähiyejt'ala vino wok hat'es che häpe,#Núm 6.2-3 wet Espíritu tä Dios T'amajchet tapohiyeja tälhe tä ihi lako kachowej. 16Wet inachajiyela wujpe Israel lhayis häp Lewuk Dios. 17Wet hätehlat iwoye profeta Elías p'ante, n'okhajyhayaj p'ante iyej häpkhilek iyej, wet ichunlach'oye Lhawuk, häpkhilek inityenej wichi yämlek lha'isyene leles#Mal 4.5-6 wet kachuhantses iwoye m'ak tä wichi tä isen iwoye. Mälhhiyejatso Juan lechumet, tä iwaklhat wichi yämlek ichumlä Lhawuk.
18Zacarías tay'ätshane ángel wet yok:
–¿Chiwoye, atsi m'ak tä tach'ot n'oye yämlek ohanej tä matche täjtso? Tsi olham och'ut, och'efwa häte hich'ut t'at.
19Ángel nichulho wet yok:
–Olham ohäpe Gabriel,#Dan 8.16; 9.21 otch'ote Dios lechumet. Lham t'at tä ichenn'o ame yämlek ofwel amho lesilätyaj tä isilatajna. 20Mat tä lekachu olhämet, nemla letahuy pajla'tha nichäte lewhäy che lhayäm matche tähestso.
21Wet wichi tä i'alhoye tä iniwhihlä Zacarías, lhamel tay'ätshan lhamehen tä yok:
–¿Atsi m'ak tä tamenej tä pajlä Zacarías che inuphä tä ichufwi Lhawuk Lew'et?
22Tä paj wet inuphä t'at, mat nemhit tahuy, wet wichi nitäfwelej tä lew'enek ihin'e tä ichufwi Lhawuk Lew'et. Wet ichumyenlhi takweyey tä yämhoplhi lhamel, tsi nemhit lepak ihi.
23Wet tä nichäte ifwala tä ileyej ayej lechumet tä ihi Lhawuk Lew'et, yäple lew'et. 24Tä tajyäme ifwalastso, nech'e hich'otshan häp lech'efwa Elisabet, wet cinco meses tä ninuyaphä tä ichufwi lewukwe. Wet letichunhayaj yok, 25“Häp Lhawuk hip'altsenn'o athana, häpkhilek wichi nemhit iläkwlhin'o.”
Ángel yäme Jesús tä nech'e ihichela
26Tä tajyäme seis meses p'ante tä hich'otshan Elisabet, Dios ichene laka ángel Gabriel häp hupuy tä lhey Nazaret tä ihi honhat lhip tä Galilea, 27ne'tek ihoye atsinha lhutsha tä lhey María. Lham kamaj lhakn'ajayej hin'o che häpe, mat pajche kalelhäj tä yenla lech'efwaya hin'o tä lhey José, häp rey David p'ante leles tä lepes lhele elh. 28Wet ángeltso tiyäjchufwi hup tä María ichufwi, wet tahuyej tä yok:
–¡Amtena! ¡Lhawuk i'amej! ¡Dios tatshupiyej ame lep'altsenyaj!
29Tä lhutsha iläte lhämtestso, wuj tä t'iseltej wet inuhat lhamho, wet itichunejlhi tä yok, “¿Atsi m'ak tä tamenej tä iwoynejetso lhämet tä n'okwi n'oyej?” 30Mat ángel yok:
–María, yej noway, tsi i'amej Dios lakäpfwayaj tä is tä itshupyenej ame. 31Ofwel amho tä lech'otshanhila wet lewohla äsa, lhenla lheya Jesús.#Mat 1.21 32Häpkhila hin'o tä len'ohyaj ihi wet õyenla lheya Dios tä N'owujtaj Lhäs. Wet Lhawuk Dios yenla häpeya Niyat tä wuj, mälhhiyejat iwoye letes David p'ante, 33häpkhilek niyatej Israel lhayis yämlek tiyäj'attsiy, najit lepese Leniyatyaj.#2~Sam 7.12,13,16; Isa 9.7
34María tay'ätshaneje ángel wet yok:
–Mat ¿chiwoye che mälhhiyejatso, tä n'am newej hin'o?
35Lham nichulho wet yok:
–Häp Espíritu tä Dios T'amajchet nämla atape, wet Dios tä N'owujtaj lakhajyhayaj lepeyak takasthila atape. Häp tä tamenej tä han'äfwaj tä nech'e ihichela, lheyla N'ot'amajchet, Dios Lhäs. 36Häte aelh Elisabet hich'otshan, tej tä häpe atsinha tä hich'ut t'at wet wichi yäme tä sufwnaj, athana nech'e seis meses tä hich'otshan. 37Tsi niwohit m'ak che athaho häp Dios.#Gén 18.14; Jer 32.17,27
38Tä María iläte, wet yok:
–Is, ohäpe t'at Lhawuk kwenek. Is che iwoyej at n'oye m'ak tä lhämetso.
Häpet tä mälhyejtso, ángel yikch'oye.
María t'isiyakaye Elisabet
39Wet häp ifwalastso María nakeltshi tä ihoye hupuy tä ihi chenhas tä ihi honhat tä Judea. 40Tä nichäte, wet ihochufwi Zacarías lewukwe wet n'okwiyej Elisabet. 41Tä Elisabet iläte María tä n'okwiyej, wet lhäsaj tä ihi lakachowej w'ahuye. Wet nech'e Espíritu tä Dios T'amajchet tapoyej Elisabet, 42wet ifwitsenej lechos wet yok:
–¡Am lenu'pe nilhokej atsinhay iyhäj tä Dios takäpfway ame, wet takäpfwaye häp äs! 43¿Atsi tä ohäpe tä Owuk lako t'isiyakay n'oye? 44Tsi tä olät ame tä len'okwi n'oyej, wet olhäsaj tä in'ohi w'ahuye tä lakäjyaj ihi. 45¡Lhawuk lakäpfwayaj tä is i'amej, tä lechaye tä lhayämla matche m'ayhay tä ifweln'aj amho!
María iwunit Dios
46Wet nech'e María yok:
“Olham owujyen Lhawuk,#1~Sam 2.1-10; Sal 113.5-9
47wet ohusek akäjejlhi Ofwayhthi Dios.
48Tsi hip'altsenn'o tä ohäpe
lakawo tä p'elitsajfwaj t'at,
wet tälhe athana yämlek tiyäj'attsiy
nilhokej wichi yämhipeja n'oye
tä lakäpfwayaj tä is in'oyej.
49Tsi lakhajyhayaj ihi,
wet iwoyej n'oye m'ayhay tä wus.
Lham häpe t'at N'ot'amajchet,
50wet hip'altsen häp lhamel
tä ihumin wet iwoye lhämtes
yäk nichäte leles tä lepes lheley.
51Lhaikhajyenej lakhajyhayaj tä wuj,
wet itsatkatpe honhat lhamel tä
lhaichäjejwethä letichunhayajay.
52Isoyej leniyatyajay häp niyatey,
wet hiw'enho lewujyaj häp iyhäj
tä w'et m'ayhayhas t'at.
53Iteskanyenejen m'ak tä isej
häp iyhäj tä nichuyuhen,
wet ichen iyhäj tä hiw'en m'ayek,
niwohit m'ak che hiw'enhomche lhamel.
54Tach'ote lakawos tä Israel lhayis,
wet tek hip'ethatlä tä itiyej lep'altsenyaj,
55mälhyej p'antetso tä pajche ifwenho lhatetsel,
Abraham#Gén 17.7 lhäy'e leles tä lepes lheley
yämlek tiyäj'attsiy.”
56María iyej ayej Elisabet pajtha tres meses, wet nech'e yäple lew'et.
Juan Bautista nech'e iche p'ante
57Tä nichäte p'ante lepes lewhäy tä Elisabet hich'otshan, wet iwo p'ante lhäsa. 58Wet iyhäj, lhäy'e iyhäj tä lew'etfwas, tä ihanej tä Lhawuk wuj tä itiyej lep'altsenyaj, lhamel ihoye yämlek iwo lakäjyaja lhamejen.
59Tä tajyäme p'ante ocho ifwalas, wet õ'tiyej n'otetnek tä n'olhijtsek häp han'äfwaj.#Lev 12.3 Wet lhamel t'uhläk õyen lheya lajcha lhey Zacarías, 60mat lako Elisabet yok:
–Kha, lhey Juan.
61Lhamel nichulho wet yok:
–Mat ihichet'a elh amel che lhey n'olheytso.
62Wet lhamel ichumyenlhi takweyey tä tay'ätshaneje Zacarías häp lhey tä lham ihuminche yämlek itiyej. 63Wet Zacarías t'alhe hal'ä t'äj lhip, wet ilesayen tä yok, “Lhey Juan.” Wet nilhokej wichi tä iyej t'iseltejen. 64Häpet tä mälhyejtso, Zacarías nech'e yachajo tä tahuy, wet iwujyen Dios. 65Wet nilhokej wichi tä lew'etfwas lhäy'e lhip tä leselthayaj ihi, lhäy'e lenowayhyaj, wet toyehi imälhewek honhat tä chenhas tä ihi Judea m'ak tä mälhyejtso. 66Wet nilhokej lhamel tä ihanch'oye wuj tä yen tichunhayaja wet yok:
–¿Atsihila tä häpe han'äfwajtso?
Tsi n'äl tä Lhawuk matche tä iyej häp lham.
Zacarías iwunit Dios
67Wet han'äfwaj lajcha Zacarías nech'e Espíritu tä Dios T'amajchet tapoyej, wet yämyenlhi tä yok:
68“¡Lewujyaj ihi Lhawuk, Israel laka Dios,
tsi näme laka wichi yämthilek ifwayhat!
69Ichen n'amehen N'ofwayhthi tä takhajay,
tä häpe lakawo David p'ante leles tä lepes lhele elh.
70Häp täja m'ak tä pajche p'ante ifwel,
tä laka profetas tä t'amajchetes yen lhämeta,
71tä lham ifwayhthila n'amejen lhatayhfwas
lhäy'e nilhokej wichi tä n'äyi n'amhomche.
72Tä nip'ethatahlä lhämet tä t'amajchet
tä iwoyeje lhatetsel p'ante,
wet häp tä hip'altsenhen lhamel.
73Wet häpe t'at täja lhämet p'ante
hit'unhatche tä ifwenho häp lhajcha Abraham,
74tä ifwayhthilat n'amejen lhatayhfwas,
häpkhilek y'atch'ote lham,
wet newache lhanowayhyaj,
75wet n'alhayen t'amajchetesa
wet y'äm is alhoho m'ak tä y'awoye
tä y'ehi tä lham tatache,
nilhokej ifwalas tä y'e honhatena.
76Wet am, yäsaj, eyla Dios tä N'owujtaj laka profeta,
tsi lechunlach'oye häp Lhawuk
yämthilek lewaklhatchehen len'äyhäy,#Mal 3.1
77wet lefwenho laka wichi
tä Dios itäyhthen lesukyajay
wet hiw'enhomche lefwayhyaj.
78Tsi häp lhaka Dios wuj tä lep'altsenyaj ihi,
wet ifwala tä nech'ayek hin'älthila lhatapehen
79häpkhilek ihutunpe lhamel tä ilech'oye honataj
tä häpe n'ot'ilek lehupel,#Isa 9.2
yämthilek ipäyenche lhapach'ol
häp n'äyij tä itaye lhatamsek.”
80Wet tä lhaichihelit han'äfwaj, takhajay lehusek. Wet yen lew'eta honhat tä ts'anis, pajtha nichäte ifwala tä lhaitäfwnhatej Israel lhayis.
Currently Selected:
Luc 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.